مەملەكەت باسشىسىنىڭ جارلىعىمەن الەكسەي ۆلاديميروۆيچ تسوي قازاقستان رەسپۋبليكاسىنىڭ دەنساۋلىق ساقتاۋ ءمينيسترى لاۋازىمىنان بوساتىلدى, دەپ حابارلايدى Egemen.kz.
جارلىق اقوردا سايتىندا جاريالاندى.
ايتا كەتەيىك, قازاقستاننىڭ دەنساۋلىق ساقتاۋ ءمينيسترى قىزمەتىنە الەكسەي تسوي بىلتىر, 2020 جىلدىڭ ماۋسىمىندا تاعايىندالعان ەدى.
الەكسەي تسوي 1977 جىلى 2 ساۋىردە وڭتۇستىك قازاقستان وبلىسىندا دۇنيەگە كەلگەن. Sells College (لوندون), قازاقستان مەملەكەتتىك مەديتسينا اكادەمياسىنىڭ اسپيرانتۋراسىن, وڭتۇستىك قازاقستان مەملەكەتتىك مەديتسينا اكادەمياسىن, «دانەكەر» حالىقارالىق قۇقىق جانە حالىقارالىق بيزنەس ينستيتۋتىن, رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ كورپوراتيۆتىك باسقارۋ جوعارى مەكتەبىن تامامداعان.
ستەنفورد ۋنيۆەرسيتەتىندە (اقش), سينگاپۋردا, ماسكەۋدە, گەرمانيادا, ۇلىبريتانيادا جانە تاعى دا باسقا ەلدەردە تاعىلىمدامادان وتكەن. ىسكەرلىك اكىمشىلىك دوكتورى, مەديتسينا عىلىمدارىنىڭ كانديداتى.
حيرۋرگ-ەندوسكوپيست بولىپ جۇمىس ىستەگەن, قالپىنا كەلتىرۋ حيرۋرگياسى جانە ترانسپلانتولوگيا ورتالىعىنىڭ اعا عىلىمي قىزمەتكەرى, ۇلتتىق عىلىمي مەديتسينا ورتالىعىنىڭ ىشكى مەديتسينا ورتالىعىنىڭ جەتەكشى عىلىمي قىزمەتكەرى, «ەۋروازياتتىق رەسپيراتورلىق قوعام» قوعامدىق بىرلەستىگىنىڭ باس حاتشىسى, قر پرەزيدەنتى ءىس باسقارماسىنىڭ زاماناۋي مەديتسينالىق تەحنولوگيالاردى ەنگىزۋ ورتالىعىنىڭ ديرەكتورى, قر پرەزيدەنتى ءىس باسقارماسىنىڭ مەديتسينالىق ورتالىعىنىڭ باسشىسى, استانا قالاسىنىڭ №1 قالالىق اۋرۋحاناسىنىڭ باس دارىگەرى, قر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى, قر دەنساۋلىق ساقتاۋ ۆيتسە-ءمينيسترى قىزمەتتەرىن اتقارعان.
2019 جىلعى اقپاننان باستاپ 2020 جىلدىڭ ماۋسىمىنا دەيىن قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعىن باسقارعان.