الماتى وبلىسىندا وكپەسى 90% قابىنعان ايەل 47 كۇن جانساقتاۋ بولىمىندە جاتقان, دەپ حابارلايدى Egemen.kz.
الماتى وبلىسىنىڭ ىلە اۋدانىندا وكپەسى تولىق زاقىمدانعان جۇكتى ايەل قازىر ساۋىعىپ شىققان. ەمدەۋ ەكستراكورپورالدى مەمبرانالىق وكسيگەناتسيانى قولدانۋ ارقىلى ءوتتى. وكپەسى 90% زاقىمدانعان جۇكتى ايەل COVID-19 دياگنوزىمەن ىلە اۋداندىق ورتالىق اۋرۋحاناسىنا تۇسكەن. اۋرۋحانا ديرەكتورى باۋىرجان ىسقاق ايەلدىڭ ءومىرىن ەكمو اپپاراتىنىڭ كومەگىمەن امان الىپ قالعانىن ايتتى.
«9 تامىزدا 38-39 اپتا جۇكتىلىك مەرزىمى بار 27 جاستاعى ايەل وتە اۋىر حالدە ءتۇستى. وعان شۇعىل وپەراتسيا جاساپ, بالا امان-ەسەن تۋىلدى. بىراق ايەلدىڭ جاعدايى ناشارلادى, قاندى وتتەگىمەن بايىتۋ ءۇشىن ناۋقاستى ەكمو اپپاراتىنا قوسۋعا تۋرا كەلدى. 31 كۇننەن كەيىن ايەل ءوز بەتىنشە دەم الا الدى», دەدى اۋرۋحانا باسشىسى.
ءتورت بالانىڭ اناسى بايانسۇلۋ امانگەلديەۆا جانساقتاۋ ءبولىمىنىڭ مەديتسينا قىزمەتكەرلەرىنىڭ كومەگىمەن قايتادان ءوز بەتىنشە دەم الىپ, قوزعالاتىن حالگە جەتكەن.
«مەن 47 كۇن رەانيماتسيادا جاتتىم. سول كەزدەگى بار ارمانىم بالالارىمدى قايتادان كورۋ بولدى. اۋىرماي تۇرىپ قوعامدىق ورىندا جۇرگەندە بەتپەردە كيمەيتىنمىن, ول كەزدە بەتپەردەمەن اۋا جەتپەيتىن سياقتى كورىنگەن ەدى. ىندەت جۇقتىرىپ, دەم جەتپەي, تىنىسىم تارىلعان كەزدە, ساقتىق شارالارىن ساقتاماعانىما وكىندىم. ءوزىمنىڭ بەيقامدىعىم سالدارىنان اۋرۋحاناعا ءتۇسىپ, تۋىستارىم مەن دارىگەرلەردى اۋرە-سارساڭعا سالدىم. بۇگىندە قۇلان-تازا ايىعىپ, وتباسىما ورالدىم. بارىن سالىپ, مەنى ەمدەپ شىققان اق حالاتتىلارعا العىسىم شەكسىز», دەيدى ول.
ايتا كەتەيىك, ناۋقاس اۋرۋحانادا 58 كۇن بويى ەم العان. ونىڭ 47 كۇنىن رەانيماتسيادا وتكىزگەن. ودان بولەك, ىلە اۋدانىندىق اۋرۋحاناسىنىڭ دارىگەرلەرى وكپەسى 80% قابىنعان 5 جۇكتى ايەلدى ىندەتتەن امان الىپ شىققان.