وبلىس ورتالىعىنداعى «كوكشەتاۋ» مادەنيەت سارايىندا وبلىستىق اكىمدىكتىڭ ۇيىمداستىرۋىمەن ايگىلى ءانشى قاجىباي ءجاحيننىڭ قۇرمەتىنە «ارقانىڭ ايبوزى» اتتى ءبىرىنشى رەسپۋبليكالىق ءداستۇرلى ءان بايقاۋى وتكىزىلدى.
ولەڭ قونىپ, ءان ۇشقان ولكەدەگى اق تۇيەنىڭ قارنى جارىلعان كۇن بولدى بۇل! وتكەن جىلى مەزگىلسىز ومىردەن وتكەن كەشەگى اقان سەرى, ءبىرجان سال, ۇكىلى ىبىرايلاردىڭ جولىن قۋعان, ىلكىدەن جالعاسىپ كەلە جاتقان ساف ونەردىڭ تىنىسىن اشىپ, شىڭ باسىنا شىعارۋعا ۇمتىلعان قاجىباي بادىق ۇلىنىڭ ەسىمىن ەل ەسىندە تاعى ءبىر جاڭعىرتۋ ارقىلى ارقانىڭ انشىلىك ءداستۇرى ساتىمەن ساباقتالدى. جامان تۇماۋ جايلاعالى بويكۇيەز بولىپ قالعان انشىلەر قاۋىمى ءبىر جەلپىنىپ, كۇنى كەشە «قۇلاقتان كىرىپ بويدى الار» انىمەن تەربەتكەن تۋما تالانت قاجىبايىن ەسىنە الىپ, مەزگىلسىز ومىردەن وتكەنىنە كۇيزەلدى. تۋعان ەلىنىڭ تاعزىمىنا رازى بولىپ, ەڭسەسىن تىكتەدى.
ءبىرىنشى رەسپۋبليكالىق ءداستۇرلى انشىلەر بايقاۋىندا قاراعاندى, سولتۇستىك قازاقستان, شىعىس قازاقستان, پاۆلودار, اقمولا وبلىستارىمەن قاتار, نۇر-سۇلتان, الماتى, شىمكەنت قالالارىنىڭ وكىلدەرى ونەر كورسەتىپ, ۇزىن-ىرعاسى جيىرمادان استام ءانشى باق سىنادى.
ءداستۇرلى ءاننىڭ مەرەيىن اسىرىپ جۇرگەن ءان ساڭلاقتارى ونەرىمەن شۋاق شاشقان گالا-كونتسەرتتىڭ شىمىلدىعى اقىن قۋانىش وسپانوۆتىڭ «ارقانىڭ ايبوزى» اتتى پوەماسىنىڭ جەلىسىندە قويىلعان پرولوگپەن باستالدى. تالاي ءان دوداسىندا ونەرىمەن ەل قۇرمەتىنە بولەنىپ جۇرگەن جەزتاڭداي انشىلەر بىرىنەن سوڭ ءبىرى شىعىپ, كوكشەتاۋ اسپانىن اسقاق اندەرىمەن تەربەتتى. رەسپۋبليكالىق انشىلەر بايقاۋىنىڭ لاۋرەاتى باۋىرجان نۇرماحان «ايتپاي» ءانىن ورىنداپ, وزىندىك مانەرىمەن, اسقاق داۋسىمەن تىڭدارمان قاۋىمدى ءتانتى ەتتى. نۇر-سۇلتان قالاسىنىڭ قوس ءداستۇرلى ءانشىسى الۋا قالىمبەكوۆا مەن وزگەرىس شەرىكبايدىڭ ورىنداۋ شەبەرلىگى دە كوپ كوڭىلىنەن شىقتى.
قاجىبايدىڭ كۋرستاسى, قازاقستان رەسپۋبليكاسىنىڭ ەڭبەك سىڭىرگەن ءارتىسى رامازان ستامعازيەۆ, الاشتىڭ بەلگىلى ءداستۇرلى ءانشىسى ەركىن شۇكىمان باستاعان قازىلار القاسىنىڭ ۇيعارىمى بويىنشا سولتۇستىك قازاقستان وبلىسىنىڭ ءانشىسى ەركەبۇلان قارىپوۆ ءۇشىنشى ورىنعا يە بولسا, ەكىنشى ورىنعا نۇر-سۇلتان قالاسىنان كەلگەن وزگەرىس شەرىكباي يە بولدى. ءبىرىنشى ورىنعا استانالىق الۋا قالىمبەكوۆا كوتەرىلدى. ال باس جۇلدە كوكشەتاۋلىق ءداستۇرلى ءانشى باۋىرجان نۇرماحانعا بۇيىردى. جۇزدەن جۇيرىك اتانعان باۋىرجانعا ارنايى ديپلوم مەن اۆتوكولىك تابىس ەتىلسە, كوپ كوڭىلىنەن شىققان انشىلەردىڭ ءبارى قوماقتى سىيلىققا يە بولدى.
شارا بارىسىندا ءانشى تۋرالى تاياۋدا عانا جارىق كورگەن «كوكشەنىڭ ايبوزى» ەستەلىكتەر جيناعىنىڭ تۇساۋكەسەرى وتكىزىلدى. جيناقتا ءانشىنىڭ ۇزەڭگى جولداستارىنىڭ, ەل اعالارىنىڭ, ونەرىنە ءتانتى بولعان تىڭدارمان قاۋىمنىڭ جىلى ەستەلىكتەرى توپتاستىرىلعان.
ەكى كۇن بويى كوكشەنىڭ كوگىلدىر اسپانى ءان لەبىمەن جەلپىنىپ, ءارى-بەرى كوشكەندەي بولدى. تىڭدارمان قاۋىم تابيعي تالانت يەسىنە كورسەتىلگەن زور قۇرمەتكە شىن كوڭىلدەن رازى بولدى.
كوكشەتاۋ