ەكى جىل بۇرىن Egemen Qazaqstan گازەتىندە «قاسيەتتى قىزبەلگە قامقورلىق قاجەت» دەگەن تاقىرىپپەن ماقالامىز جاريالانعان. باسىلىم بەتىندە اۋىلداعى اعايىننىڭ ماسەلەسىن كوتەرىپ, بازىناسىن جازعانبىز. سودان بەرى ءبىراز دۇنيە وزگەرگەنگە ۇقسايدى.
قوستاناي وبلىسىنداعى 71 947 گەكتار جەردى الىپ جاتقان قىزبەل اۋىلدىق وكرۋگىنىڭ حالىق سانى – 734 ادام. ونىڭ ىشىندە 140 ادام تۇراقتى جۇمىسپەن قامتىلعان. مۇنداعى جۇرت اتاۋلى الەۋمەتتىك كومەك المايدى. سەبەبى – ءبارى ءوزىن-ءوزى جۇمىسپەن قامتىپ وتىر. اۋىلدىق وكرۋگتىڭ باسىم بولىگى مال جانە ەگىن شارۋاشىلىعىمەن اينالىسادى. 23 شارۋا قوجالىعى جۇمىس ىستەيدى. بيىل مەملەكەتتىك «سىباعا» باعدارلاماسىنا «قاينار» جەكە شارۋا قوجالىعىنىڭ باسشىسى قارعالى رىسبەكوۆ قاتىسىپ, اۋىلشارۋاشىلىق قارجىلاي قولداۋ قورىنان 6% نەسيەمەن ليتۆا مەملەكەتىنەن 45 باس «گەرەفورد» اسىل تۇقىمدى ءىرى قارا مالدارىن ساتىپ الىپ, ءتول باسىن كوبەيتۋدى قولعا الدى.
حالىق ءۇشىن اۋىز سۋدان ماسەلە جوق. قىسقا دايىندىقتارى جامان ەمەس. قازىردىڭ وزىندە شارۋا قوجالىقتارى 6 مىڭ توننا, ال اۋىل تۇرعىندارى 5 مىڭ توننا مال ازىعىن دايىنداپ ۇلگەرگەن. تۇرعىندار 840 توننا كومىر ءتۇسىرىپ العان.
بەرتىنگە دەيىن وسى ءبىر اۋىلدىڭ اجارى تايىپ, ءسانى كەتىپ بارا جاتقانداي كورىنىپ ەدى. 2021 جىلدىڭ مامىر ايىندا اۋىل تۇلەپ سالا بەردى. قىزبەل اۋىلدىق وكرۋگىنىڭ اكىمى قايسار نۇرعازين اۋىلدىڭ كەلبەتىن اشىپ, شىرايىن كەلتىرۋ ماقساتىندا جۇرگىزىلەتىن «كوركەيە بەر, قىزبەلىم!» اتتى كەشەندى جۇمىس جوسپارىن قولداۋعا ۇندەپ, جۇرتشىلىقپەن بەيرەسمي كەزدەسۋ وتكىزدى. اكىمنىڭ باستاماسىن تۇرعىندار قۇپتاعان. بايگەرەي كاكيموۆ, ەلجان سادۋاقاسوۆ, مانار ەسجانوۆ, اسقار قوشقاروۆ سىندى ەل اعالارى قور اشىپ, ىسكە بىلەك سىبانا كىرىستى. وزگە دە ازاماتتار ەل مۇددەسىنە جۇدىرىقتاي جۇمىلدى.
– بيىل اۋىل ازاماتتارىنىڭ ەرىكتى تۇردە, ءوز ۇسىنىستارىمەن بىرقاتار جۇمىس اتقارىلدى. بۇل رەتتە ەلباسى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ ماڭىزى زور بولدى. سەبەبى ءدال وسى ماقالادان كەيىن ايماقتاردا «تۋعان جەرگە تاعزىم» اتتى اكتسيالار كوپتەپ ۇيىمداستىرىلا باستادى. ءبىزدىڭ باستامامىز دا وسى باعدارلاما اياسىندا قولعا الىندى. كەۋدەسىندە نامىس وتى مازداعان, اۋىلىنا الاڭ كوڭىلىمەن قارايتىن ازاماتتارىمىز كوپ ەكەن. سونداي قولداۋشىلارىمىزدىڭ ارقاسىندا تۋعان جەرىمىز قۇلپىرىپ كەلەدى, – دەيدى اۋىل اكىمى قايسار سۇلتانبەك ۇلى.
اتاپ ايتقاندا, بيىل كوشەلەردى جارىقتاندىرۋ ماسەلەسى شەشىمىن تاپتى. قىزبەلدىك ءمۇسىنشى مۇحامەتقالي راحاليەۆ سالعان مىرجاقىپ دۋلات ۇلىنىڭ ءبيۋستى ورناتىلدى. «تاۋەلسىزدىك ساياباعى» اتالاتىن دەمالىس ورىنى اشىلىپ, قاجەتتى ورىندىقتار قويىلدى جانە جولدارىنا تاس توسەنىش قالاندى. اۋىلدىڭ كىرە بەرىسىنە جانە ورتالىعىنا زاماناۋي ديزاينداعى ۆيزيت-بەلگىلەر سالىندى. دالا ساحناسى جاڭارتىلدى. بۇقارالىق سپورتتى دامىتۋ ماقساتىندا جاھاندىق تالاپتارعا ساي امبەباپ ۆولەيبول-فۋتبول الاڭى پايدالانۋعا بەرىلدى. ورتالىق الاڭعا 20 مەترلىك تۋ تۇعىر ورناتىلدى. بۇدان بولەك مەملەكەتتىك قارجىعا مىرجاقىپ دۋلات ۇلى اتىنداعى مەكتەپتە ورنالاسقان الاش ارىسىنىڭ مۋزەيى مەن سپورت زال كۇردەلى جوندەۋدەن ءوتتى. ۇزاق جىلدار بويى جاڭعىرتۋدى قاجەت ەتىپ كەلگەن مادەنيەت ۇيىنە اۋداندىق بيۋدجەتتەن 7 ملن تەڭگە باعىتتالدى. كوپتىڭ تىلەگى ورىندالىپ, ۇيالى بايلانىس جەلىسى تارتىلدى.
جاقىندا عانا ەل تاۋەلسىزدىگىنىڭ 30 جىلدىعىنا وراي جوعارىدا اتالعان جاڭا كەشەندەردىڭ اشىلۋ سالتاناتى وتكىزىلدى.
جاڭا دەمالىس ورىندارىنىڭ اشىلۋ راسىمىنە جانكەلدى اۋدانى اكىمدىگىنىڭ وكىلدەرى, ءماسليحات دەپۋتاتتارى جانە اۋىل تۇرعىندارى مەن سىرتتا جۇرگەن ەل جاناشىرلارى جينالدى.
جانگەلدى اۋدانى اكىمىنىڭ ورىنباسارى ەرەنبول الماتوۆ تۋعان جەردى تۇلەتۋ ماقساتىندا دەمەۋشىلىك بىلدىرگەن مەتسەناتتارعا اۋدان اكىمىنىڭ گراموتاسىن تابىس ەتتى.
ىلكىمدى ىستەردىڭ تانىستىرىلىمى قىزبەل اۋىلىنىڭ مادەني ۇيىمداستىرۋشىسى ايجامال بايمىرزا ازىرلەگەن اۋىل ونەرپازدارىنىڭ كونتسەرتتىك باعدارلاماسىنا جانە سپورتتىق جارىستارعا ۇلاستى. ءىس-شارا بارىسىندا اۋىل اقساقالدارى ەلىنە ەڭبەگى سىڭگەن ازاماتتارعا العىسىن جاۋدىردى.
قورىتا ايتقاندا, بۇل – اۋقىمدى ىستەردىڭ العاشقى قادامى. ەندىگى كەزەكتە جول ماسەلەسى شەشىلىپ, اۋىل جاققا ساپالى ينتەرنەت تارتىلسا دەگەن تىلەك بار.