ۇلتتىق عىلىم اكادەمياسىنىڭ دەربەس شاڭىراق بولىپ قۇرىلۋىنا, ەلىمىزدىڭ ءبىلىم مەن عىلىم سالاسىنىڭ وركەندەۋىنە سانالى عۇمىرىن ارناعان مەملەكەت جانە قوعام قايراتكەرى, عالىم-لينگۆيست نۇرتاس وڭداسىنوۆتىڭ ەسىمىن ۇلىقتاۋ ماقساتىندا الماتىدا ەسكەرتكىش-بيۋست ورناتىلدى.
مەدەۋ اۋدانىنداعى شەۆچەنكو مەن قوناەۆ كوشەلەرىنىڭ قيىلىسىندا ورناتىلعان ەسكەرتكىشتىڭ اشىلۋ راسىمىنە قالانىڭ اكىمى باقىتجان ساعىنتاەۆ قاتىسىپ, عالىمنىڭ قوعام ومىرىندەگى ەرەن ەڭبەگى جايىندا ايتىپ ءوتتى. «ەلىمىزدىڭ تاريحىندا وشپەستەي ءىز قالدىرعان مەملەكەت جانە قوعام قايراتكەرى نۇرتاس وڭداسىنوۆ كوپتەگەن يگى ءىستىڭ باستاۋىندا تۇردى. ەل ءۇشىن قيىن زاماندا ۇلت مۇددەسى جولىندا باتىل قادامدارعا بارىپ, جوعارى لاۋازىمدى قىزمەتتە جۇرسە دە تاۋەلسىزدىكتىڭ ورناۋى, ءتىلىمىز بەن سالت-ءداستۇرىمىزدى قايتا جاڭعىرتۋ ءىسىن بارىنەن دە جوعارى قويا ءبىلدى. ەكىنشى دۇنيەجۇزىلىك سوعىس جانە ودان كەيىنگى ەڭ اۋىر جىلداردا ەل ۇكىمەتىن باسقاردى. رەسپۋبليكامىزدىڭ الەۋمەتتىك-ەكونوميكالىق دامۋىنا, مادەنيەتى مەن ونەرىنىڭ, عىلىمى مەن ءبىلىمىنىڭ وركەندەۋىنە بارىنشا كۇش سالدى. وسى ورايدا نۇرتاس وڭداسىنوۆتىڭ ونەگەلى ءومىرى مەن حالقىنا جاساعان قالتقىسىز قىزمەتىن ناسيحاتتاۋ, جاس ۇرپاقتىڭ ساناسىنا ءسىڭىرۋ – ابىرويلى مىندەتىمىز», دەپ اتاپ ءوتتى قالا اكىمى.
نۇرتاس وڭداسىنوۆ قازاق مەملەكەتتىك قىزدار پەداگوگيكالىق ينستيتۋتى مەن ۇلتتىق كونسەرۆاتوريانىڭ اشىلۋىنا, شەت تىلدەرى, دەنە تاربيەسى ينستيتۋتتارىنىڭ جانە بارلىق وبلىس ورتالىقتارىندا مۇعالىمدەر دايارلايتىن جوعارى وقۋ ورىندارىنىڭ قۇرىلۋىنا ۇيىتقى بولىپ, وركەندەۋى جولىندا ايانباي ەڭبەك ەتتى. ەلىمىزدەگى ەرتىس – قاراعاندى, ارىس – تۇركىستان, ءمىرزاشول كانالدارىنىڭ, اتىراۋ, تەمىرتاۋ, جەزقازعان, بالقاش, اقتوبە قالالارىنداعى ءىرى زاۋىتتاردىڭ, مويىنتى – شۋ تەمىر جولىنىڭ سالىنۋىنا تىكەلەي باسشىلىق ەتە ءجۇرىپ, وڭىرلەردىڭ دامۋى جولىنداعى ماڭىزدى جوبالاردىڭ باسى-قاسىندا ءجۇردى. بۇگىندە قايراتكەر تۇلعانىڭ قولتاڭباسى قاي سالادا بولسىن ايشىقتالىپ تۇر.