رەسەيدىڭ استراحان قالاسىندا دينا نۇرپەيىسوۆانىڭ 160 جىلدىق مەرەيتويىنا وراي شىعارىلعان «تۇركى الەمىنىڭ ۇلى كومپوزيتورى» كىتابىنىڭ تۇساۋكەسەرى ءوتتى, دەپ حابارلايدى Egemen.kz.
قازاقتىڭ كورنەكتى كومپوزيتورى, دومبىراشى, قازاق كسر-ءنىڭ حالىق ءارتىسى دينا نۇرپەيىسوۆانىڭ 160 جىلدىق مەرەيتويىنا ارنالعان شارا قۇرمانعازى اتىنداعى استراحان وڭىرلىك مادەنيەت ورتالىعىندا ءوتتى.
قازاق, ورىس, تۇرىك, اعىلشىن تىلدەرىندە جارىق كورگەن كىتاپتا كۇيشى ءومىرى تۋرالى بۇرىن-سوڭدى جاريالانباعان بىرەگەي دەرەكتەر قامتىلعان. ءىس-شارانى استراحانداعى قر باس كونسۋلدىعى استراحان وبلىسىنىڭ حالىقارالىق بايلانىستار اگەنتتىگى مەن مادەنيەت جانە تۋريزم مينيسترلىگىنىڭ قولداۋىمەن ۇيىمداستىردى.
تۇساۋكەسەر قوناقتارى – عالىمدار, ەتنوگرافتار مەن مۋزىكانتتاردان قۇرالعان قازاقستان دەلەگاتسياسى, جەرگىلىكتى مەملەكەتتىك ورگاندار مەن قازاق دياسپوراسىنىڭ وكىلدەرى جانە ايماق تۇرعىندارى.
جيىنعا قاتىسۋشىلار دينا نۇرپەيىسوۆانىڭ دومبىرا مۋزىكاسىنىڭ دامۋىنا جانە ونى وركەسترگە بەيىمدەۋىنە, سونداي-اق كلاسسيكالىق كۇي مەكتەبىنىڭ قالىپتاسۋىنا قوسقان ەرەكشە ۇلەسىن اتاپ ءوتتى.
ولاردىڭ ايتۋىنشا, استراحان وبلىسى كورنەكتى كومپوزيتوردىڭ ەكىنشى وتانى بولىپ سانالادى. سەبەبى, ول مۇندا 15 جىل ءومىر سۇرگەن جانە 1934 جىلى مارفينو اۋىلىنداعى وتكەن كوركەمونەرپازدار بايقاۋىندا ءبىرىنشى ورىن الدى, بۇل كۇيشىنىڭ العاشقى جەڭىسى بولاتىن.
مەرەكەلىك شارانىڭ جالعاسى رەتىندە 26 قاراشادا قازاقستان رەسپۋبليكاسىنىڭ ەڭبەك سىڭىرگەن ءارتىسى ايگۇل ۇلكەنباەۆا استراحان مادەنيەت جانە ونەر كوللەدجىندە دومبىرادا شەبەرلىك ساباعىن وتكىزەدى.