رەسەي پرەزيدەنتىنىڭ سيريا بويىنشا ارنايى وكىلى الەكساندر لاۆرەنتەۆ سيريا بويىنشا جوعارى دەڭگەيدەگى 17-ءشى حالىقارالىق كەزدەسۋ بارىسىندا تالقىلاناتىن ماسەلەلەردى اتادى, دەپ حابارلايدى Egemen.kz.
«بۇگىن ءبىز سيريا بويىنشا كەزەكتى 17-ءشى حالىقارالىق كەزدەسۋدى وتكىزگەلى وتىرمىز. نۇر-سۇلتانعا بارلىق دەلەگاتسيالاردىڭ وكىلدەرى كەلدى. بۇگىن ءبىزدى ايتارلىقتاي مازمۇندى كۇن ءتارتىبى كۇتىپ تۇر. سيريالىق رەتتەۋدىڭ ءتۇرلى اسپەكتىلەرى بويىنشا قىزىعۋشىلىق تۋدىراتىن ماسەلەلەردى ورتاعا سالامىز. ەڭ الدىمەن, ءبىز تۇركيا, يران, يراك, ليۆان, يوردانيانىڭ كورشى ەلدەرى دەلەگاتسياسىنىڭ وكىلدەرىمەن سيريالىق رەتتەۋ جولىندا العا جىلجۋعا مۇمكىندىك بەرەتىن بارلىق ماسەلەلەردى تالقىلايمىز», دەدى رەسەي پرەزيدەنتىنىڭ سيريا بويىنشا ارنايى وكىلى.
ونىڭ ايتۋىنشا, قاتىسۋشىلار سوڭعى ۋاقىتتا سيريانىڭ سولتۇستىگىندە عانا ەمەس, بۇكىل ەل بويىنشا تەرروريستىك توپتاردىڭ جاندانعانى تۋرالى الاڭداي باستادى. سوندىقتان تەرروريستىك توپتارعا قارسى ءىس-قيمىلدى جانداندىرۋ جانە بارلىق مۇددەلى تاراپتاردىڭ كۇش-جىگەرىن ۇشتاستىرۋ نۇسقالارى باستى نازاردا بولادى.
«مەنىڭ ويىمشا, ءبىز بۇل ز ۇلىمدىققا قارسى تۇرا الامىز. ارينە, ءبىز سيرياداعى الەۋمەتتىك-ەكونوميكالىق جاعدايدى جاقسارتۋ ءۇشىن جاعداي جاساۋ ماسەلەسىن قاراستىرامىز. بۇل ماسەلە قازىر ءبىرىنشى كەزەكتە تۇر. ءبىز بۇۇ باس حاتشىسىنىڭ جەلتوقسانداعى بايانداماسىمەن مۇقيات تانىستىق. سىرتقى جاعىنان, ارينە, ءبارى وتە كەرەمەت كورىنەدى, حالىقارالىق قاۋىمداستىق قولداۋعا بەلسەندى تۇردە قوسىلدى, بىراق وتكەن التى ايدا ءبىز قالاعان ناتيجەگە قول جەتكىزە المادىق. سوندىقتان ءبىز سيرياداعى گۋمانيتارلىق كومەك تۋرالى جاعدايدى تالقىلايمىز», دەدى الەكساندر لاۆرەنتەۆ.
ونىڭ ايتۋىنشا, تاعى ءبىر ماڭىزدى ماسەلە - سيريالىق بوسقىنداردىڭ ورالۋى.
ارنايى وكىل جاقىندا سيريادا سيريا مەن رەسەي شتابتارىنىڭ كەزەكتى كەزدەسۋى وتكەنىن, وسىعان بايلانىستى بۇل ماسەلەگە بەلگىلى ءبىر قارقىن بەرىلۋى ءتيىس ەكەنىن ەسكە سالدى.
«وسى تاقىرىپقا حالىقارالىق قوعامداستىقتىڭ نازارىن اۋدارعىمىز كەلەدى. سونىمەن قاتار, باتىس ەلدەرى تاراپىنان بەلگىلى ءبىر قوزعالىستار بار. سيريالىق بوسقىنداردى قايتارۋ ءۇشىن ولاردى قايتارۋ ءۇشىن ءتيىستى, لايىقتى جاعدايلار جاسالۋى كەرەك. سيريا ۇكىمەتى بۇل جاعدايلاردى جاساۋ ءۇشىن بار كۇشىن سالۋدا, بىراق ادامداردى, وكىنىشكە وراي, قيراعان ۇيلەرىندە تۇرۋى ءۇشىن قارجىلاندىرۋ قاجەت. پروتسەسس ءجۇرىپ جاتىر, بىراق ءبارىمىز قالاعانداي جىلدام قارقىنمەن ەمەس», دەدى ول.
كەزدەسۋ بارىسىندا ۇستالعاندارمەن الماسۋ جانە ءىز-ءتۇزسىز جوعالعانداردى ىزدەستىرۋ جونىندەگى جۇمىس توبى وكىلدەرىنىڭ باياندامالارى تىڭدالادى.