اقتوبەنىڭ حرومتاۋ اۋدانى, قوپا جانە تامدى اۋىلدارىندا مالدان اۋرۋ شىقتى. قازىرگى كەزدە سىنامالار زەرتحاناعا جىبەرىلدى, دەپ حابارلايدى Egemen.kz.
بۇگىندە حرومتاۋ اۋدانىنىڭ قوپا جانە تامدى اۋىلدارىندا ءىرى قارادان اۋرۋدىڭ تىركەلگەنى تۋرالى اقپارات تەكسەرىلىپ جاتىر.
«جانۋارلاردان اۋىز قۋىسىنان سىلەكەي اعۋ مەن اقساۋ سياقتى كلينيكالىق بەلگىلەر بايقالعان. مال يەلەرى ۆەتەرينارلىق دارىگەرلەردى كۇتپەي, دۇربەلەڭ تۋدىرعان. باسقا ادامداردىڭ كەڭەسىنە قۇلاق اسىپ, وزدەرى دياگنوز قويىپ, ۆيرۋسقا قارسى پرەپاراتتاردى ساتىپ الىپ, مالىن ەمدەگەن. بۇگىن نۇر-سۇلتان قالاسىنداعى ۆەتەريناريا بويىنشا ۇلتتىق رەفەرەنتتىك ورتالىعىنا قان مەن سىلەكەي سىنامالارىن جىبەرۋ ءۇشىن وبلىستىق ۆەتەريناريا باسقارماسىنىڭ جانە ۆەتەريناريالىق ستانتسيانىڭ ماماندارى اۋىلعا باردى. سونداي-اق ۆەتەريناريالىق زەرتحانانىڭ ناتيجەلەرى شىققانعا دەيىن حالىق اراسىندا ءتۇسىندىرۋ جۇمىستارى جۇرگىزىلىپ, جانۋارلارعا اۋىز قۋىسىن وڭدەۋدى قالاي جۇرگىزۋ كەرەگى كورسەتىلەدى», دەدى وبلىستىق ۆەتەريناريا باسقارماسىنىڭ باسشىسى قۇسايىن سارسەمباي.
ونىڭ ايتۋىنشا, حرومتاۋداعى مال اۋرۋى العا اۋدانىنداعى وقيعاعا ۇقساس. بۇعان دەيىن ولارعا ينفەكتسيالىق رينوتراحەيت دياگنوزى قويىلعان بولاتىن.