قر ەنەرگەتيكا مينيسترلىگى «جىلۋ ەنەرگەتيكاسى تۋرالى» زاڭ جوباسى مەن تۇجىرىمداماسىن ازىرلەدى, دەپ حابارلايدى Egemen.kz.
ۇسىنىلىپ وتىرعان زاڭ جوباسى ەلەكتر ەنەرگەتيكاسىنىڭ جۇمىس ىستەۋ نورمالارىن, ونىڭ ىشىندە ۇلتتىق ەلەكتر جەلىسىن, ەلەكتر ەنەرگياسى نارىعىن قالىپتاستىرۋ جانە ونىڭ قىزمەتىنىڭ نەگىزدەرىن بەلگىلەيدى.
«سونىمەن قاتار, ەلەكتر ەنەرگياسى نارىعىنىڭ قۇرىلىمى جىلۋ ەنەرگياسى نارىعىنان تۇبەگەيلى ايىرماشىلىققا يە. وسىعان بايلانىستى جىلۋ جانە ەلەكتر ەنەرگەتيكاسى سالالارىن ناقتى اجىراتۋدى قامتاماسىز ەتۋ قاجەت. بۇدان باسقا, ەلەكتر ەنەرگەتيكاسى سالاسىنا قاتىستى تۇتاس العاندا بۇكىل سالانىڭ جاي-كۇيى مەن دامۋىنا جاۋاپتى ۋاكىلەتتى ورگان - قازاقستان رەسپۋبليكاسىنىڭ ەنەرگەتيكا مينيسترلىگى ايقىندالدى. ال جىلۋ ەنەرگەتيكاسىنا قاتىستى تۇتاس العاندا بۇكىل سالاعا جاۋاپتى ۋاكىلەتتى ورگان جوق», دەلىنگەن قۇجاتتا.
جىلۋمەن جابدىقتاۋ سالاسىندا جۇمىس ىستەيتىن سۋبەكتىلەردىڭ, سونداي-اق تۇتىنۋشىلاردىڭ قۇقىقتارى مەن مىندەتتەرىنە قاتىستى قاعيداتتار مەن نورمالاردى بەلگىلەۋ جانە ورتالىق جانە جەرگىلىكتى مەملەكەتتىك بيلىك ورگاندارىنىڭ ءرولى مەن فۋنكتسيالارىن ايقىنداۋ جوسپارلانۋدا.
ەنەرگەتيكا مينيسترلىگىندە اتاپ وتكەندەي, سالا ءۇشىن بەرىك مامانداندىرىلعان قۇقىقتىق بازانىڭ بولماۋى ناقتى جانە ماڭىزدى پروبلەمالارعا - جىلۋمەن جابدىقتاۋ جۇيەلەرىنىڭ دامۋ قارقىنىنىڭ جەتكىلىكسىزدىگىنە, سالاعا ينۆەستيتسيالاردىڭ تومەن دەڭگەيىنە, جىلۋ ەنەرگەتيكاسىنىڭ تۇراقتى جانە الەۋمەتتىك باعدارلانعان دامۋداعى نەگىزگى نىسانالى كورسەتكىشتەردەن ارتتا قالۋىنا الىپ كەلدى.
«جاڭا زاڭناما سالانىڭ تەحنولوگيالىق جاڭارۋىن, تۇتىنۋشىعا سەنىمدى, ساپالى قىزمەت كورسەتۋ مۇمكىندىگىن, بيۋدجەتكە ەڭ از جۇكتەمە تۇسىرە وتىرىپ, قىزمەت كورسەتۋ كەزىندە شىعارىندىلاردىڭ ۇلەستىك جانە ابسوليۋتتىك دەڭگەيىن قىسقارتۋدى قامتاماسىز ەتۋگە مۇمكىندىك بەرۋى ءتيىس», دەپ ەسەپتەيدى ەنەرگەتيكا مينيسترلىگى.
قۇجاتتىڭ تولىق ءماتىنىن 26 قاراشاعا دەيىن قوعامدىق تالقىلاۋ ءۇشىن ورنالاستىرىلعان «اشىق نقا» سايتىنان كورۋگە بولادى.