الماتىدا قالا ىشىندە – 8 سم, تاۋ بوكتەرىندەگى اۋدانداردا – 10 سم, تاۋلى اۋدانداردا – 15 سم قار جاۋدى, دەپ حابارلايدى Egemen.kz.
قالالىق تۇرعىن ءۇي ساياساتى باسقارماسىنان ءمالىم ەتكەندەي, قازىرگى ۋاقىتتا تروتۋارلاردى, جاياۋ جۇرگىنشىلەر ايماقتارىن, قوعامدىق كولىك ايالدامالارىن قاردان تازارتۋ جۇمىستارى جۇرگىزىلۋدە.
«تۇنگى ساعات 03.30-دان باستاپ قار كۇرەۋ كولوننالارى ۇيىمداستىرىلدى. قار جيناۋعا 517 ارنايى تەحنيكا, ونىڭ ىشىندە 173 قۇم شاشقىش, 165 سىپىرۋشى-جيناۋ تەحنيكاسى, 52 قار قۇرساۋلاۋشى, 49 ساموسۆال, 9 اۆتوگرەيدەر جانە 1400 جول جۇمىسشىسى جۇمىلدىرىلدى. 185 قۇم شاشقىشتىڭ كۇشىمەن جولدارعا كوكتايعاققا قارسى ماتەريالدار سەبىلۋدە. كوكتايعاققا قارسى 4200 توننا ماتەريال پايدالانىلدى», دەدى باسقارمادان.
سونداي-اق, تاۋلى جانە تاۋ بوكتەرىندەگى اۋدانداردا قار شىعارۋ جۇمىستارى جۇرگىزىلۋدە. قالا اۋماعىنان جاپپاي قار شىعارۋ تاڭەرتەڭگى قاربالاس شاقتان كەيىن قولعا الىنادى. اۋدان اكىمدىكتەرىندە بۇل جۇمىستاردى باقىلاۋ بويىنشا تاۋلىك بويى كەزەكشىلىك ۇيىمداستىرىلدى.
قازگيدرومەتتىڭ بولجامىنا سايكەس, تۇندە اۋا تەمپەراتۋراسى مينۋس 13 گرادۋسقا دەيىن تومەندەدى. بۇگىن كۇندىز قار جاۋىپ, 6 گرادۋسقا دەيىن اياز كۇتىلەدى.