بۇگىن سەنات توراعاسى ماۋلەن اشىمباەۆتىڭ توراعالىق ەتۋىمەن پالاتانىڭ وتىرىسى بولدى. وندا سەناتورلار ەلىمىزدىڭ سوت جۇيەسىن ودان ءارى رەفورمالاۋعا باعىتتالعان زاڭدار قابىلدادى, دەپ حابارلايدى Egemen.kz.
ەندى سوت جۇيەسىنە قۇقىقتىڭ تار اياداعى سالالارى بويىنشا بىلىكتى مامانداردى تارتۋ جونىندەگى ەرەجە زاڭنامالىق تۇرعىدان بەكىتىلەدى. ول ءۇشىن ۇمىتكەرلەر مامانداندىرىلعان بىلىكتىلىك ەمتيحانىن تاپسىرىپ, بولەك كونكۋرستان وتۋگە ءتيىس.
«قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭدا وسى جانە باسقا دا جاڭاشىلدىقتار كورىنىس تاپقان.
سۋديالاردىڭ بوس لاۋازىمدارىنا كانديداتتاردى تاعايىنداۋ ماسەلەلەرىن قاراۋ جونىندەگى جوعارى سوت كەڭەسىنىڭ وكىلەتتىكتەرى دە كەڭەيتىلەدى.
سەناتورلار ول ەرەجەلەرگە قولداۋ ءبىلدىردى جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سوت جۇيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ پالاتا وتىرىسىندا ەكى وقىلىمدا قابىلداندى.
سونىمەن قاتار سەناتورلار مەملەكەت باسشىسى ازاماتتىق پروتسەستى جەڭىلدەتۋ جونىندەگى بۇرىن ماقۇلداعان تاسىلدەردى ىسكە اسىرۋعا, سونداي-اق تاتۋلاستىرۋ راسىمدەرىن قولدانۋ سالاسىن كەڭەيتۋگە باعىتتالعان زاڭ جوباسىنا دا باستاماشى بولعان ەدى. بۇگىن قابىلدانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق پروتسەستىك زاڭنامانى جەتىلدىرۋ جانە داۋلاردى سوتتان تىس جانە سوتقا دەيىنگى رەتتەۋ ينستيتۋتتارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ وسىعان ارنالىپ وتىر. بۇل زاڭ مەدياتورلاردىڭ قۇقىقتارى مەن مىندەتتەرىن ناقتىلايدى, ونلاين-مەدياتسيانى دامىتۋعا ىقپال ەتەدى. سونىمەن قاتار الەمدىك تاجىريبەدەگى «ۇلگىلى سوت شەشىمى» ينستيتۋتىن بەيىمدەۋ ۇسىنىلادى جانە تاراپتارعا اۋماقتان تىس سوتتالۋدى تاڭداۋ قۇقىعى بەرىلەدى. بۇل قاعيدانىڭ ءمانى-جايى – IT ارنايى باعدارلاماسى ءىستى ءبىر سوتتىڭ ىشىندە ەمەس, بۇكىل ەلدەگى سوتتاردىڭ اراسىندا ولاردىڭ ماماندانۋى مەن جۇمىس جۇكتەمەسىن ەسكەرە وتىرىپ اۆتوماتتى تۇردە تاراتادى. بۇل رەتتە اۋماقتان تىس سوتتالۋ جاعدايى ەكى تاراپتىڭ كەلىسىمىمەن عانا تاڭدالادى.
قابىلدانعان زاڭدار جونىندە پىكىر بىلدىرگەن ماۋلەن اشىمباەۆ جاڭا نورمالاردىڭ سوت جۇيەسىن ودان ءارى دامىتۋ ءۇشىن ماڭىزدى ەكەنىن اتاپ ءوتتى.
«بۇگىن قابىلدانعان زاڭدار مەملەكەت باسشىسىنىڭ سوت جۇيەسىن جەتىلدىرۋگە ارنالعان باستامالارىن ىسكە اسىرۋ ءۇشىن ازىرلەندى. پارلامەنت دەپۋتاتتارى باستاماشىل بولعان زاڭدار ەلىمىزدەگى سوت جۇيەسىن ودان ءارى جاڭعىرتۋدى كوزدەيدى. سۋديا لاۋازىمىنا ۇمىتكەرلەردى ىرىكتەۋ جۇيەسىن جانە سۋديالاردى كونكۋرستىق ىرىكتەۋ تەتىكتەرىن جەتىلدىرەدى. جاڭا نورمالار سوت جۇيەسىندە زاماناۋي تەحنولوگيالاردى كەڭىنەن پايدالانۋعا دا مۇمكىندىك بەرەدى. جوعارعى سوتتىڭ پلەنارلىق وتىرىسىنىڭ جانە جوعارى سوت كەڭەسى وتىرىسىنىڭ قۇزىرەتتەرىن كەڭەيتەدى», دەدى سەنات توراعاسى.