2022 جىلى رەسپۋبليكالىق بيۋدجەت شىعىستارى 15,9 ترلن تەڭگە بولادى. بۇل تۋرالى سەناتتىڭ جالپى وتىرىسىندا قر ۇلتتىق ەكونوميكا ءمينيسترى اسەت ەرعاليەۆ ايتتى, دەپ حابارلايدى Egemen.kz.
«بيۋدجەت تاپشىلىعى جالپى ىشكى ونىمگە قاتىستى 2022 جىلى 3,3 پايىز دەڭگەيىندە, كەيىننەن 2024 جىلى 2,5 پايىزعا دەيىن تومەندەۋمەن بولجانۋدا. ورتا مەرزىمدى كەزەڭدە كونترتسيكلدىق ساياسات اياسىندا مۇناي ەمەس بيۋدجەت تاپشىلىعى دەڭگەيىن جالپى ىشكى ونىمگە قاتىستى 2022 جىلى 8,1 پايىزدان 2024 جىلى 6,3 پايىزعا دەيىن تومەندەيدى», دەدى «الەۋمەتتىك-ەكونوميكالىق دامۋ بولجامى» جانە «ۇلتتىق قوردان كەپىلدەندىرىلگەن ترانسفەرت تۋرالى» زاڭ جوباسى تۋرالى بايانداعان مينيستر.
ونىڭ اتاپ وتۋىنشە, رەسپۋبليكالىق بيۋدجەتتىڭ شىعىستارى 2022 جىلى - 15,9 تريلليون تەڭگە, 2023 جىلى – 15,6 تريلليون تەڭگە جانە 2024 جىلى 16 تريلليون تەڭگە كولەمىندە بولجانىپ وتىر.
«جالپى ءۇش جىلدىق بيۋدجەت جوباسىن قالىپتاستىرۋ مەملەكەتتىك جوسپارلاۋ جۇيەسىن ترانسفورماتسيالاۋ جاعدايىندا جۇزەگە اسىرىلدى. جىلدىڭ باسىندا قابىلدانعان جالپىۇلتتىق باسىمدىقتار مەن ەلدىڭ دامۋىنىڭ ۇلتتىق جوسپارى بيۋدجەت ساياساتىنىڭ باسىمدىقتارىن ايقىندادى. مەملەكەتتىك ورگانداردىڭ قارجىلىق قاجەتتىلىگىنە ولاردىڭ دامىتۋ جوسپارلارىنىڭ ماقساتتارى مەن نىسانالى ينديكاتورلارىنا سايكەس باسىمدىق بەرىلدى», دەدى اسەت ەرعاليەۆ.