ەلباسى نۇرسۇلتان نازارباەۆ ەلوردادا ءوتىپ جاتقان «تاۋەلسىزدىك ۇرپاقتارى» اتتى رەسپۋبليكالىق جاستار فورۋمىنا ۇندەۋ جولدادى, دەپ حابارلايدى Egemen.kz.
«بۇگىن بارشامىز ءۇشىن ەرەكشە كۇن. تاۋەلسىزدىكتىڭ تورقالى تويى قارساڭىندا ەلىمىزدىڭ ءبىلىمدى, بىلىكتى, ىسكەر دە بەلسەندى جاستارى رەسپۋبليكالىق فورۋمدا باس قوسىپ وتىر. بارشاڭىزدى تاۋەلسىزدىكتىڭ 30 جىلدىق مەرەيتويىمەن شىن جۇرەگىمنەن قۇتتىقتايمىن», دەگەن ەلباسى تاۋەلسىزدىك ءتاڭىردىڭ بۇگىنگى ۇرپاققا بەرگەن باعا جەتپەس ۇلكەن سىيى ەكەنىن اتادى.
«30 جىل – حالقىمىز ءۇشىن تاريحي بەلەس. ءبىز وسى ۋاقىت ىشىندە اتا-بابامىزدىڭ اسىل ارمانىن ورىنداپ قانا قويماي, ونى باياندى ەتە بىلدىك. قازاقستاندى الەم تانىعان, جاھان مويىنداعان ىرگەلى مەملەكەتكە اينالدىردىق. بۇل – بارشا حالقىمىزدىڭ ورتاق جەڭىسى. مەن قازاقستاندى تاۋەلسىز مەملەكەت دەپ جاريالاعان تۇستا ەلىمنىڭ كەلەشەگى جارقىن, حالقى باقۋاتتى, جاستارى باقىتتى بولسىن دەپ ارماندادىم. وسكەلەڭ ۇرپاقتىڭ ساپالى ءبىلىم الىپ, لايىقتى ءومىر ءسۇرۋى جولىندا ايانباي ەڭبەك ەتتىم. بۇگىندە سول ارمانىم ورىندالىپ وتىر. تاۋەلسىزدىك جىلدارى ءبىز دامىعان ەلدەرمەن تەرەزەسى تەڭ, باسەكەگە قابىلەتتى جاڭا بۋىن تاريبەلەدىك», دەدى نۇرسۇلتان نازارباەۆ قازاقستان جاستارىنا.