2025 جىلعا قاراي ەلىمىزدە 22 مىڭ نىسان مۇگەدەكتى جانداردىڭ كىرىپ-شىعۋىنا ىڭعايلى بولادى. بۇل جايىندا قر ەڭبەك جانە حالىقتى الەۋمەتتىك قورعاۋ مينيسترلىگى ەڭبەك, الەۋمەتتىك قورعاۋ جانە كوشى-قون كوميتەتى توراعاسىنىڭ ورىنباسارى انارحان دۇيسەنوۆا ايتتى, دەپ حابارلايدى Egemen.kz.
ونىڭ ايتۋىنشا, بۇگىنگى تاڭدا «مۇگەدەك ادامداردى الەۋمەتتىك قورعاۋ» اقپاراتتىق پورتالىندا (inva.gov.kz) وڭىرلەر تۇرعىسىندا نىسانداردىڭ قولجەتىمدىلىگى كارتاسى جۇمىس ىستەپ تۇر. وندا ەل بويىنشا 35 مىڭنان استام الەۋمەتتىك ينفراقۇرىلىم نىساندارىنىڭ مۇگەدەك جاندارعا بەيىمدەلۋى تۋرالى مالىمەتتەر قامتىلعان. اتالعان نىساندار قولجەتىمدىلىكتىڭ 3 ساناتىنا بولىنگەن: قولجەتىمدى, ءىشىنارا قولجەتىمدى, قولجەتىمدى ەمەس. قولجەتىمدىلىك مۇگەدەكتىگى بار 4 ساناتىنا قاتىستى قاراستىرىلعان.
اتاپ ايتقاندا, ادام اعزاسى فۋنكتسيالارىنىڭ بۇزىلۋ سيپاتى, ەستۋ, كورۋ, تىرەك-قيمىل اپپاراتى بۇزىلعان ادامدار جانە تەك كرەسلو-اربالارمەن ءجۇرىپ-تۇرۋ مۇمكىندىگى بار ادامدارعا ەسكەرىلگەن.
«2025 جىلعا دەيىنگى كەزەڭدە 22 مىڭ نىسان ەڭ باسىم بولىپ بەلگىلەندى. بۇل ءبىرىنشى كەزەكتە - مەملەكەتتىك مەكەمەلەر, حقكو, ەمحانالار, دەنساۋلىق ساقتاۋ, ءبىلىم بەرۋ, مادەنيەت جانە سپورت نىساندارى سياقتى مۇگەدەكتىگى بار ادامدار ءجيى باراتىن نىساندار», دەدى انارحان دۇيسەنوۆا ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.