تاڭسارىدە تىسقا شىققان پيسارەۆ ەلدى مەكەنىنىڭ تۇرعىنى يۆان گوربال كورشى ءۇيدىڭ قىزىل جالىنعا ورانعانىن بايقايدى. سودان جانۇشىرا ۇمتىلىپ, تەرەزەنى سىندىرعان كۇيى ىشكە ەنەدى. شاتىردان قويۋ قارا ءتۇتىن بۋداقتاپ, ەسىك-تەرەزەلەردى شارپىعان ىستىق جالىن وعان بوگەسىن بولا المادى. ەسىل-دەرتى – كۇندە «ۆانيا اعاي» دەپ جىلى امانداسىپ جۇرەتىن بالاقايلاردى قۇتقارۋ. دەنەلەرىن كۇيىك شالىپ, ءتۇتىن يىسىنەن ۋلانعان بالالاردى كورگەندە سۋماڭداعان الدەبىر سۋىق ويلار دەنەسىن مۇزداتىپ سالا بەردى. ولاردىڭ اماندىقتارىن ىشتەي تىلەگەن كۇيى تەز قيمىلداپ, بالالاردى ءبىر-بىرلەپ كومەككە جەتكەن اناسى تاتيانا يۆانوۆناعا بەرە باستادى. ءسويتىپ ارادا كوپ ۋاقىت وتپەي بەيكۇنا ءۇش بالا دەرەۋ اۋرۋحاناعا جەتكىزىلىپ, مەديتسينالىق كومەك كورسەتىلدى. ءبىرى تەز ايىعىپ شىقسا, ەكەۋىنە ءبىراز ەمدەلۋگە تۋرا كەلدى. كەيىن بەلگىلى بولعانداي, جاس كەلىنشەك كەشقۇرىم پەشتى جاعىپ, 8 جاسار قىزى جانە 6 جاسار قوس ۇلىن ۇيدە قالدىرىپ, سىرتىنان ق ۇلىپتاپ كەتەدى. جەكە شارۋالارمەن جۇرگەن ول ءتاتتى ۇيقى قۇشاعىندا بالبىراپ جاتقان بالالاردى كورشىسىنىڭ ءولىم قۇشاعىنان قۇتقارىپ العانىن كەيىن بىلەدى.
ال مەكتەپتە زەرتحاناشى بولىپ ەڭبەك ەتەتىن 25 جاستاعى قاراپايىم جىگىت, بارىنەن بۇرىن بالالاردى قۇتقارىپ قالعانىنا ءوزى دە ريزا. ءوزىنىڭ بۇل ارەكەتىن باتىلدىق پەن ەرەن ەرلىككە باعالامايدى. قيىن جاعدايعا كەزىككەن جاندارعا قول ۇشىن بەرۋدى ازاماتتىق پارىز, بورىش دەپ تۇسىنەدى.
* * *
اقپاننىڭ 12-نەن 13-نە قاراعان ءتۇنى شال اقىن اۋدانىنا قاراستى كريۆوششەكوۆو اۋىلىندا ەكىنشى توپتاعى مۇگەدەكتىڭ ءۇيى وتقا ورانىپ, ءۇي يەسى عايىپتان ءتىرى قالدى. وقيعا بىلاي بولعان.
61 جاستاعى زەينەتكەر تۋعان كۇنىن ىشكىلىكپەن اتاپ ءوتۋدى ۇيعارادى. اراقتىڭ ۋىتى بويعا ابدەن تاراعاننان كەيىن تەمەكى تارتادى. سودان تەلەديدار كورگەن كۇيى ۇيقىعا كەتەدى. تەمەكىنىڭ ىستىق شوعى... ودان ارعى جاي بەلگىلى. ەسىن اۋرۋحانادا بىراق جيعان. ونى امان الىپ قالعان كىم, ەمدەۋ ورنىنا قالاي جەتتى – بەيمالىم. كورەر جارىعى بار جاندى اجال تىرناعىنان پەتروپاۆل اسكەري ينستيتۋتىنىڭ كۋرسانتى سابىر بازارباەۆ اراشالاپ قالعان ەدى.
دەمالىس ۋاقىتىن پايدالانىپ, وسىنداعى تۋعان-تۋىستارىنا كەلگەن ول ءتۇن ورتاسىندا قىسقى وليمپيادا ويىندارىن تاماشالاپ وتىرعاندا «ءورت, ءورت!» دەگەن الدەكىمنىڭ ايعايىن ەستىسىمەن دالاعا جۇگىرىپ شىعادى. سپورتپەن اينالىسىپ, سالاماتتى ءومىردى سەرىك ەتكەن ازامات ۇيگە وزگەلەردەن وق بويى وزىق جەتىپ, ەسىكتى جۇلقي اشقاندا وتتىڭ ىستىق لەبى قارىپ جىبەرگەندەي بولدى. ءوز باسىنا تونگەن قاۋىپ-قاتەردەن تايسالماستان ىشكە كىرەدى. وسى كەزدە ءالسىز ىڭىرسىعان ءۇندى ەستيدى. كوزگە تۇرتكىسىز قاراڭعىلىقتا جان-جاعىن قارمانا ءجۇرىپ, دىبىس شىققان جاقتى شامالايدى. جاتىن بولمەدەن ەسىنەن تانىپ, بۇك ءتۇسىپ جاتقان ءۇي يەسىن تاۋىپ الادى. سابىر ونى دەرەۋ تازا اۋاعا كوتەرىپ الىپ شىعادى. ءورت سوندىرۋشىلەر مەن جەدەل جاردەم دە جەتىپ, قولما-قول كومەك كورسەتەدى.
ەۆگەني جۋراۆلەۆ,
سولتۇستىك قازاقستان وبلىستىق توتەنشە جاعدايلار
دەپارتامەنتى ءباسپاسوز قىزمەتىنىڭ باس مامانى.
پەتروپاۆل.
سۋرەتتە: ي.گوربال; س.بازارباەۆ.