دزيۋدودان قازاقستان كومانداسىنىڭ مۇشەسى ەلدوس جۇماقانوۆ پەن گالبادراح وتگونتسەتسەگ سپورتتىق مانسابىن اياقتادى. بۇل تۋرالى ورالدا ءوتىپ جاتقان ەل چەمپيوناتىندا بەلگىلى بولدى, دەپ حابارلايدى Egemen.kz Olympic.kz-كە سىلتەمە جاساپ.
ەلدوس جۇماقانوۆ ۇزاق جىلدار بويى قازاقستان كومانداسىنىڭ نامىسىن ابىرويمەن قورعادى.
66 كەلى سالماقتا سىنعا تۇسكەن ول سپورتقا بەس جاسىندا قادام باسقان. وسى جىلدار ارالىعىندا ەلدوس جۇماقانوۆ اسكەريلەر اراسىنداعى الەم چەمپيونى, گران-پري ءتۋرنيرىنىڭ جەڭىمپازى (2013), اتالعان ءتۋرنيردىڭ كۇمىس جانە قولا جۇلدەگەرى (2016, 2019) اتاندى.
Masters ءتۋرنيرى (2017) مەن ەۋروپا كۋبوگىنىڭ (2015) كۇمىس جۇلدەگەرى. سونداي-اق, ەلدوستىڭ جۇلدە قورجىنىندا ازيا بىرىنشىلىگىنىڭ ءتورت مەدالى بار. ول 2015 جىلى ەل-كۋۆەيتتە, 2016 جىلى تاشكەنتتە وتكەن قۇرلىق دوداسىندا قولا جۇلدەگە قول جەتكىزسە, 2017 جىلى گونكونگ جانە 2019 جىلى فۋدجەيرادا وتكەن ازيا چەمپيوناتىندا كۇمىس مەدال تاققان.
سونىمەن قاتار, ەلدوس جۇماقانوۆ 2018 جىلى دجاكارتادا (يندونەزيا) وتكەن ازيا ويىندارىنىڭ قولا جۇلدەگەرى اتانعان.
گالبادراح وتگونتسەتسەگتىڭ سپورتتىق عۇمىرىنداعى ەڭ ءىرى جەڭىس – 2016 جىلعى ريو وليمپياداسىنىڭ قولا جۇلدەسى. 48 كەلىدە ەل نامىسىن قورعاعان گالبادراح ەكى مارتە (2017, 2018) الەم چەمپيوناتىنىڭ قولا جۇلدەگەرى اتانعان.
سونداي-اق, ازيا ويىندارى (2018) مەن ۋنيۆەرسيادادا (2017) ۇزدىك ۇشتىككە ەنىپ, 2018 جىلى تاشكەنتتە وتكەن ازيا چەمپيوناتىندا توپ جارعان.