دەنساۋلىق ساقتاۋ ءمينيسترى الەكسەي تسوي وتاندىق QazVac ۆاكتسيناسىن شەت ەلدەرگە جەتكىزۋگە قاتىستى تۇسىنىكتەمە بەردى, دەپ حابارلايدى Egemen.kz.
ء«يا, ءبىز قازىر مۇنداي اقپاراتتى بارلىق ەلدەرگە جولدادىق. ءبىزدىڭ ەلشىلىك مۇنى جوسپارلاپ وتىرعانىمىزدى حابارلايدى. بىراق, ءبىرىنشى كەزەكتە, ءبىز قازاقستاننىڭ قاجەتتىلىگىن قامتاماسىز ەتۋگە ءتيىسپىز. الداعى ۋاقىتتا سىرتقى نارىقتارعا شىعامىز. وتىنىشتەر بار, قازىر پىسىقتالۋدا. بۇل كەزەڭدە QazVac ۆاكتسيناسى ايماقتارعا ەنگەننەن كەيىن, ءبىزدىڭ ازاماتتار وعان وتە بەلسەندى تۇردە ەگىلەدى. قازىر ءبىز ءوز قاجەتتىلىكتەرىمىزدى ەل ىشىندە قامتاماسىز ەتەمىز», دەدى الەكسەي تسوي ۇكىمەت وتىرىسى اياسىندا.
سونىمەن قاتار مينيستر QazVac-تى ساتىپ الۋعا قانشا ەل نيەت بىلدىرگەنىن ايتتى.
«جابىق فورماتتاعى ماسەلە پىسىقتالۋدا. كەلىسسوزدەر جۇرگىزىلۋدە, ازىرگە ناقتى كەلىسىمدەر جوق. كوپتەگەن ەلدەر حابارلاسىپ, قىزىعۋشىلىق تانىتىپ, ۆاكتسينا تۋرالى اقپاراتتى, قازاقستاندا ۆاكتسيناتسيانىڭ قالاي وتكەنىن, قانداي ناتيجەلەر العانىن سۇرايدى. بۇل جۇمىستى ءبىز جۇرگىزىپ جاتىرمىز», دەپ ءتۇسىندىردى دەنساۋلىق ساقتاۋ مينيسترلىگىنىڭ باسشىسى.