بيىل ەكونوميكالىق بەلسەندىلىكتىڭ قالپىنا كەلۋىنە بانكتەردەگى دەپوزيتتىك بازالاردىڭ 3,5 ترلن تەڭگەگە دەيىن ءوسىم كورسەتۋى دە اسەر ەتكەن. قازاقستان قارجىگەرلەر قاۋىمداستىعىنىڭ حابارلاۋىنشا, 2021 جىلدىڭ قاڭتار-قىركۇيەك ارالىعىندا 14,9 ترلن تەڭگە جاڭا زايم بەرىلگەن. بۇل بىلتىرمەن سالىستىرعاندا 4,7 ترلن تەڭگەگە كوپ.
قاۋىمداستىق بيىل توعىز ايداعى وتاندىق بانك سەكتورىنىڭ احۋالىنا شولۋ جاساعان. وندا زاڭدى تۇلعالاردىڭ نەسيە الۋداعى ۇلەسى باسىم ەكەنىنە قاراماستان بولشەك نەسيە پورتفەلىنىڭ الدەقايدا جوعارى ءوسىم كورسەتكەنى (+27 پايىز نەمەسە 2,1 ترلن تەڭگە) ايتىلادى. بيزنەسكە بەرىلگەن نەسيە 4 پايىزعا عانا ءوسىم كورسەتكەن.
«زاڭدى تۇلعالار نەسيەسىنىڭ ەسەپتەن شىعارىلۋى (-475 ملرد تەڭگە ماۋسىم ايىندا) جانە قازىرگى قارىزدى قايتا قارجىلاندىرۋ ەسەبىنەن وسىنداي باسىمدىق قالىپتاسقان بولۋى مۇمكىن. جىل باسىنان بەرى NPL دەڭگەيى 6,9-دان 4,3 پايىزعا دەيىن تومەندەدى. ەكىنشى دەڭگەيلى بانكتەردىڭ رەسۋرستىق بازاسى دەپوزيتتەر ەسەبىنەن ەداۋىر ارتتى (+16 پايىز نەمەسە 3,5 ترلن تەڭگە). بۇل سالىمدار بويىنشا پايىزدىق سىياقىنىڭ كاپيتالدانۋى جانە ازاماتتار مەن كاسىپورىندار تابىسىنىڭ قايتا قالپىنا كەلە باستاۋىمەن بايلانىستى. كاپيتالدانۋ ەسەبىنەن ديۆيدەندتەر تولەنگەنىنە قاراماستان تابىس پەن ەكىنشى دەڭگەيلى بانكتەردىڭ مەنشىك كاپيتالى تۇراقتى تۇردە ءوسىپ جاتىر (+10 پايىز نەمەسە 395 ملرد تەڭگە). سەكتوردىڭ تابىسى توعىز ايدا 925 ملرد تەڭگەگە دەيىن كوبەيدى. بىلتىر توعىز ايداعى تابىس نەبارى 597 ملرد تەڭگەنى قۇراعان ەدى. ماكروەكونوميكالىق جاعدايدىڭ اناعۇرلىم جاقسارۋى ەكونوميكا سۋبەكتىلەرىنىڭ قارىز رەسۋرستارىن پايدالانۋ جانە جيناق قالىپتاستىرۋ قابىلەتىنە وڭ اسەر ەتەدى» دەپ جازادى قاۋىمداستىق.
ءسوز جوق, نارىقتا بولىپ جاتقان وڭتايلى ۇردىستەر بانكتەردىڭ دەڭگەيىنە دە اسەر ەتپەي قويمايدى. جىل باسىنان بەرى 8 ەكىنشى دەڭگەيلى بانكتىڭ رەيتينگى كوتەرىلگەن. سەكتورداعى بانك كورسەتكىشتەرىن باعالاپ وتىراتىن S&P, Fitch جانە Moody’s رەيتينگ اگەنتتىكتەرى 8 بانكتىڭ دەڭگەيىن جالپى جيناقتاي العاندا 12 رەت جوعارىلاتىپتى.
قاۋىمداستىقتىڭ پايىمداۋىنشا, قارىز رەسۋرستارىنا دەگەن سۇرانىستىڭ ءوسۋى, بىرقاتار جەڭىلدەتىلگەن باعدارلامالاردىڭ قولعا الىنۋى, اقشا-نەسيە ساياساتىنىڭ بىرقالىپقا تۇسە باستاۋى 2021 جىلى جاڭا نەسيەلەردىڭ مولىنان بەرىلۋىنە جول اشقان. نەسيە پورتفەلىندە, اسىرەسە, تۇتىنۋشىلىق (جىل باسىنان بەرى +28 پايىز) جانە يپوتەكالىق سەگمەنتتىڭ (جىل باسىنان بەرى +23 پايىز) ۇلەسى جوعارى.
«دەگەنمەن سۇرانىستىڭ كەيىنگە قالۋى, زەينەتاقى جيناعىنان ارتىق اقشا الۋ سياقتى ءبىر رەتتىك فاكتورلاردىڭ جوعالۋىنا جانە مەملەكەتتىك باعدارلامالاردىڭ قىسقارۋىنا بايلانىستى نەسيە بەلسەندىلىگىنىڭ ديناميكاسى قايتا السىرەۋى مۇمكىن. كورپوراتيۆتى سەكتوردا ءبارى سۇرانىس ساپاسىنا, قارىز الۋشىنىڭ قارجىلىق جاعدايىنا جانە اۋقىمدى مەملەكەتتىك باعدارلامالاردىڭ كولەمى مەن باعىتىنا بايلانىستى», دەيدى قاۋىمداستىق.