مەملەكەت باسشىسى نۇرسۇلتان نازارباەۆ «بومباردەر» كومپانياسىنىڭ پرەزيدەنتى پەر بودۋەندى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا كومپانيانىڭ قازاقستانداعى قىزمەتىنىڭ پەرسپەكتيۆالارى, اتاپ ايتقاندا, ەلدەگى كولىك قىزمەتىنىڭ اياسىن كەڭەيتۋ جايى تالقىلاندى.
مەملەكەت باسشىسى داۆوستاعى دۇنيەجۇزىلىك ەكونوميكالىق فورۋم اياسىنداعى سوڭعى كەزدەسۋدەن كەيىن كولىك سالاسىندا تىعىز ىنتىماقتاستىق ورناتۋ جونىندە قازىردىڭ وزىندە ناقتى جۇمىس ءجۇرگىزىلگەنىن اتاپ ءوتتى.
– ءبىز «بومباردەر» ءتارىزدى بەلگىلى كومپانيانىڭ قازاقستان نارىعىنا كەلۋىنە مۇددەلىمىز. وسىعان بايلانىستى تاعى ءبىر وتاندىق «ەير قازاقستان» اۋە جولى كومپانياسىن قۇرۋدى جوسپارلاپ وتىرمىز, ول باستاپقى كەزەڭدە ىشكى رەيستەردى اتقاراتىن بولادى. وزدەرىڭىز بىلەتىندەي, ءبىز سونداي-اق BAE Systems كومپانياسىمەن بىرلەسىپ, «ەير استانا» اۋە جولى كومپانياسىن قۇردىق. باسقارۋدىڭ وسى تاجىريبەسىن جاڭا كومپانيا قۇرۋ كەزىندە دە پايدالانۋعا بولادى. اۆياتسيا سالاسىنداعى ىنتىماقتاستىقپەن قاتار, ءبىز ءۇشىن كولىك سالاسىنىڭ وزگە سەكتورلارىنداعى جوبالار دا قىزىقتى. بۇدان بولەك وتاندىق ۇشقىشتار جانە ەلىمىزدەگى تەحنيكالىق قىزمەت كورسەتۋ ورتالىقتارىنا ماماندار دايارلاۋ سالاسىنداعى ىنتىماقتاستىق اسا ماڭىزدى, – دەدى نۇرسۇلتان نازارباەۆ.
قازاقستان پرەزيدەنتى مەيلىنشە تىعىز ىنتىماقتاستىق ءۇشىن رەسپۋبليكامىزدا كومپانيا وكىلدىگىن اشۋ جانە بىرلەسكەن قىزمەتتى وڭىرلىك دەڭگەيگە كوشىرۋ قاجەتتىگىنە توقتالدى.
«بومباردەر» كومپانياسىنىڭ باسشىسى بۇل كەزدەسۋدىڭ كولىك سالاسىنداعى ءتۇرلى باعىتتارداعى ىنتىماقتاستىقتى ودان ءارى دامىتۋ ءۇشىن ماڭىزدى ەكەنىن ايتتى.
– ءبىز كولىك قىزمەتىنىڭ ساپاسىن ارتتىرۋ جانە جالپى قازاقستاننىڭ كولىك سالاسىن دامىتۋ ءۇشىن ءبىرلەسە جۇمىس ىستەۋگە دايىنبىز. اۆياتسيالىق تەحنيكانى جەتكىزۋ – بىرلەسكەن قىزمەتىمىزدىڭ شاعىن عانا بولىگى ەكەنىنە سەندىرگىم كەلەدى. ءبىز ءوز تەحنولوگيالارىمىزدى ەنگىزۋدى ءارى مول تاجىريبەمىزدى قولدانۋدى دا جوسپارلاپ وتىرمىز. بۇعان قوسا, قازاقستاننىڭ ۇشقىشتارىن وقىتىپ, ۇشاقتارعا قىزمەت كورسەتەتىن سەرۆيستىك ورتالىقتار قۇرىپ, وسى ارقىلى قازاقستانمەن ۇزاق مەرزىمدى پەرسپەكتيۆادا جۇمىس جۇرگىزەتىن بولامىز, – دەدى پ.بودۋەن.