ونلاين رەجيمىندە وتكەن اپپاراتتىق كەڭەسكە قاتىسۋشىلار «اباي» شاحتاسىندا قازا تاپقان كەنشىلەردى ءبىر مينۋت ۇنسىزدىكپەن ەسكە الدى. شاحتاداعى جۇمىستار اپاتتىڭ ءمان-جايى تولىق انىقتالعانعا دەيىن توقتاتىلدى. قازىر «ارسەلورميتتال تەمىرتاۋ» اق-نىڭ بارلىق شاحتاسىندا تەكسەرۋ ءجۇرىپ جاتىر, دەپ حابارلايدى Egemen.kz.
قاراعاندى وبلىسىنىڭ اكىمى جەڭىس قاسىمبەك قالالار مەن اۋداندار اكىمدەرىنە وبلىستىڭ بارلىق ونەركاسىپتىك كاسىپورىندارىندا ەڭبەك قاۋىپسىزدىگىن جاپپاي تەكسەرۋ جۇرگىزۋدى تاپسىردى. بۇل ماسەلەگە بارىنشا جاۋاپتى قاراپ, نەمقۇرايدىلىققا جول بەرمەۋ كەرەكتىگىن قاداپ ايتتى.
ەسكە سالا كەتەيىك, كەشە «اباي» شاحتاسىندا كەنەتتەن مەتان تارادى. التى شاحتيور قايتىس بولدى, ەكەۋى اۋرۋحانادا جاتىر. جەڭىس مارالباەۆتى جانساقتاۋ بولىمىنەن بولىمشە پالاتاسىنا اۋىستىردى, ەلايدىن زەينالوۆتى دا پالاتاعا اۋىستىرۋعا دايىنداۋدا.
قازا تاپقاندار مەن زارداپ شەككەندەردىڭ وتباسىلارىنا بارلىق قاجەتتى كومەك كورسەتىلەدى. ماسەلە وبلىس اكىمىنىڭ جەكە باقىلاۋىندا.
«وبلىس اكىمدىگىنىڭ اتىنان قازا بولعانداردىڭ تۋىستارى مەن جاقىندارىنا قايعىرىپ كوڭىل ايتامىن. كەشە ءبىز مارقۇمداردىڭ وتباسىلارىنا باردىق. وسى قيىن-قىستاۋ كۇندەردە وبلىستىڭ بارلىق تۇرعىندارى سىزدەرمەن قايعى-قاسىرەتتى بولىسەدى», دەدى جەڭىس قاسىمبەك.