قازاقستاندا 9 ايدا 63 مىڭنان استام كولىك شىعارىلدى. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 25,5% جوعارى, دەپ حابارلايدى Egemen.kz.
ولاردىڭ باسىم بولىگىن جەڭىل اۆتوموبيلدەر ءوندىرىسى قۇراپ, اتالعان كەزەڭدە 55 016 كولىك شىعارىلعان. سونداي-اق, 6971 جۇك تەحنيكاسى, 872 اۆتوبۋس, 489 تىركەمە جانە جارتىلاي تىركەمە, 211 مامانداندىرىلعان تەحنيكا ءوندىرىلدى. شىعارىلعان اۆتوكولىكتەردىڭ جارتىسىنا استامى «سارىارقااۆتوپروم» كاسىپورنىنا تيەسىلى.
قوستاناي زاۋىتىندا 38 309 جەڭىل, جۇك اۆتوموبيلدەرى مەن اۆتوبۋستار ءوندىرىلدى. الماتىداعى Hyundai Trans Kazakhstan كومپانياسى 19585 اۆتوكولىك, سەمەيدەگى سەماز 3 155 كوممەرتسيالىق تەحنيكا, كوكشەتاۋداعى «كاماز ينجينيرينگ» 1 115 جۇك كولىگىن, Hyundai Trans Auto 586 كوممەرتسيالىق اۆتوكولىك, Daewoo Bus Kazakhstan 207 تەحنيكا, ساران قالاسىنداعى QazTehna جاڭا زاۋىتى Yutong 143 اۆتوبۋس شىعاردى.
قازاقستانداعى كاسىپورىنداردا يگەرىلگەن ەڭ تانىمال برەندتەر بەستىگى (ەكسپورتتى قوسا العاندا): Chevrolet (23 556 بىرلىك), Hyundai (19 643 بىرلىك), Kia (6 871 بىرلىك), JAC (4 488 بىرلىك) جانە GAZ (3 149 بىرلىك). قازاقستاندا شىعارىلعان اۆتوموبيلدەر ەكسپورتى سالانى دامىتۋ ءۇشىن ستراتەگيالىق ماڭىزدى بولىپ قالا بەرەدى.
2021 جىلدىڭ 9 ايىندا دايىن اۆتوموبيلدەردى جەتكىزۋ 43% ارتىپ, 52,4 ملرد تەڭگەگە 7 816 كولىك شەتەلگە شىعارىلدى. ولاردىڭ نەگىزگى بولىگى رەسەيگە (4 346 بىرلىك), وزبەكستانعا (2 968 بىرلىك), بەلارۋسكە (398 بىرلىك), قىرعىزستانعا (102 بىرلىك) جانە ازىربايجانعا (2 بىرلىك) ساتىلعان.