قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ 10 ايداعى الەۋمەتتىك-ەكونوميكالىق دامۋىنىڭ قورىتىندىسى, رەسپۋبليكالىق بيۋدجەتتىڭ اتقارىلۋى جانە ۇلتتىق حالىق ساناعىنىڭ قورىتىندىلارى جاريا ەتىلدى, دەپ حابارلايدى Egemen.kz شىمكەنت قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
10 ايداعى الەۋمەتتىك ەكونوميكالىق دامۋ كورسەتكىشتەردى بايانداعان ۇلتتىق ەكونوميكا ءمينيسترى اسەت ەرعاليەۆ ىشكى جانە سىرتقى ينۆەستيتسيالار تارتۋدا وڭ ءوسىم بار ەكەنىن اتاپ ءوتتى. رەسپۋبليكادا بيىلعى ون ايدا ءوندىرۋشى ەمەس سالالار بويىنشا ينۆەستيتسيا ءوسىمى 14,0 پايىزعا ارتىپ وتىر.
شىمكەنت قالاسى ينۆەستيتسيالار تارتۋ بويىنشا وڭىرلەر اراسىندا العاشقى ورىندا كەلەدى. قالامىزدا وتكەن جىلدىڭ ءتيىستى كەزەڭىمەن سالىستىرعاندا ينۆەستيتسيا تارتۋ كورسەتكىشى 41,2 پايىزعا ارتقان.
وتكەن ون ايدىڭ قورىتىندىسى بويىنشا قۇرىلىس سالاسىندا دا وڭ ءوسىم ساقتالىپ وتىر. شىمكەنت قالاسىندا بۇل كورسەتكىش وتكەن جىلمەن سالىستىرعاندا 11,8 پايىزعا وسكەن.
ەسەپتى كەزەڭدە ەلىمىزدە 11,6 ملن شارشى مەتر تۇرعىن ءۇي پايدالانۋعا بەرىلگەن. شىمكەنت قالاسىندا بۇل كورسەتكىش وتكەن جىلمەن سالىستىرعاندا 23,7 پايىزعا ارتقان.
ءا.ەرعاليەۆ 7 نەگىزگى ماكروەكونوميكالىق كورسەتكىش بويىنشا وڭ ءوسۋ الماتى, جامبىل وبلىسى, نۇر-سۇلتان جانە شىمكەنت قالالارىندا بايقالعانىن اتاپ ءوتتى.