بۇگىن قازاقستان رەسپۋبليكاسى تاۋەلسىزدىگىنىڭ 30 جىلدىعى اياسىندا جانە 1 جەلتوقسان – تۇڭعىش پرەزيدەنت كۇنىنە وراي «ەلباسى – تۇركى ينتەگراتسياسىنىڭ ارحيتەكتورى» اتتى تۇركىتىلدەس ەلدەر جac عالىمدارىنىڭ حالىقارالىق عىلىمي-پراكتيكالىق ونلاين كونفەرەنتسياسى ءوتتى, دەپ جازادى Egemen.kz.
حالىقارالىق تۇركى اكادەمياسى قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگىمەن بىرلەسىپ ۇيىمداستىرعان القالى جيىنعا تۇركى اكادەمياسىنىڭ پرەزيدەنتى دارحان قىدىرالى, اقپارات جانە قوعامدىق دامۋ ءمينيسترىنىڭ ورىنباسارى اسقار وماروۆ, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پرەزيدەنتى جانار تەمىربەكوۆا, نۇرسۇلتان نازارباەۆ قورى اتقارۋشى ديرەكتورىنىڭ ورىنباسارى الكەي مارعۇلان ۇلى, بوزوك ۋنيۆەرسيتەتىنىڭ پروفەسسورى, اكىمشىلىك جانە ەكونوميكا عىلىمدارى فاكۋلتەتىنىڭ دەكانى كۋرشاد زورلۋ, سونىمەن قاتار قازاقستان, ازەربايجان, تۇركيا, تاتارستان (رەسەي فەدەراتسياسى), باشقۇرتستان (رەسەي فەدەراتسياسى), قىرعىزستان, وزبەكستان, موڭعوليا ەلدەرىنىڭ تانىمال جاس عالىمدارى قاتىستى.
كونفەرەنتسيانىڭ اشىلۋىندا ءسوز العان اكادەميا باسشىسى دارحان قىدىرالى قازاقستان رەسپۋبليكاسىنىڭ تۇڭعىش پرەزيدەنتى ̶ ەلباسى ن.نازارباەۆتىڭ ازاتتىقتىڭ ارايلى تاڭىنان باستاپ بۇگىنگە دەيىن تۇركى ينتەگراتسياسىنىڭ ىرگەسىن بەرىك قالاپ, باياندى باستامالاردى جۇزەگە اسىرعانىنا توقتالدى.
ءوز كەزەگىندە قازاقستان رەسپۋبليكاسى اقپارات جانە قوعامدىق دامۋ ۆيتسە-ءمينيسترى اسقار وماروۆ ەلباسىنىڭ تۇركى بىرلىگىن نىعايتۋعا ايرىقشا نازار اۋدارعانى جانە باۋىرلاستىق بايلانىستاردى دامىتا وتىرىپ, قۋاتتى ايماقتىق ستراتەگيانى قالىپتاستىرۋداعى ەرەكشە ءرولىن اتاپ ءوتتى.
جيىندا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پرەزيدەنتى ج.تەمىربەكوۆا ەلباسىنىڭ تۇركىستاندا ىرگەلى ءبىلىم ورداسىن قۇرۋداعى ەڭبەگىنە توقتالسا, پروفەسسور كۋرشاد زورلۋ ن. نازارباەۆتىڭ تۇركى ىنتىماقتاستىعىن قالىپتاستىرۋداعى دارا جولىن تۇجىرىمداپ بەردى.
القالى جيىنننىڭ پلەنارلىق وتىرىسىن حالىقارالىق تۇركى اكادەمياسىنىڭ ۆيتسە-پرەزيدەنتى فۋزۋلي مادجيدلي جۇرگىزىپ وتىردى.
سونىمەن قاتار, القالى جيىندا ن.نازارباەۆ قورى جانىنداعى الەم ەكونوميكاسى مەن ساياساتى ينستيتۋتىنىڭ ديرەكتورى ەرجان سالتىباەۆ, باكۋ مەملەكەتتىك ۋنيۆەرسيتەتى جۋرناليستيكا فاكۋلتەتىنىڭ دەكانى ۆۋگار اليەۆ, وزبەكستان عىلىم اكادەمياسى ارحەولوگيا ۇلتتىق ورتالىعىنىڭ ديرەكتورى فارحاد ماكسۋدوۆ, ICOMOS ۇلتتىق كوميتەتىنىڭ ۆيتسە-پرەزيدەنتى, قازان ۋنيۆەرسيتەتى حالىقارالىق قاتىناستار ينستيتۋتى ديرەكتورىنىڭ ورىنباسارى رافاەل ۆالەەۆ جانە قىرعىزستاندىق جاس عالىم نۋردين ۋسەەۆ پلەنارلىق وتىرىس اياسىندا مازمۇندى باياندامالار جاساپ, قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆتىڭ باۋىرلاستىق بايلانىستاردىڭ نەگىزىن سالىپ, ينتەگراتسيالىق ۇيىمداردى قۇرۋ باستامالارى تۋرالى پايىمدى پىكىرلەرىمەن ءبولىستى.
بۇدان كەيىن كونفەرەنتسيا «عىلىم جانە ءبىلىم», «ەكونوميكا جانە ترانزيت», «تۇركولوگيا» تاقىرىپتارىنداعى سەكتسيالىق وتىرىستارعا جالعاستى.