بۇگىن قازاقستاننىڭ قاسيەتتى ءارى قاستەرلى مەرەكەسى – تاۋەلسىزدىك كۇنى. وسىدان 30 جىل بۇرىن 16 جەلتوقساندا جوعارعى كەڭەس «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق زاڭدى قابىلداعان ەدى, دەپ حابارلايدى Egemen.kz.
تاۋەلسىزدىكتىڭ 30 جىلدىعىندا قازاقستان ەلەۋلى جەتىستىكتەرگە جەتتى جانە كۇردەلى سىن-قاتەرلەردەن ءوتتى.
ءتول ۆاليۋتاسىن قولدانىسقا ەنگىزدى. ايبىندى اسكەرىن قۇردى. شەكارالارىن بەكىتىپ, جاڭا استاناسىن سالدى. مەملەكەتتىك رامىزدەرىن بەكىتتى. ورنىقتى مەملەكەتتىك ينستيتۋتتارى بار جانە ەكونوميكاسى باسەكەگە قابىلەتتى دەموكراتيالىق مەملەكەت رەتىندە قالىپتاستى.
الەمدىك ساۋدا-ەكونوميكالىق جۇيەگە تولىق ەنىپ, ءوزىن سەنىمدى سەرىكتەس رەتىندە كورسەتە ءبىلدى. بۇگىندە الەم بويىنشا 120-دان استام ەل قازاقستانمەن ديپلوماتيالىق قارىم-قاتىناس ورناتقان. بيىلعى مەرەيتويلىق جىلدا دا ەلىمىزدە اۋقىمدى رەفورمالار باستالدى, ەكونوميكا مەن الەۋمەتتىك سالا جاڭعىرىپ كەلەدى.
پاندەمياعا قاراماستان, مەملەكەت وتاندىق بيزنەسكە قولداۋ كورسەتىپ جاتىر. حالقىمىزدىڭ سانى 19 ميلليوننان استى. قازاقستان سسرو تاراعاننان كەيىن اراعا 8 كۇن سالىپ, تاۋەلسىزدىگىن جاريالادى.
«تاۋەلسىزدىكتىڭ ءبىزدىڭ بارىمىزگە ارتار مىندەتى مول. ەندى ەڭسەلى ەل بولۋدىڭ جولىنا شىنداپ ءتۇسۋىمىز كەرەك. اۋلەتىمىزدىڭ اسۋى دا, داۋلەتىمىزدىڭ تاسۋى دا ءوز قولىمىزدا. كەڭ-بايتاق جەرىمىزدىڭ بايلىعى وسى دالانىڭ تۇپكىلىكتى حالقىنا دا, تاعدىر قوسىپ بىرگە ءومىر ءسۇرىپ جاتقان وزگە ۇلت وكىلدەرىنە دە مولىنان جەتەدى. نە ىستەسەك تە اقىلمەن ىستەيىك, ارزان ۇرانعا ەرمەيىك, ۇشپا سەزىمگە ەرىك بەرمەيىك دەگىم كەلەدى», دەدى ەلباسى نۇرسۇلتان نازارباەۆ 17 جەلتوقساندا الماتىداعى ورتالىق الاڭدا قازاقستان رەسپۋبليكاسىنىڭ مەملەكەتتىك تاۋەلسىزدىگى جاريالانۋىنا وراي وتكىزىلگەن جيىندا.
قازاقستاننىڭ تاۋەلسىزدىگىن رەسمي تۇردە ەڭ العاش امەريكا قۇراما شتاتتارى مويىندادى. ودان كەيىن قىتاي, ۇلىبريتانيا, موڭعوليا, فرانتسيا, جاپونيا, وڭتۇستىك كورەيا جانە يران يسلام مەملەكەتى قازاقستاندى تاۋەلسىز مەملەكەت رەتىندە تانىدى.
ال تۇركيا ءبىرىنشى بولىپ قازاقستاندا ءوز ەلشىلىگىن اشتى.