جۇمىر جەردەگى جۇرتتىڭ ءبارى جۇقپالى دەرتپەن كۇرەسىپ, جانتالاسىپ جاتقانى بەلگىلى. الەمدى ابىگەرگە سالعان ىندەت ءارتۇرلى كەيىپكە ەنىپ, قۇرىلىمى سان قۇبىلىپ تا ۇلگەردى. دۇنيەنىڭ تۇكپىر-تۇكپىرىندەگى احۋال دا ءبىر-بىرىنە ۇقسامايدى. ءبىر قۋانتارلىعى, ەلىمىزدەگى جاعداي تۇراقتالعانى بايقالادى. وعان دالەل, ۇكىمەت وتىرىسىندا بايانداما جاساعان دەنساۋلىق ساقتاۋ ءمينيسترى الەكسەي تسوي سوڭعى ءۇش ايدا ناۋقاستار سانى 2,3 ەسەگە ازايعانىن ايتتى.
قازاقستاندا سوڭعى ەكى ايدا اۋرۋشاڭدىق 3,4 ەسەگە, ال ءولىم-ءجىتىم 4 ەسەگە تومەندەدى. كوروناۆيرۋس ينفەكتسياسىنىڭ تارالۋ قارقىنى بويىنشا «جاسىل ايماقتا» شىمكەنت قالاسى, اقتوبە, اتىراۋ, الماتى, باتىس قازاقستان, تۇركىستان, جامبىل, قىزىلوردا, ماڭعىستاۋ جانە شىعىس قازاقستان وبلىستارى, «سارى ايماقتا» – نۇر-سۇلتان جانە الماتى قالالارى, اقمولا جانە قاراعاندى وبلىستارى ورنالاسقان. «قىزىل ايماقتا» قوستاناي, پاۆلودار جانە سولتۇستىك قازاقستان وبلىستارى قالادى. بۇگىنگى تاڭدا 8,5 ملن ادام ۆاكتسينانىڭ ءبىرىنشى كومپونەنتىمەن, 7,7 ملن ادام ەكىنشى كومپونەنتىمەن ەگىلدى.
ەكپە الۋدا ەلوردالىقتار دا بەلسەندى. قالالىق اكىمدىكتىڭ حابارلاۋىنشا, قوعامدىق دەنساۋلىق ساقتاۋ باسقارماسىنىڭ قويماسىنا Pfizer ۆاكتسيناسىن ساقتاۋعا ارنالعان مۇزداتقىش جەتكىزىلدى.
«وتكەن دەمالىس كۇندەرى -45-تەن -80 گرادۋسقا دەيىنگى تەمپەراتۋرادا جۇمىس ىستەيتىن ەكى مۇزداتقىش اكەلىندى. ۆاكتسينا ەگۋ كابينەتتەرىنە ارنايى تەرموكونتەينەرلەرمەن جەتكىزىلەدى. ءبىرىنشى كەزەڭدە جاسوسپىرىمدەر مەن جۇكتى ايەلدەردى Pfizer ۆاكتسيناسىمەن ۆاكتسينالاۋ تەك مەديتسينالىق ۇيىمدار جانىنداعى ۆاكتسينالاۋ پۋنكتەرىندە جوسپارلانعانىن اتاپ وتكەن ءجون. Pfizer قالانىڭ مەديتسينالىق مەكەمەلەرىنە تۇسكەنى تۋرالى قوسىمشا حابارلاناتىن بولادى», دەدى باسقارما وكىلدەرى.
قالا بويىنشا بارلىعى 90-نان استام ۆاكتسينالاۋ پۋنكتتەرى جۇمىس ىستەيدى, سونداي-اق ەڭبەك ۇجىمدارىنا ۆاكتسينا سالۋ ءۇشىن كوشپەلى بريگادالار جۇمىسىن جالعاستىرۋدا.
«ەلوردا بويىنشا ينفەكتسيالىق ستاتسيونارلارداعى ناۋقاستاردىڭ سانى – 477. بۇگىندە 10 ستاتسيونار ينفەكتسيالىق بولىپ بەيىمدەلگەن, توسەكتىك ورىن قۋاتتىلىعى – 1 097. ءبىر تاۋلىكتە 50-60 ادام ەمدەلىپ, ۇيگە شىعارىلادى. ەكپەنىڭ 1 كومپونەنتىن – 454 579 ادام, 2 كومپونەنتىن 419 473 ادام الدى», دەدى نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ وكىلدەرى.
ەلوردادا COVID-19-عا قارسى رەۆاكتسينالاۋ قاراشانىڭ ەكىنشى جارتىسىندا باستالادى. №15 قالالىق ەمحانانىڭ جتد ءبولىمىنىڭ مەڭگەرۋشىسى گۇلنار سىزدىقوۆا بۋستەرلىك ۆاكتسينانى ءبىرىنشى بولىپ ازاماتتاردىڭ قانداي ساناتتارى الاتىنىن ايتتى.
«كوروناۆيرۋس ينفەكتسياسىنا قارسى رەۆاكتسينالاۋ كۆي-مەن كۇرەستە يممۋنيتەتتى نىعايتۋ ءۇشىن جۇرگىزىلەدى. ونى ءبىرىنشى كەزەكتە اۋرۋعا بەيىم ازاماتتار ساناتى الادى. سونداي-اق مەديتسينا قىزمەتكەرلەرى, پەداگوگتەر, قۇقىق قورعاۋ ورگاندارىنىڭ قىزمەتكەرلەرى ۆاكتسينامەن قايتا ەگىلەدى. ارينە, ءبارى ەرىكتى نەگىزدە. سونداي-اق ءبىرىنشى كەزەكتەگى رەۆاكتسينالاۋدان سوزىلمالى اۋرۋلارى بار ادامدار, قارت ادامدار وتكەنى ابزال, ويتكەنى ولار تاۋەكەل توبىنا كىرەدى», دەدى گ.سىزدىقوۆا.
قالالىق اكىمدىكتىڭ مالىمەتىنشە, نۇر-سۇلتاندا مەكتەپ وقۋشىلارىنىڭ اتا-انالارىمەن قاۋىپسىزدىك ءۇشىن ەكپەنىڭ ماڭىزى تۋرالى اڭگىمەلەسۋ بەلسەندى تۇردە ءجۇرىپ جاتىر. قالا مەكتەپتەرىندە ەكپەنىڭ قاجەتتىلىگى تۋرالى ساۋالدامالار مەن جادىنامالار تاراتىلادى. ويتكەنى بالالار اراسىندا دا كوروناۆيرۋس جۇقتىراتىندار قاتارى كوبەيە باستادى. ايتا كەتەيىك, بيىل 10 ايدا نۇر-سۇلتان قالاسىندا 13 مىڭنان استام بالا كوروناۆيرۋس بويىنشا ەم الدى. ولاردىڭ اراسىندا ءولىم جاعدايى تىركەلگەن جوق.
ەلورداداعى ەپيدەميالىق احۋالدىڭ تۇراقتىلىعىن ساقتاۋ جانە كوروناۆيرۋستىڭ ودان ءارى تارالۋىنىڭ الدىن الۋ ءۇشىن 8 قاراشادان باستاپ ساۋدا, ويىن-ساۋىق ورتالىقتارىنا جۇمىس كۇندەرى دە «جاسىل» مارتەبەسى بار ازاماتتار عانا بارا الادى. تالداۋ ناتيجەسى كورسەتكەندەي, ءۇي كارانتينىن بۇزۋشىلاردىڭ ەڭ كوپ سانى ءدال وسى ساۋدا, ويىن-ساۋىق ورتالىقتارىندا تىركەلگەن. ويىن-ساۋىق ورتالىقتارى ادامدار كوپ جينالاتىن جانە ۇزاق ۋاقىت بولاتىن ورىن ەكەنىن ەسكەرە وتىرىپ, كوروناۆيرۋس ينفەكتسياسىنىڭ تارالۋ قاۋپى ارتادى.
ەلوردالىق «استانا جاستارى» جاستار رەسۋرستىق ورتالىعى قالالىق جاستار ساياساتى ماسەلەلەرى باسقارماسىنىڭ قولداۋىمەن 5 تامىز بەن 30 قاراشا ارالىعىندا كۆي ۆاكتسيناسىنىڭ ەكى كومپونەنتىن العان ستۋدەنتتەر اراسىندا ۆاكتسينالاۋ تۋرالى ۇزدىك بەينە-چەللەندجگە ارنالعان بايقاۋدى جالعاستىرۋدا. بايقاۋ جاستار اراسىندا COVID-19 تارالۋىنا قارسى كۇرەسۋ جانە ۆاكتسينادان وتۋگە ىنتالاندىرۋ, سونداي-اق ستۋدەنتتەر اراسىندا شىعارماشىلىق كلاستەردى قولداۋ ماقساتىندا وتكىزىلەدى. جەڭىمپازعا 1 ميلليون تەڭگە, ەكىنشى ورىن يەگەرى 300 مىڭ تەڭگە, ءۇشىنشى ورىن يەگەرى 200 مىڭ تەڭگە الادى. سونداي-اق بايقاۋعا قاتىسۋشىلار ءۇشىن «ارەنا fitness», Winox فيتنەس-زالدارىنىڭ تانىمال جەلىلەرىنەن جانە «حلەبنىي كراي» كومپانياسىنان ىنتالاندىرۋ سىيلىقتارى قاراستىرىلعان. كونكۋرسقا استانانىڭ ورتا ارناۋلى (كوللەدج) جانە جوعارى وقۋ ورىندارىنىڭ كامەلەتكە تولعان ستۋدەنتتەرى قاتىسا الادى, ولار وسى جىلدىڭ 5 تامىزى مەن 30 قاراشاسى ارالىعىندا نۇر-سۇلتاننىڭ كەز كەلگەن ەگۋ پۋنكتىندە ۆاكتسينادان ءوتىپ, ءتيىستى قۇجات الادى.