نازارباەۆ ۋنيۆەرسيتەتىنىڭ ستۋدەنتتەرىنەن قۇرىلعان iGEM قازاقستان كومانداسى حالىقارالىق گەنەتيكالىق ينجەنەرلىك ماشينا (iGEM) بايقاۋىندا التىن مەدال جەڭىپ الدى, دەپ حابارلايدى Egemen.kz.
iGEM بايقاۋى – سينتەتيكالىق بيولوگيا سالاسى بويىنشا جىل سايىنعى حالىقارالىق اۋقىمدى ءىس-شارا. وعان جوعارى وقۋ ورىندارىنىڭ ستۋدەنتتەرى, تۇلەكتەرى جانە جوعارى سىنىپ وقۋشىلارى قاتىسادى. جىل سايىن 6000-عا جۋىق ستۋدەنت جاز مەزگىلىن iGEM-گە ارنايدى, ال كۇزدە الەمدىك قاۋىمداستىققا وڭ ۇلەس قوسا الاتىن جوبالارىن ۇسىنۋ ءۇشىن بوستوندا جينالادى. اقش, كانادا, چيلي, پاكىستان, جاپونيا, وڭتۇستىك كورەيا, مىسىر, بولگاريا, مەكسيكا, برازيليا, گەرمانيا, فرانتسيا جانە اۆستراليا بيىلعى جىلى قاتىسۋشى ەلدەردىڭ قاتارىندا بولدى.
iGEM قازاقستان توبى – بۇل جارىسقا 2013 جىلدان باستاپ قاتىسا باستاعان ورتالىق ازياداعى جالعىز توپ. سەگىز جىل ىشىندە ەكى التىن, ءبىر كۇمىس جانە ەكى قولا مەدال جەڭىپ الدى.
iGEM قازاقستان كومانداسى Wetlab, Drylab جانە Human Practices سياقتى جوبانى ازىرلەۋدەگى رولدەر مەن جاۋاپكەرشىلىكتەرگە سايكەس ىشكى بولىمدەرگە بولىنگەن. كوماندا مۇشەلەرى – SEDS جانە NU SSH باكالاۆريات ستۋدەنتتەرى. جوبانى NU SEDS ءاسسوتسياتيۆتى پروفەسسور, دوكتور ەنريكو مارسيلي, حيميا ينجەنەرياسى جانە ماتەريالتانۋ كافەدراسىنىڭ عىلىمي قىزمەتكەرى, دوكتور كايودە وليفە جانە نۋ تۇلەگى, قازىرگى تاڭدا ميۋنحەندەگى ليۋدۆيگ ماكسيميليان ۋنيۆەرسيتەتىنىڭ ماگيسترانت ستۋدەنتى داۋلەت ايتىمباەۆ باسقارادى.
توپ قازاقستاننىڭ ەندەميكالىق فلوراسى مەن فاۋناسىنا قاۋىپتى مۇناي توگىلۋلەرىنە قارسى ارەكەت ەتۋدىڭ قاۋىپسىز ءادىسىن ازىرلەۋمەن اينالىسۋدا. مۇندا شيكى مۇنايدى بيورەمەدياتسيالاۋدىڭ جاڭا اگەنتى – «Remi, du et!» جوباسىن ازىرلەۋ ارقىلى وسى ماسەلەنىڭ شەشىمىن تابۋعا ارنالعان.
قازىرگى ۋاقىتتا توپ Pseudomonas aeruginosa ۇلگى شتامى بويىنشا قاجەتتى ەكسپەريمەنتتى اياقتاپ, كەيبىر قازاقستاندىق كومپانيالارمەن بىرگە جۇمىس جاساۋ ءۇشىن نەگىز قۇرىلۋدا. كەلەسى جىلى توپ جاساندى تۇردە جاسالعان باكتەريالاردىڭ بيووڭدەۋىن ونەركاسىپتىك ماسشتابقا شىعارۋدى جوسپارلاپ وتىر.