دەنساۋلىق ساقتاۋ مينيسترلىگىندە ەلباسىنىڭ تاپسىرماسىمەن ازىرلەنگەن رەسپۋبليكادا ونكولوگيالىق كومەكتى دامىتۋ باعدارلاماسىن ىسكە اسىرۋدىڭ بىرجىلدىق قورىتىندىسى شىعارىلۋىنا ارنالعان وتىرىس ءوتتى. وعان دەنساۋلىق ساقتاۋ ۆيتسە-ءمينيسترى ەرىك ءبايجۇنىسوۆ, ەلىمىزدىڭ باس ونكولوگ دارىگەرى قۋانىش نۇرعازيەۆ, استانا قالاسى ونكولوگيالىق ديسپانسەرىنىڭ باس دارىگەرى مۇحتار تولەۋتاەۆ جانە وزگە دە سالا باسشىلارى قاتىستى.
ەلىمىزدە وبىر دەرتىنەن بولاتىن ءولىم-ءجىتىم قان اينالىمى جۇيەسى سىرقاتىنان كەيىن ەكىنشى ورىندا ەكەن. جىل سايىن رەسپۋبليكامىزدا 33 مىڭ وبىر دەرتىنە شالدىققان ادامدار انىقتالسا, ولاردىڭ قاتارىندا ءبىرىنشى ورىندا ءسۇت بەزى, ودان كەيىن وكپە, اس قورىتۋ اعزالارى جانە تەرى قاتەرلى ىسىكتەرى ورىن الاتىن كورىنەدى. وسىنداي سىرقاتقا شالدىققان 145 مىڭنان استام ناۋقاستىڭ 10 مىڭى مىنا ومىردەن وتە شىعادى. ونىڭ باستى سەبەبى, ازاماتتار اۋرۋى ءۇشىنشى, ءتورتىنشى ساتىعا جەتكەندە عانا قارالادى. الدىن الۋعا بايلانىستى وبىردى ەرتە انىقتاۋعا باعىتتالعان 6 سكرينينگ ەنگىزىلگەن. ولار جاقسى ناتيجەلەر بەرۋدە, دەدى شارانى ۇيىمداستىرۋشىلار. ماماندار قازاقستاندا اتالعان دەرتتى الەمدىك ستاندارتتار دەڭگەيىندە ەمدەۋ ءۇشىن بارلىق جاعدايلار جاسالىپ جاتقانىن دا نازاردان تىس قالدىرمادى. بيىلعى جىلى 5 وڭىرارالىق جوعارى تەحنولوگيالىق ونكولوگيالىق ورتالىقتار قۇرىلماق. وندا پاتسيەنتتەردى ەمدەۋ مەن دياگنوستيكالاۋدىڭ ەڭ زاماناۋي ادىستەرى جۇزەگە اسپاق. بۇدان باسقا استانادا سۇيەك وبىرىن ەمدەۋدە ءبىراز جەتىستىكتەرگە قول جەتكەن.
سونىمەن بىرگە, استانا مەن الماتىداعى ورتالىقتاردا لەيكوزعا شالدىعىپ ەمدەلگەن بالالاردىڭ 75 پايىزى وڭ ناتيجە كورسەتكەن.
قازاقستان تولىعىمەن وبىردى ەمدەۋدىڭ حالىقارالىق ستاندارتتارىنا كوشكەنىن اتاپ وتكەنىمىز ابزال. تەك بىلتىرعى جىلدىڭ وزىندە 150 جاس مامان ەۋروپا, ازيا جانە اقش-تىڭ جەتەكشى كلينيكالارىندا ءبىلىم جەتىلدىرسە, سونداي-اق 520 مامانى ونكولوگيا جانە راديولوگيانىڭ وزەكتى ماسەلەلەرى بويىنشا تاجىريبە الماسىپ قايتقان.
سالاداعى بارلىق قىزمەتتى ءتيىمدى ۇيلەستىرۋ ءۇشىن دەنساۋلىق ساقتاۋ مينيسترلىگى جانىندا ارنايى شتاب قۇرىلىپ, ونكولوگيالىق قىزمەت بويىنشا ۇلكەن مىندەتتەر جۇكتەلگەن.
قاتەرلى دەرتتى ەرتە انىقتاۋدى ناسيحاتتاۋ ماقساتىندا اعىمداعى جىلدىڭ 1 ناۋرىزىنان 15-ىنە دەيىن ەلىمىزدىڭ بارلىق ونكولوگيالىق ورتالىقتارىندا ءاربىر ادام قاجەتتى تەكسەرۋلەردەن وتە الاتىنىن ەسكە سالا كەتسەك دەيمىز.
ءابدىراحمان قىدىربەك,
«ەگەمەن قازاقستان».