قر پرەمەر-ءمينيسترى اسقار مامين دۇنيەجۇزىلىك بانكتىڭ ەۋروپا جانە ورتالىق ازيا ايماعى بويىنشا ۆيتسە-پرەزيدەنتى اننا بەردەمەن كەزدەسۋ وتكىزدى, دەپ حابارلايدى Egemen.kz primeminister.kz سايتىنا سىلتەمە جاساپ.
اسقار مامين مەن اننا بەردە دۇنيەجۇزىلىك بانك پەن قر ۇكىمەتىنىڭ كومىرتەكتى بەيتاراپتىق ماقساتتارىنا قول جەتكىزۋ ءۇشىن ەكونوميكانىڭ بازالىق سالالارىن جاڭعىرتۋعا ينۆەستيتسيالار تارتۋ ماسەلەلەرى بويىنشا پىكىرسايىس سەسسياسىنا قاتىستى.
«قازاقستاننىڭ دۇنيەجۇزىلىك بانكپەن ىنتىماقتاستىعىنىڭ ءۇش ونجىلدىعى ىشىندە قارجى, ينفراقۇرىلىم, تكش, ەنەرگەتيكا, شاعىن جانە ورتا بيزنەس, اوك جانە IT-سەكتور سياقتى سالالاردا جالپى سوماسى $8 ملرد استام بولاتىن 55-تەن اسا جوبا ىسكە اسىرىلدى. دۇنيەجۇزىلىك بانكتىڭ قازاقستانداعى اعىمداعى ينۆەستيتسيالىق پورتفەلىنەن قازىرگى كەزدە جالپى سوماسى $3,6 ملرد قۇرايتىن 13 جوبا ىسكە اسىرىلۋدا», دەدى ا. مامين.
ۇكىمەت باسشىسى قازاقستاندا «جاسىل» ەكونوميكا مودەلىن ەنگىزۋ جانە تۇراقتى ءوسۋدى قامتاماسىز ەتۋ بويىنشا دۇنيەجۇزىلىك بانكپەن ىنتىماقتاستىقتى ودان ءارى كەڭەيتۋدىڭ ماڭىزدىلىعىن اتاپ ءوتتى.
دۇنيەجۇزىلىك بانك توبى دامۋشى ەلدەردەگى كليماتتىڭ وزگەرۋىنە قارسى كۇرەس جونىندەگى شارالاردى قارجىلاندىراتىن الەمدەگى ەڭ ءىرى كوپجاقتى ۇيىم. كەزدەسۋگە قاتىسۋشىلار «جاسىل» ينۆەستيتسيالاردى تارتۋعا جانە ەنەرگەتيكا, اۋىل شارۋاشىلىعى, وڭدەۋ ونەركاسىبى, اكت, ينجينيرينگتىك قىزمەتتەر, كولىك جانە ت.ب. سالالاردا ءوسۋدىڭ جاڭا كوزدەرىن قالىپتاستىرۋعا ىقپال ەتەتىن مودەلدەر مەن فاكتورلاردى قاراستىردى.
شىعارىندىلار دەڭگەيى تومەن ينفراقۇرىلىم مەن تەحنولوگيالاردى دامىتۋداعى مەملەكەتتىك جانە جەكەمەنشىك سەكتورلاردىڭ حالىقارالىق تاجىريبەسى تالقىلاندى.
پىكىرتالاس سەسسياسىنا قر ۇكىمەتىنىڭ مۇشەلەرى, سونداي-اق جاسىل ءوسىمدى ىنتالاندىرۋ سالاسىنداعى جەتەكشى ساراپشىلار – دب ينفراقۇرىلىم جونىندەگى وڭىرلىك ديرەكتورى چارلز كورمە, ەىدۇ ەۋرازيا ءبولىمىنىڭ باسشىسى ۋيليام تومپسون, ريم ۋنيۆەرسيتەتىنىڭ پروفەسسورى پاسكۋالە لۋچيو سكانديتستسو, گرەكيا قورشاعان ورتا جانە ەنەرگەتيكا مينيسترلىگى جانىنداعى ء«ادىل اۋىسۋدى دامىتۋ جوسپارى» قۇقىقتىق ماسەلەلەرى جونىندەگى ساراپشىلار كوميتەتىنىڭ پرەزيدەنتى گرەتسي يواننيس تسورتسيس, جاڭا زەلاندياداعى ەڭبەك ونىمدىلىگى ماسەلەلەرى جونىندەگى كوميسسيانىڭ باسشىسى ەندريۋ سۆيت, فينليانديا قارجى ءمينيسترىنىڭ اعا كەڭەسشىسى, كليماتتىڭ وزگەرۋىنە قارسى كۇرەس جونىندەگى قارجى مينيسترلەرى كواليتسياسىنىڭ تەڭ توراعاسى پەككا مورەن, ىسكەر توپتار وكىلدەرى جانە ت. ب. قاتىستى.