ەلوردادا ارنايى تەحنيكانىڭ سانى ارتا ءتۇستى. بۇل تۋرالى نۇر-سۇلتان قالاسى اكىمىنىڭ ورىنباسارى ەرمەك قيزاتوۆ ءمالىم ەتتى, دەپ حابارلايدى Egemen.kz.
«بۇگىندە ەلوردادا قىسقا دايىندىق جۇمىسى تاعى ءبىر پىسىقتالىپ جاتىر. ءتيىستى تەحنيكا مەن ماماندار دا دايىندىق ۇستىندە. جالپى مامان مەن تەحنيكا جەتكىلىكتى, توتەنشە جاعداي تۋىنداعاندا قوسىمشا كۇش جۇمىلدىرىلادى. بۇگىندە ەلوردانىڭ توتەنشە جاعداي قىزمەتىندە 50-دەن استام قار تازالايتىن كولىك بار. ودان بولەك, بيىل تاعى 40-تان استام ارنايى تەحنيكا ساتىپ الىندى.
سونداي-اق, جەكە قۇرامنىڭ دا جىل سايىن قاتارى ارتىپ كەلەدى. مامانداردىڭ بىلىكتىلىگىنە دە اسا ءمان بەرىلەدى.
ەلوردادا قىستىگۇنى بولاتىن توتەنشە جاعدايلار كوبىنە اۋا رايىنا بايلانىستى. ياعني بوران, قاتتى جەل, اياز, قالىڭ قار, تاعى سول سياقتى», دەدى ەرمەك قيزاتوۆ.
ونىڭ ايتۋىنشا, بۇگىندە ەلوردانىڭ توتەنشە جاعداي قىزمەتى قىس مەزگىلىنە دايىن.
«قىستىگۇنى توتەنشە جاعدايعا تاپ بولعان جاندارعا كەشەندى كومەك كورسەتىلەدى. بۇل جەردە الدىمەن ادامدار قۇتقارىلادى, قاجەت بولعان جاعدايدا مەديتسينالىق كومەك كورسەتىلەدى. جولدا قالعان بولسا, جىلى كيىم مەن تاماق ۇسىنىلادى. سونىمەن قاتار جولدا قالعان كولىكتى جەتكىزۋ قىزمەتى دە بار», دەيدى ول.
ايتا كەتەيىك, بۇگىن نۇر-سۇلتاندا «قىس – 2021» رەسپۋبليكالىق كوماندالىق-شتابتىق وقۋ-جاتتىعۋى باستالدى. ەكى كۇنگە سوزىلاتىن قىسقا دايىندىق شاراسىنا توتەنشە جاعداي, قورعانىس, مەديتسينا, پوليتسيا تاعى باسقا قىزمەت وكىلدەرى قاتىسىپ جاتىر.