تۇڭعىش پرەزيدەنت كۇنى قارساڭىندا پارلامەنت ءماجىلىسىنىڭ ۇيىمداستىرۋىمەن وتكەن «ەلباسى. تاۋەلسىزدىك. پارلامەنت» اتتى حالىقارالىق كونفەرەنتسياسى شەڭبەرىندە پالاتا توراعاسى نۇرلان نىعماتۋلين ەكىجاقتى كەزدەسۋلەر وتكىزدى, دەپ حابارلايدى Egemen.kz.
ازەربايجان رەسپۋبليكاسى ميللي مەجليسى توراعاسىنىڭ ورىنباسارى اديل اليەۆپەن جۇزدەسۋدە پارلامەنتارالىق ىنتىماقتاستىقتى نىعايتۋ ماسەلەلەرى اڭگىمە وزەگىنە اينالىپ, باۋىرلاس ەلدەر تۋىستىعىنىڭ ورتاق ۇستانىمدارى جان-جاقتى تالقىلاندى.
ودان ءارى ءماجىلىس توراعاسى نۇرلان نىعماتۋلين تۇركيا رەسپۋبليكاسى ۇلى ۇلتتىق جينالىسى توراعاسىنىڭ ورىنباسارى سيۋرەيا بيلگيچپەن كەزدەستى. وندا پالاتا سپيكەرى ءبىزدىڭ ەلدەرىمىزدىڭ باسشىلىعىنىڭ اراسىنداعى ءوزارا تۇسىنىستىك پەن دوستىق نەگىزىندەگى بىرلەسكەن جۇمىستاردىڭ ناتيجەسىندە قازاقستان جانە تۇركيا ۇلكەن تابىستارعا قول جەتكىزگەنىن اتاپ ءوتتى. سونىمەن قاتار, تۇركى تىلدەس مەملەكەتتەرىنىڭ باسشىلارىنىڭ قاتىسۋىمەن سامميت وتكەنىن, باسقوسۋ تۇركى الەمى ءۇشىن ماڭىزى زور ءسات بولىپ, سامميت قورىتىندىسى بويىنشا ۇيىم اتاۋىن «تۇركى مەملەكەتتەرىنىڭ ۇيىمى» دەپ وزگەرتۋ تۋرالى تاريحي شەشىم قابىلدانعانىنا نازار اۋداردى.
نۇرلان نىعماتۋليننىڭ ايتۋىنشا, بۇل باۋىرلاس مەملەكەتتەر اراسىنداعى بايلانىستاردى ودان ءارى تەرەڭدەتىپ, تۇركى الەمىنىڭ بىرلىگىن نىعايتۋعا باعىتتالعان جۇمىستاردى تۇركى ەلدەر پارلامەنتتىك اسسامبلەياسى اياسىندا ودان ءارى بەلسەندى جالعاستىراتىن بولادى.
ودان بولەك, وزبەكستان ولي ءماجليسى زاڭ شىعارۋ پالاتاسى توراعاسىنىڭ ورىنباسارى وديلجون توجيەۆپەن, رەسەي فەدەرالدىق جينالىسى مەملەكەتتىك دۋماسىنىڭ كوميتەت توراعاسى لەونيد كالاشنيكوۆپەن كەزدەسۋدە ەلدەرىمىز پارلامەنتشىلەرىنىڭ تۇراقتى كەزدەسۋلەرى زاڭنامالىق تاجىريبە الماسۋعا سەرپىن بەرە وتىرىپ, حالىقتارىمىزدىڭ يگىلىگى جولىندا ءتيىمدى ءىس-قيمىل جاساۋعا جول اشاتىنىنا سەنىم ءبىلدىردى.