«ءبىر جەتىمنىڭ ماڭدايىن سيپاعانعا جۇماقتىڭ جەتى قاقپاسى اشىلادى» دەگەن ءسوز بار. «جەتىم كورسەڭ, جەبەي ءجۇر» دەيدى قازاق. جەتىمدىك – تاعدىردىڭ جازۋى. ونى ەشكىم سۇراپ المايدى. پەشەنەسىنە سولاي بەرىلەدى. قوعام تاسباۋىرلانىپ بارا جاتقان مىنا زاماندا جەتىمدەردىڭ سانى كوبەيمەسە, ازايماي تۇرعانى وكىنىشتى. كوكەك انا مەن جاۋاپكەرشىلىكتەن ادا اكەنىڭ ويسىز ارەكەتتەرى تالاي بالانىڭ كوزىن جاۋدىرەتىپ, جەتىمدىكتىڭ قامىتىن جاستايىنان كيۋگە ماجبۇرلەپ وتىر. ومىرگە جاراتۋشىنىڭ ىقتيارىمەن كەلگەن شاقالاقتىڭ ەشقانداي جازىعى جوق بولسا دا, تاعدىردىڭ وسىنداي تالقىسىنا تۇسەدى.
اكەنىڭ اقىلىن, شەشەنىڭ ايالى الاقانىن سەزىنبەگەن بالادان ءبىر جىلىلىق كۇتۋدىڭ ءوزى ابەستىك شىعار-اۋ. سوندىقتان اتا مەن انانىڭ ءرولىن بۇل تۇرعىدا مەملەكەت اتقارادى. ءوسىرەدى, تاربيەلەيدى, وقىتادى, جەتىلدىرەدى. مۇنىڭ ءبارى دۇرىس. دەي تۇرعانمەن, ولاردىڭ قوعامدا ءوز ورنىن تابۋى ەڭ ماڭىزدى ماسەلە. ورتا مەكتەپتەن سوڭ جوعارى ءبىلىم الىپ, ءبىر سالاعا ماماندانىپ, وتباسىن قۇرىپ, وسى قوعامنىڭ تولىققاندى ازاماتى رەتىندە قالىپتاسۋىنا دەيىن كوپ تىرشىلىك اتقارۋدىڭ كەرەكتىگى انىق. سوندىقتان مەملەكەت اتا-انا قامقورلىعىنان ەرتە قالعان جاستارعا ۇدايى كوڭىل ءبولىپ وتىرادى. ءبىز بۇرناعى كۇنى سونداي ءبىر اسەرلى كورىنىستىڭ كۋاسى بولدىق. قىزىلوردا وبلىسىنىڭ اكىمى قىرىمبەك كوشەرباەۆ جەتىم قالعان 17 بالاعا باسپانا كىلتىن بەردى.
– ءبىز دە قاتتى تولقىپ وتىرمىز. تاعدىردىڭ جازۋىمەن اتا-اناسىز وستىڭىزدەر. تالاي قيىنشىلىقتى باستان وتكەردىڭىزدەر. بىراق سىزدەردى قاناتتىعا قاقتىرمايتىن, تۇمسىقتىعا شوقىتتىرمايتىن تاۋەلسىز ەلىمىز بار. اكەلىك قامقورلىعىن ايامايتىن ەلباسىمىز بار. سوندىقتان ارقايسىلارىڭىزدىڭ ويعا العان ارماننىڭ ورىندالاتىنىنا سەنەمىن. بۇگىنگى كەزدەسۋىمىز دە سونىڭ دالەلى, – دەدى قىرىمبەك ەلەۋ ۇلى.
اتالعان يگى باستاما «جۇمىسپەن قامتۋ-2020» باعدارلاماسىنىڭ شەڭبەرىندە ىسكە اسقان. وسىدان-اق باعدارلامانىڭ جەمىستى جۇمىس ىستەپ جاتقانىن كورۋگە بولاتىن شىعار.
ون جەتى بالا. ون جەتى تاعدىر. ون جەتى بولاشاق. مىنە, جىل باسىندا وسىنشا جاستىڭ ءۇمىت شىراعى لاۋلاپ جاندى. ونى ءبىز جاستاردىڭ جانارىنان انىق كوردىك. جەتىم قالعان جاستارعا پاتەر كىلتىن تاپسىرۋ راسىمىندە ءسوز العان ريمما تۇرىشەۆا تەبىرەنە سويلەدى.
– ءبىز اتا-انانىڭ جىلۋىن سەزىنبەي وسسەك تە, تۋعان ەلىمىزدىڭ قامقورلىعىن ۇدايى كورىپ كەلەمىز. ءوزىم «اقمەشىت» گۋمانيتارلى-تەحنيكالىق ينستيتۋتىن ەسەپ جانە بۋحگالتەر ماماندىعى بويىنشا اياقتادىم. №136 ورتا مەكتەپكە ماماندىعىم بويىنشا جۇمىسقا ورنالاستىم. جاقىندا وتباسىمىزدا ءۇشىنشى ءسابيىمىز ومىرگە كەلمەك. مىنە, وسىنداي قۋانىشقا بارلىق وتباسىممەن كەلىپ وتىرمىن. جەكە پاتەر الىپ وتىرمىز. بۇدان ارتىق قانداي باقىت كەرەك؟! ءبىزدى كۇرەسىنگە تۇسكەن تاعدىرىمىزعا كۇرسىنىس ارالاستىرماي, قايتا بارىنشا قولداپ-قورعاپ كەلە جاتقان ەلباسىمىزعا ايتار العىسىمىز شەكسىز,– دەدى ول.
جەتىمدىكتىڭ زاردابىن ەندى ەشكىم تارتپاسىن دەپ تىلەيىك.
ەرجان بايتىلەس,
«ەگەمەن قازاقستان».
قىزىلوردا.