«نۇر وتان» پارتياسىنىڭ توراعاسى ن.ءا.نازارباەۆتىڭ پارتيانىڭ قۇرىلعانىنا 15 جىل تولۋىنا وراي قۇتتىقتاۋى

قىمباتتى مەنىڭ ارىپتەستەرىم! قۇرمەتتى قازاقستاندىقتار! بارشا نۇروتاندىقتار مەن «نۇر وتان» پارتياسى جاق­تاۋ­شىلارىن ونىڭ قۇرىلۋىنىڭ 15 جىلدىعىمەن شىن جۇرەكتەن قۇتتىقتايمىن! بۇل – كەزەكتى تاريحي مەجە عانا ەمەس, تاۋەلسىز قازاقستان جىلناماسىنىڭ ماڭىزدى بەلەسى. ءبىزدىڭ پارتيامىز – «نۇر وتان» پارتياسى جاۋاپتى ساياسي كۇش رەتىندە بارلىق قيىندىقتار مەن سىناقتاردى حالىقپەن بىرگە ءبولىسىپ, ارقاشان ەلىمىز ءۇشىن كۇردەلى ءارى ومىرلىك ماڭىزى بار شەشىمدەر قابىلدادى جانە ولاردىڭ ورىندالۋىنا ءاردايىم قول جەتكىزىپ وتىردى. ەلىمىزدىڭ جەتىستىكتەرى ءجۇز­دەگەن مىڭ پارتيالاستاردىڭ ەڭ­بەك­قورلىعىمەن, سونداي-اق, ءبىزدىڭ پارتيالىق باعدار­لا­مالارىمىزدى قولدايتىن, جال­پىۇلتتىق جانە جەرگىلىكتى سايلاۋلاردا پارتيا كان­ديداتتارىنا داۋ­ىس بەرەتىن قازاق­­ستان­دىقتاردىڭ باسىم كوپشى­لىگىنىڭ جوعارى سەنىمىمەن تىعىز بايلانىستى. تاۋەلسىزدىك جىلدارىندا قو­عامىمىزدىڭ بارشا قازاق­ستان­دىقتاردى بىرىكتىرەتىن جانە ەلدىڭ باياندى بولاشاعىنا بەرىك ىرگەتاس قالايتىن باستى قۇندىلىقتارى قالىپتاستى. ولار «ماڭگىلىك ەل» جالپىۇلتتىق يدەياسىنىڭ نە­گىزىنە اينالىپ, «نۇر وتان» پار­تياسىنىڭ جاڭا ساياسي دوكتريناسىندا بەكىتىلدى. پارتيا مەن ونىڭ بارلىق جاقتاستارىنىڭ كۇش-جىگەرى ولاردى ءارى قاراي نى­عايتۋعا باعىتتالۋعا ءتيىس. «2050 ستراتەگياسىن» جاريالاي وتىرىپ, قازاقستان الەمنىڭ ەڭ دامىعان 30 ەلىنىڭ قاتارىنا كىرۋ جولىنا قادام باستى. بارلىق نۇروتاندىقتاردىڭ باستى مىندەتى – حالقىمىزدىڭ بىرلىگىن بەكەمدەۋ, ءوزىنىڭ ساياسي كوشباسشىلىعىن كۇندەلىكتى ىستە دالەلدەۋ, ەكونوميكانى, مەملەكەتتى جانە قوعام ءومى­رى­نىڭ بارلىق باعىتتارىن جاڭ­عىر­تۋدىڭ تاعدىرلى ۇدەرىس­تەرىنىڭ باسىندا بولۋ. پارتيا ارقاشان باسقارۋدىڭ ءتيىمدى مودەلىنىڭ, جاڭارۋعا داي­ىن بولۋدىڭ, ۇتقىرلىقتىڭ, جان-ءتانى­مەن بەرىلۋدىڭ ۇلگىسى بولۋعا ءتيىس. پارتيا مەرەيتويىندا مەن بۇگىن بارشا ارىپتەستەرىمە پار­تيا­نىڭ قالىپتاسۋىنا, ونىڭ  وتانىمىز­دىڭ وركەندەۋى جو­لىن­داعى جۇمىسىنا قوس­قان ۇلەس­تەرى ءۇشىن شىنايى العى­سىم­دى بىلدىرەمىن! بارلىق پارتيا مۇشەلەرى مەن بارشا قازاقستاندىقتارعا تاتۋلىق پەن باق-بەرەكە ءجا­نە وتانىمىز – قازاقستان رەسپۋب­لي­كاسىنىڭ ۇلى بولاشاعى جولىندا بارلىق يگى ماقساتتارعا قول جەتكىزۋلەرىن تىلەيمىن! نۇرسۇلتان نازارباەۆ.