باتىس قازاقستان وبلىسىندا ەر ادام اۋىلداسىن ۇرىپ ءولتىردى, دەپ حابارلايدى Egemen.kz.
بقو پوليتسيا دەپارتامەنتىنىڭ ءباسپاسوز قىزمەتى ءمالىم ەتكەندەي, وقيعا ورال قالاسىنا قاراستى سەرەبرياكوۆ كەنتىندە بولدى. ا. ەسىمدى 54 جاستاعى ەر ادام ءوزىنىڭ ۇيىندە 1978 جىلعى ت. دەگەن اۋىلداسىمەن بىرگە اراق ىشكەن. سونىڭ بارىسىندا ءوزارا كەلىسپەۋشىلىك سالدارىنان ت. ءۇي يەسىنە دەنە جاراقاتتارىن سالىپ, كەتىپ قالعان.
«كەلەسى كۇنى ت. قايتا كەلگەندە, ا-نىڭ ەس-ءتۇسسىز جاتقانىن كورىپ, جەدەل جاردەم شاقىرعان. ايتسە دە 54 جاستاعى ەر ادام اۋرۋحاناعا بارا جاتقان جولدا قايتىس بولدى. كۇدىكتى سول كۇنى قولعا ءتۇسىپ, ۋاقىتشا ۇستاۋ يزولياتورىنا قامالدى. ونىڭ بۇدان بۇرىن دا قىلمىستىق جاۋاپكەرشىلىككە تارتىلعانى انىقتالدى. قازىرگى كەزدە قر قك 106-بابى 3-بولىگىنە (كىسى ولىمىنە سوقتىرعان دەنە جاراقاتىن سالۋ) سايكەس سوتقا دەيىنگى تەرگەۋ امالدارى جۇرگىزىلۋدە», دەپ حابارلادى ۆەدومستۆودان.