شىعىس قازاقستان وبلىسىندا «وسكەمەن-سەمەي» تاسجولىنىڭ 10-198 شاقىرىمى جابىلىپ, «ومبى-مايقاپشاعاي» تاسجولىندا كولىك قوزعالىسى شەكتەلدى, دەپ حابارلايدى Egemen.kz.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, بۇگىن ساعات 06.30-دان باستاپ ءوڭىر بويىنشا اۋا رايىنىڭ ناشارلاۋىنا, ناقتى ايتقاندا جاڭبىر جاۋىپ, كوكتايعاق بولۋىنا بايلانىستى جول جابىلدى.
«رەسپۋبليكالىق ماڭىزى بار «وسكەمەن-سەمەي» تاسجولىنىڭ 10-198 شاقىرىمىندا (گەراسيموۆكا اۋىلى مەن سەمەي قالاسىنىڭ اراسى) اۆتوكولىكتىڭ بارلىق تۇرىنە جۇرۋگە تىيىم سالىندى.
سونداي-اق رەسپۋبليكالىق ماڭىزداعى «ومبى-مايقاپشاعاي» تاسجولىنىڭ 756-906 شاقىرىمىندا (سەمەي قالاسى مەن قالباتاۋ اۋىلىنىڭ اراسى) تىركەمەسى بار جۇك كولىكتەرىنىڭ جانە اۆتوبۋستاردىڭ قوزعالىسى شەكتەلدى», دەلىنگەن اقپاراتتا.
وسى رەتتە دەپارتامەنت ماماندارى تۇرعىندارعا الىس ساپارعا شىقپاۋعا, جولداردىڭ جاي-كۇيىن «دارمەن» ءموبيلدى قوسىمشاسى ارقىلى تەكسەرىپ وتىرۋعا كەڭەس بەرەدى.