مەديتسينالىق كومەكتى قايتسە بارىنشا اشىق ءارى قولجەتىمدى ەتۋگە بولادى؟ دەنساۋلىق ساقتاۋ ءمينيسترى ساليدات قايىربەكوۆانىڭ جەتەكشىلىگىمەن وتكەن ەلباسىنىڭ «قازاقستان – 2050: ءبىر مۇددە, ءبىر ماقسات, ءبىر بولاشاق» اتتى جولداۋىنان تۋىندايتىن مىندەتتەردىڭ ورىندالۋى بارىسىن تالقىلاۋعا ارنالعان جيىندا وسى ماسەلە جان-جاقتى پىسىقتالدى.
مينيستر ءوزى باسقارىپ وتىرعان ۆەدومستۆونىڭ باستى مىندەتى – مەديتسينالىق كومەكتى باسقارۋدىڭ جانە قارجىلاندىرۋدىڭ تۇراقتى, ناقتى, تۇسىنىكتى جانە اشىق جۇيەسىن قالىپتاستىرۋ ەكەندىگىن ەرەكشە اتاپ كەتتى. سوندىقتان العا قويعان مىندەتتەر ەلباسى ستراتەگياسىندا ايقىندالعان ماقساتتارعا جەتۋگە نەگىز بولۋى, سونداي-اق, جۇيە حالىقتىڭ تالابىنا جاۋاپ بەرۋى ءتيىس. بۇل رەتتە س.قايىربەكوۆا وڭىرلەردەگى دەنساۋلىق ساقتاۋ مەكەمەلەرى مينيسترلىك ازىرلەگەن ستاندارتتار, حاتتامالار جانە الگوريتمدەر اياسىندا ساپالى مەديتسينالىق قىزمەت كورسەتۋگە مىندەتتى ەكەندىگىن قاپەرگە سالدى.
«مەن مينيسترلىكتىڭ جالاقى تولەۋ جانە باقىلاۋ كوميتەتىنە ءوز جۇيەلەرى ارقىلى مونيتورينگتى, ونىڭ ىشىندە سەنىم تەلەفوندارى ارقىلى باقىلاۋدى كۇشەيتۋدى تاپسىردىم. بارلىق نەگىزگى ارىز-شاعىمدار مەديتسينالىق ۇيىمداردىڭ رەيتينگىنە اسەر ەتىپ, ەكونوميكالىق زارداپتارعا اكەلىپ سوقتىرادى», دەدى س.قايىربەكوۆا. ءمينيستردىڭ مالىمەتىنە قاراعاندا, لەيكوزعا شالدىققان بالالاردىڭ ءومىر ءسۇرۋىن 76 پايىزعا دەيىن ۇلعايتۋعا مۇمكىندىك تۋىپ وتىر. جىلىك مايىن ترانسپلانتاتسيالاۋ تەحنولوگياسىن جانە كارديوحيرۋرگيالىق بەيىندى ايتپاعاننىڭ وزىندە, تاعى دا باسقا سالالار يگەرىلگەن.
باسقا سويلەگەندەر دە وڭ جەتىستىكتەر جونىندە اڭگىمە قوزعادى.
جالپى, دەنساۋلىق ساقتاۋ مينيسترلىگىندە وتكەن القالى جيىندا مەملەكەت باسشىسى العا قويعان مىندەتتەردى ورىنداۋ ەرەكشە نازارعا الىنعاندىعى, ءدارىگەرگە دەگەن سەنىمدى نىعايتۋعا ءجانە ەمدەۋ ساپاسىنا جاۋاپكەرشىلىك جايى كەڭىنەن ءسوز بولدى. بۇل ايتىلعانداردىڭ بارلىعى سالاداعى تابىستارعا نەگىز قالاۋى ءتيىس.
اسقار تۇراپباي ۇلى,
«ەگەمەن قازاقستان».