مال ۇرلىعى ءورشىپ تۇر

ارىز تۇسە سالا ىسكە كىرىسكەن پوليتسەيلەر جانۇزاق اۋىلى ماڭىنان قولدى بولعان جىلقىلاردى تاۋىپ, يەسىنە قايتارىپ بەردى. «قايتقان مالدا قايىر بار» دەگەن يەسى پوليتسەيلەردىڭ ءىس-قيمىلدارىنا ريزا. العىسىن جاۋ­دىردى. ىزدەۋ شامامەن 10 كۇنگە سو­زىل­عان. اۆتوجولدار مەن ەت ونىمدەرىن وتكىزۋ ورىندارى جەدەل جابىلىپ, كۇدىكتى كولىكتەر تۇگەلدەي تەكسەرىلدى. پوليتسەيلەردىڭ ايتۋىنشا, اتالعان فاكتى بويىنشا قر قك 188-بابىنىڭ 4-بولىگى (مال ۇرلىعى) بويىنشا سوتقا دەيىنگى تەرگەۋ امالدارى باستالدى.

مال ۇرلىعىنىڭ نەمەسە جوعالۋدىڭ الدىن الۋ ءۇشىن پوليتسيا دەپارتامەنتى مال يەلەرىن قورا-قوپسىلارىن جوندەپ, مالدى قاراۋسىز قالدىرماۋ كەرەكتىگىن ايتادى. سونداي-اق مالدى تاڭبالاپ, تىركەۋدى دە ۇمىتپاعان ءجون. وكىنىشكە قاراي, جول بويىندا قاراۋسىز مال كوپ. قاراۋسىز جۇرگەن سوڭ دا قولدى ەتۋ وڭاي. ءبىر جاعىنان قاراۋسىز جۇرگەن مال يەسىنە دە ايىپپۇل بار. «مال ۇرلىعى» جەدەل الدىن الۋ شاراسى كەزىندە «ايىپ تۇراعىنا» 2 115 باس مال قامالعان ەكەن. ايتا كەتسەك, 15-24 قاراشا ارالىعىندا شىعىس قازاقستان وبلىسى اۋماعىندا «مال ۇرلىعى» جەدەل الدىن الۋ پروفيلاكتيكاسى وتكىزىلدى. ءۇش كۇن ىشىندە عانا مال ۇرلىعىنا قاتىستى 17 قىلمىس اشىلعان. كريمينالدىق پوليتسەيلەردىڭ ارقاسىندا 66 باس مال تابىلىپ, يەلەرىنە قايتارىلدى: 40 جىلقى, 26 ءىرى قارا. 148 ازامات مال جايۋ ەرەجەلەرىن بۇزعانى ءۇشىن قر اقبتك-ءنىڭ 408-بابى بويىنشا اكىمشىلىك جاۋاپكەرشىلىك­كە تارتىلدى. مال جانە ەت ونىمدەرىن تاسىمالدايتىن 571 اۆتوكولىك, 427 شا­رۋا قوجالىعى مەن مال باعاتىن ورىن, مال جانە ەت ونىمدەرىن وتكىزەتىن 197 بازار, دۇكەن, پاۆيلون تەكسەرىلدى. تەكسەرۋ كەزىندە ۆەتەريناريا سالاسىنان دا بىرقاتار قۇقىق بۇزۋشىلىقتار انىقتالدى.

سونداي-اق «مال ۇرلىعى» رەسپۋب­ليكالىق جەدەل-پروفيلاكتيكالىق ءىس-شاراسى كەزىندە اباي اۋداندىق پولي­تسيا ءبولىمىنىڭ قىزمەتكەرلەرى مال ۇرلى­عىمەن اينالىسقان قىلمىستىق توپتى ۇستاعان. ءۇش ادامنان قۇرالعان توپ اباي اۋدانىنىڭ تۇرعىندارى ەكەن. پوليتسيا قىزمەتكەرلەرى ولاردىڭ 2020 جىلدان باستاپ 14 باس جىلقى ۇرلاعانىن انىقتادى. شىعىن سوماسى 5 ملن تەڭگەنى قۇرادى. بۇل ۇرلىق جەدەل-ىزدەستىرۋ ءىس-شارالارىن جۇرگىزۋ ناتيجەسىندە اشىلدى. كۇدىكتىلەردىڭ ءبىرىنىڭ قىستاعىن تەكسەرۋ كەزىندە زاتتاي دالەلدەر, ياعني مالدىڭ تەرىلەرى مەن تۇياقتارى تابىلدى.

مال ۇرلىعى فاكتىسى بويىنشا قازىرگى ۋاقىتتا قر قك-ءنىڭ 188-بابى 1-بولىگى, 2-بولىگى بويىنشا سوتقا دەيىنگى تەرگەۋ جۇرگىزىلىپ جاتىر. كۇدىكتى سوت­تىڭ سانكتسياسىمەن قاماۋعا الىندى. ول كىنالى دەپ تانىلعان جاعدايدا وعان 7 جىلعا دەيىن باس بوستاندىعىنان ­ايىرۋ جازاسى تاعايىندالۋى مۇمكىن. ال قىل­مىستىق توپتىڭ وزگە مۇشەلەرىنىڭ وسى ىسكە قاتى­سى انىقتالۋدا.

– جايىلىمنان ۇرلىقتىڭ الدىن الۋ ءۇشىن جۇمىستار تۇراقتى تۇردە جۇر­گىزىلەدى. قاراۋسىز قالعان مال – ۇرى­لار ءۇشىن ولجا. تۇرعىندار وسىنى ءتۇسى­نىپ, مالىنا يە بولۋى كەرەك. بايقا­عانىمىزداي, مالدىڭ كوبى جايىلىم­نان جوعالادى. ال ولاردى ىزدەۋ – ۇل­كەن جۇمىس. باسا ايتا كەتەرلىگى, يەسىز مالدىڭ اۆ­توكولىك جۇرگىزۋشىلەرىنە دە قاۋىپ تون­دىرەتىنىن ۇمىتپاۋىمىز كەرەك, – دەيدى وبلىستىق پد باستىعى ساعات ماديەۆ.

10 كۇن ىشىندە مال ۇرلىعىنا قاتىستى 33 قىلمىس اشىلعان. ەستەرىڭىزگە سالا كەتسەك «قازاقستان رەسپۋبليكاسى­نىڭ كەيبىر زاڭنامالىق اكتىلەرىنە قىل­مىس­تىق, قىلمىستىق ءىس جۇرگىزۋ زاڭناما­سىن جەتىلدىرۋ جانە جەكە ادام قۇقىق­تارى­نىڭ قورعالۋىن كۇشەيتۋ ماسەلە­لەرى بو­يىنشا قولدانىسقا ەنگىزىل­گەن جانە زاڭ­دى كۇشىنە ەنگەن وزگەرىستەر مەن تولىق­تىرۋلار ەنگىزۋ تۋرالى» زا­ڭىندا مال ۇرلىعىنا قاتىستى جازا قا­تاڭ. ناقتىلاپ ايتساق, مال ۇرلىعى دالەل­دەنگەن جاعدايدا قىلمىسكەر­دىڭ مۇلكى تاركىلەنىپ, 3 مىڭ ايلىق ەسەپ­تىك كورسەتكىشكە دەيىنگى مولشەردە ايىپ­پۇل سالىنادى نەمەسە 5 جىلعا دەيىن­گى مەر­زىمگە باس بوستاندىعى شەكتەلە­دى. قىل­مىستىڭ اۋىرلىعىنا قاراي 7 جىل­­عا دەيىن دە باس بوستاندىعىنان ايىرىلۋى ىقتيمال. سوندىقتان دا نيەتى بۇزىقتار زاڭسىز ارەكەتكە بارماس بۇرىن قاتاڭ جازا بارىن ەستە ۇستاۋى كەرەك. ايتىپ وتكەندەي, مال يەلەرى دە ساق بول­عاندارى ءجون.

شىعىس قازاقستان وبلىسى