سولتۇستىك قازاقستان وبلىسىندا جۇكتى ايەل كوروناۆيرۋس جۇقتىرىپ, دارىگەرلەر قولدان كەلگەنشە تىرىسقانىمەن, جاس انانىڭ ومىرىنە اراشا تۇسە المادى, دەپ حابارلايدى Egemen.kz.
سقو دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە, سوڭعى 3 كۇندە وڭىردە كوروناۆيرۋستى جۇقتىرۋدىڭ 438 جاڭا جاعدايى تىركەلدى. ەڭ كوپ اۋىرعاندار - پەتروپاۆلدا.
بۇگىندە جۇقپالى اۋرۋلار اۋرۋحاناسىندا 636 ادام ەم السا, ونىڭ 382-ءسى تۇراقتى تۇردە وتتەگى اپپاراتىندا جاتىر. جانساقتاۋ بولىمىندە جاتقان 51 ناۋقاستىڭ 16-نىڭ جاعدايى وتە اۋىر. سوڭعى تاۋلىكتە كوروناۆيرۋستان 3 ادام قايتىس بولدى. ال پاندەميا باستالعالى 317 ناۋقاس كوز جۇمدى.
«قايتىس بولعان جۇكتى كەلىنشەكتى كوروناۆيرۋس جۇقتىرعاندىقتان 31 اپتادا بوساندىرىپ الۋعا تۋرا كەلدى. اۋرۋ اسقىنىپ, وكپەسى قابىندى. قازىر ۋاكىلەتتى ورگاندار ساراپتاما جۇرگىزەدى. كوپبەيىندى اۋرۋحانانىڭ جانساقتاۋ ءبولىمى جاعدايىندا تولىق كولەمدە جۇرگىزىلگەن ەمدەۋ-دياگنوستيكالىق شارالار كەشەنىنە قاراماستان, بوسانعاننان كەيىنگى كەزەڭدە جۇكتى ايەلدىڭ ءومىرىن وكپەنىڭ جاپپاي زاقىمدانۋىنا بايلانىستى قۇتقارۋ مۇمكىن بولمادى. ايەل جۇكتىلىگىنە بايلانىستى ۆاكتسينا الماعان», دەيدى باسقارمانىڭ ءباسپاسوز حاتشىسى گۇلنار قاليەۆا.
ماماننىڭ ايتۋىنشا, جالپى جىل باسىنان بەرى 646 جۇكتى ايەل Covid-19 جۇقتىردى, ونىڭ 203-ىندە اۋرۋ اسقىنىپ, پنەۆمونياعا ۇلاسقان. 58 جۇكتى ايەلدى وكپەنى جاساندى جەلدەتۋ اپپاراتىنا قوسۋعا تۋرا كەلدى.
38 ايەلدى امان الىپ قالۋ ءۇشىن ومىرلىك كورسەتكىشتەرى بويىنشا كەسار تىلىگى ادىسىمەن مەرزىمىنەن بۇرىن بوساندى. كۇنى جەتپەي تۋعاندىقتان 3 شاقالاق قايتىس بولدى.