سەمەيدە 54 ميلليون تەڭگەنىڭ زاڭسىز تەمەكى ءونىمى تاركىلەندى, دەپ حابارلايدى Egemen.kz قارجىلىق مونيتورينگ اگەنتتىگىنە سىلتەمە جاساپ.
شىعىس قازاقستان وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرلەرى سەمەي قالاسىندا تەمەكى ءونىمىن زاڭسىز وتكىزۋدى انىقتادى.
ء«ىس فيگۋرانتتارىنا تيەسىلى ساۋدا ورىندارى, قويمالار, ماشينالاردا جۇرگىزىلگەن ءتىنتۋ ناتيجەسىندە ءتۇرلى اتاۋداعى اكتسيزدىك ماركاسىز 116 مىڭنان استام تەمەكى تاركىلەندى. جۇرگىزىلگەن ساراپتاماعا سايكەس تەمەكى ءونىمىنىڭ قۇنى 54 ميلليون تەڭگەگە باعالانادى», دەلىنگەن حابارلامادا.
اتالعان فاكتى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. ۆەدومستۆونىڭ مالىمدەۋىنشە, تەمەكى ونىمدەرىنىڭ زاڭسىز نارىعى ۇلتتىق دەڭگەيدە قاۋىپ. بۇل ساپاسىز تاۋار نەمەسە سالىق تولەمەۋ عانا ەمەس, سونىمەن بىرگە قوعام مەن مەملەكەتكە ايتارلىقتاي قاتەر توندىرەدى.
بىرىنشىدەن, بۇل قىلمىس دەڭگەيىنىڭ ءوسۋى جانە كريمينوگەندىك جاعدايدىڭ ناشارلاۋى.
ەكىنشىدەن, كونترافاكت تەمەكى قوعامدىق دەنساۋلىققا, اسىرەسە جاس ۇرپاققا تىكەلەي قاۋىپ توندىرەدى.
ۇشىنشىدەن, الەمدە جىل سايىن شامامەن 400 ميلليارد زاڭسىز تەمەكى ساتىلادى.
تەمەكى ءونىمىنىڭ زاڭسىز نارىعىنىڭ الەمدىك اۋقىمى كولەڭكەلى سەكتوردىڭ دامۋىنا ىقپال ەتىپ قانا قويماي, تۇتاستاي العاندا ەكونوميكاعا زارداپ تيگىزەدى.