ەل تاۋەلسىزدىگىنىڭ 30 جىلدىعىنا وراي, بەيىمبەت مايلين اۋدانىنداعى توبىل كەنتىندە «ۇلت رۋحى» دەپ اتالاتىن تاۋەلسىزدىك اللەياسى اشىلدى. اۋدان اكىمدىگىنىڭ مالىمەتىنشە, جوبانىڭ قۇرىلىسىنا التىن مەن مىس وندىرەتىن ءىرى كاسىپورىن «ۆارۆارينسك» اكتسيونەرلىك قوعامى 16,5 ملن تەڭگەدەن استام قارجى بولگەن.
دەمالىس ورنىنا كىرەبەرىس قاقپانىڭ ماڭدايشاسىنداعى تۋ تۇستەس كوك تاقتايشادا ءىرى ارىپتەرمەن ادىپتەلگەن «ۇلت رۋحى» دەگەن جازۋ انادايدان كورىنەدى. اللەيانىڭ قاق ورتاسىندا دومبىرانىڭ ءمۇسىنى ورنالاسقان. ونىڭ اينالاسىنا قويىلعان ون ورىندىقتىڭ تورتەۋىنە كۇننىڭ كوزىنەن قۋات الاتىن پانەلدەر ورناتىلعان. مۇنداي سمارت-قۇرىلعىلار تۇرعىنداردىڭ ۇيالى تەلەفوندارىن قۋاتتاپ الۋىنا جانە WIFI جەلىسىنە قوسىلۋىنا مۇمكىندىك بەرەدى. جاڭا اللەيا ءتۇنى بويى جاپ-جارىق بولىپ تۇرادى, مۇندا ورناتىلعان 10 شاقتى باعانا شامى قاس قارايا بەرە اۆتوماتتى تۇردە قوسىلادى.
تاۋەلسىزدىك اللەياسىنىڭ اشىلۋ سالتاناتىنا جەرگىلىكتى ارداگەرلەر كەڭەسىنىڭ وكىلدەرى, اۋدان اكىمىنىڭ ورىنباسارى نازگۇل ماناسوۆا, «ۆارۆارينسك» اق-تىڭ اتقارۋشى ديرەكتورى ۆلاديمير ەفرەمەنكو, مەملەكەتتىك قىزمەتشىلەر مەن تاۋەلسىزدىك جىلى دۇنيەگە كەلگەن جاستار قاتىستى. شارا بارىسىندا اكىم ورىنباسارى توبىل تۇرعىندارىن جاڭا دەمالىس ورنىنىڭ اشىلۋىمەن قۇتتىقتاپ, توعىز جولدىڭ تورابىندا جاتقان كەنتتى اباتتاندىرۋعا ۇلەس قوسقان كاسىپكەرلەرگە العىس ايتتى.
– قاسيەتتى تاۋەلسىزدىگىمىزدىڭ 30 جىلدىعىنا وراي بۇگىن تۇرعىندار يگىلىگىنە بەرىلىپ جاتقان «ۇلت رۋحى» دەمالىس الاڭى اۋدانىمىزداعى ءىرى كاسىپورىنداردىڭ كومەگىمەن اباتتاندىرىلدى. «ەلۋ جىلدا ەل جاڭا» دەمەكشى, ەلىمىز تاۋەلسىزدىككە يە بولعان 30 جىل ىشىندە ءبىزدىڭ اۋدانىمىزدا دا كوپتەگەن يگى ءىس اتقارىلدى. اۋدانىمىزعا قازاق جازبا ادەبيەتىنىڭ باستاۋىندا تۇرعان ۇلى جازۋشى, جەرلەسىمىز ءارى ماقتانىشىمىز بەيىمبەت مايلين اتامىزدىڭ ەسىمى بەرىلگەنىنە دە كوپ بولا قويعان جوق. اۋدانىمىز كوز الدىمىزدا كوكتەپ كەلەدى. جىل سايىن جولدار جوندەلىپ, تروتۋارلار توسەلۋدە, كوپتەگەن الەۋمەتتىك جوبا جۇزەگە اسىرىلىپ جاتىر. وسىنىڭ ءبارى بىرلىگىمىز بەن ەلدىگىمىزدىڭ, تاۋەلسىزدىگىمىزدىڭ جەمىسى, – دەدى ن.ماناسوۆا.
قوستاناي وبلىسى