ەل ەركىندىككە قول جەتكىزىپ, دەربەستىك دىڭگەگى قاعىلعان تۇستا ماڭىزدى ىستەردىڭ ۇيىتقىسى بولا بىلگەن قازاقستان رەسپۋبليكاسى پرەزيدەنتىنىڭ ءارحيۆى مەرەيلى بەلەستەرگە بۇگىنگى كۇن تۇرعىسىنان باعا بەرۋ ماقساتىندا قازاقستان تاۋەلسىزدىگىنىڭ 30 جىلدىعىنا ارنالعان «قازاقستان جولى: تاۋەلسىزدىك تاريحى» تاقىرىبىندا دوڭگەلەك ۇستەل ۇيىمداستىردى.
جاڭا زامانداعى قازاقستان – جۇيەلى رەفورمالاردى ءساتتى جۇزەگە اسىرا بىلگەن, قارىشتاپ دامۋ ۇستىندەگى جانە بولاشاعىنا سەنىممەن كوز تاستاپ وتىرعان مەملەكەت. ەلىمىز قىسقا تاريحي كەزەڭدە ەكونوميكا, ساياسات, الەۋمەتتىك سالالاردا اۋقىمدى جەتىستىكتەرگە قول جەتكىزىپ, الەمدىك ارەنادا تانىلا باستادى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ كوشباسشىلىعى ەلىمىزدىڭ ءححى عاسىردا دامۋىنىڭ سىرتقى ساياساتتاعى كوپۆەكتورلىلىق پەن مەملەكەتتىڭ جاسامپاز بىتىمگەرشىلىك باستامالارى سىندى وزەكتى فاكتورلارىن انىقتادى.
دوڭگەلەك ۇستەلگە قاتىسۋشىلاردىڭ نازارىنا قازاقستان تاۋەلسىزدىگىنىڭ قالىپتاسۋ تاريحىنا قاتىستى زاڭدىق جانە ءنورماتيۆتى قۇجاتتاردىڭ ماتىندەرى, ستراتەگيالىق جوسپارلار مەن قازاقستاننىڭ ىشكى جانە سىرتقى ساياساتىنىڭ قۇجاتتارى كەلتىرىلگەن تاريحي-قۇجاتتىق كورمە ۇسىنىلدى.
شاراعا تاۋەلسىزدىكتىڭ العاشقى جىلدارىنداعى بىرقاتار ساياسي شەشىمدەردىڭ قابىلدانۋىنا تىكەلەي اتسالىسقان كورنەكتى مەملەكەت جانە قوعام قايراتكەرلەرى, عىلىمي جانە شىعارماشىلىق ينتەلليگەنتسيا, ۇلتتىق-مادەني ورتالىقتاردىڭ وكىلدەرى, ءال-فارابي اتىنداعى قازۇۋ جانە اباي اتىنداعى قازۇپۋ وقىتۋشىلارى مەن ستۋدەنتتەرى قاتىستى.
ءىس-شارانىڭ اشىلۋ بارىسىندا قازاقستان رەسپۋبليكاسى پرەزيدەنتى ءارحيۆىنىڭ ديرەكتورى ج.ابدىقادىروۆا بۇگىندە قوعامنىڭ رۋحاني قۇندىلىعىن جانداندىرۋ, ۇلتتىق سانا-سەزىمنىڭ, ۇلتتىق ماقتانىشتىڭ ارتۋىنىڭ بەلسەندى ءۇردىسى ءجۇرىپ جاتقانىن اتاپ ءوتتى. ارحيۆ قۇجاتتارى – كونە زاماننان قازىرگە دەيىنگى قازاقستاننىڭ شىنايى تاريحىن قالپىنا كەلتىرەتىن تاريحي جادى. ارحيۆتىك مۇرانى ساقتاۋ مەملەكەتتىك ماڭىزدى باستامالارعا نەگىز بولاتىن, ولاردىڭ اقپاراتتىق ماڭىزدىلىعىن ايتپاعاندا, مەملەكەتتىلىكتىڭ نىشانى بولىپ تابىلادى. ارحيۆتەرگە ەلدىڭ تاريحي مۇراسىن ساقتاۋ جانە كوبەيتۋ, سونىمەن قاتار, ارحيۆ قۇجاتتارىن – تاريح كۋالىكتەرىن زەردەلەۋ نەگىزىندە ازاماتتاردىڭ تاريحي ساناسىن قالىپتاستىرۋ جانە ۇلتتىق سانا-سەزىمدى دامىتۋ, ءپاتريوتيزمدى دارىتۋدى قامتاماسىز ەتۋ مىندەتى جۇكتەلگەن. مەملەكەت باسشىسى ق.توقاەۆ «تاۋەلسىزدىك بارىنەن قىمبات» ماقالاسىندا: «ازاتتىق تاڭىن ءوز كوزىمەن كورگەن الدىڭعى بۋىن بولماسا, كەيىنگى جاستار وتكەن عاسىردىڭ 90-جىلدارىنداعى تاريحي وقيعالاردىڭ تەرەڭىنە بويلاپ, ءمانىن جەتە تۇسىنە بەرمەيدى. تاۋەلسىزدىككە تاعدىردىڭ بەرە سالعان سىيى رەتىندە قارايدى. شىن مانىندەگى احۋال ولاي ەمەس. ەلباسى سول كەزدەگى ساياسي, ەكونوميكالىق, الەۋمەتتىك, دەموگرافيالىق جانە باسقا دا جاعدايلارعا بايلانىستى جەتى رەت ەمەس, جەتپىس رەت ولشەپ, ءبىر رەت كەسۋگە ءماجبۇر بولدى. ءبىز تىعىرىقتان شىعار جولدىڭ ساڭىلاۋى دا كورىنبەيتىن قيىن كۇندەردەن قاقتىعىس پەن قانتوگىسكە ۇرىنباي امان شىعىپ, ەشكىمگە ەسەمىزدى جىبەرمەي, جاڭا سيپاتتاعى قازاق مەملەكەتىن قۇردىق. بۇگىنگى جانە بولاشاق ۇرپاق مۇنى ءاردايىم ءبىلىپ وتىرۋى كەرەك. سول ءۇشىن قازاقستاننىڭ جاڭا تاريحىن دا جۇيەلى زەرتتەگەن ءجون» دەپ اتاپ وتكەن.
دوڭگەلەك ۇستەلدىڭ قۇرمەتتى قوناقتارى بولعان ورازالى سابدەن مەن نۇرلان ورازالين قازاقستاننىڭ تاۋەلسىزدىگى تۋرالى تاريحي قۇجات قابىلدانعان كەزدە قازاقستان رەسپۋبليكاسى جوعارعى كەڭەسىنىڭ دەپۋتاتتارى بولا وتىرىپ, تاۋەلسىزدىكتىڭ قالىپتاسۋ كەزەڭىندەگى بىرقاتار ماڭىزدى زاڭداردىڭ دايىندالۋىنا تىكەلەي اتسالىسقان. ولار كەڭەس قوعامى مەن مەملەكەت ءومىرىنىڭ بارلىق سالالارىنا اسەر ەتكەن كسرو-نىڭ ەڭ تەرەڭ داعدارىسى ەكونوميكالىق سالادا ەرەكشە وتكىر سەزىلگەنىن اتاپ ءوتتى. سوندىقتان ەكونوميكا سالاسىن الدىڭعى جولعا قويۋ تۇڭعىش پرەزيدەنت – ەلباسى ن.ءا. نازارباەۆ پەن ونىڭ كومانداسى قىزمەتىنىڭ باستى باعىتتارىنىڭ بىرىنە اينالدى.