رەسپۋبليكالىق اقپاراتتىق-ناسيحات توبىنىڭ ءبىر توپ مۇشەلەرى قىزىلجار ءوڭىرىن ارالاپ, «قازاقستان جولى–2050: ءبىر ماقسات, ءبىر مۇددە, ءبىر بولاشاق» جولداۋىنان تۋىندايتىن تالاپتاردى جۇرتشىلىققا جەتكىزۋدى يگى ماقسات ەتكەن.
ولاردىڭ العاشقى كەزدەسۋى وبلىستىق اكىمدىكتىڭ ۇلكەن زالىندا ءوتىپ, وعان ءتۇرلى سالا وكىلدەرى قاتىستى. باسقوسۋدى وبلىس اكىمى سامات ەسكەندىروۆ جۇرگىزىپ وتىردى. اقپاراتتىق-ناسيحات توبىنىڭ جەتەكشىسى, ىشكى ىستەر ءمينيسترى قالمۇحامبەت قاسىموۆ جينالعاندار الدىندا ءسوز الىپ, ماڭىزدى قۇجاتتىڭ باستى قاعيداتتارىن جان-جاقتى تالداپ بەردى. ونىڭ ىشىندە قۇقىق قورعاۋ سالاسىن جەتىلدىرۋ ماسەلەلەرىنە, جۇرگىزىلىپ جاتقان رەفورمالارعا توقتالدى. ادامداردىڭ تىنىشتىعىن ويلاۋ, ەش الاڭسىز ءومىر ءسۇرۋىن قالىپتاستىرۋ باستى مىندەتتەردىڭ ءبىرى بولىپ تابىلادى, دەدى.
قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ جولداۋدا ماڭگى ەل ۇلتتىق يدەياسى ورىندى قوزعالعانىن, ەگەمەندى دامۋدىڭ 22 جىلىندا جەتكەن تابىستارىمىز بەن جەتىستىكتەرىمىزدىڭ قازىنالى قۇندىلىقتارىمىزعا قىزمەت ەتە بەرەتىنىن, حالىق بىرلىگىن ساقتاۋدان اسقان باقىت جوقتىعىن تىلگە تيەك ەتتى.
ق.قاسىموۆ ەسىل اۋدانى جۇرتشىلىعىمەن وتكەن جۇزدەسۋدە تاريحي قۇجاتتا اگروونەركاسىپ كەشەنىن يننوۆاتسيالىق باعىتقا ءتۇسىرۋدىڭ ناقتى قادامدارى جاسالعانىن, بۇل ورايدا, استىقتى ولكە سانالاتىن قىزىلجار ءوڭىرى الدىندا ىرگەلى مىندەتتەر تۇرعانىن اڭگىمەلەدى. ودان ءارى ءماجىلىس دەپۋتاتتارى قاراۋىنا بەرىلگەن قىلمىستىق-اتقارۋ كودەكسىنىڭ ارتىقشىلىقتارىن ءتۇسىندىرىپ, ونىڭ تۇپكى ءمانى قوعامدى ىزگىلەندىرۋ بولىپ تابىلاتىنىن جەتكىزدى. جول قاۋىپسىزدىگى ەرەجەسىن ساقتاۋ ەل تۇرعىندارىنىڭ بۇلجىماس بورىشىنا اينالۋى ءتيىس. بۇل كورسەتكىش جونىنەن ماقتانا المايمىز. تەك بىلتىردىڭ وزىندە عانا 23 مىڭنان استام جول-كولىك وقيعاسى تىركەلىپ, 3 مىڭداي ادام مەرت بولدى. قايعىلى وقيعالاردىڭ كوبى جۇرگىزۋشىلەردىڭ كىناسىنەن جاسالادى, دەي كەلىپ, جول ەرەجەسى بارىنشا قاتاڭداناتىنىن قاداپ ايتتى. وبلىس اكىمى س.ەسكەندىروۆ ەت, ءسۇت ونىمدەرىن قالدىقسىز وڭدەيتىن سالانى جانداندىرۋ قاجەتتىگىنە كوڭىل اۋداردى. جولداۋدى ناسيحاتتاۋشىلار «ەسىل» جشس-ىندە بولىپ, كۇنىنە 100 توننا ماكارون ونىمدەرىن شىعاراتىن ماكارون تسەحىنىڭ ۇجىمىمەن كەزدەستى.
ە.توعجانوۆ ەتنومادەني بىرلەستىكتەر مۇشەلەرىمەن جۇزدەسسە, ءبىلىم جانە عىلىم ءمينيسترىنىڭ ورىنباسارى ەسەنعازى يمانعاليەۆ ءبىلىم وشاقتارىنىڭ تىنىس-تىرشىلىگىمەن تانىستى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.