شقو-دا ءبىر كۇندە جول اپاتىنان بەس ادام قازا تاپتى

العاشقى ەكى قايعىلى وقيعا سەمەي قالاسىنىڭ ماڭىندا قالا سىرتىنداعى تاس جولدا بولدى.

«وسى جىلدىڭ 28 قازانىندا ساعات 18:15-تە قالا ماڭىنداعى اۆتوجولدا «Volkswagen» ماركالى اۆتوكولىكتىڭ 21 جاستاعى جۇرگىزۋشىسى 2012 جىلى تۋعان, كامەلەتكە تولماعان جاياۋ جۇرگىنشى بالانى قاعىپ كەتتى, ول العان جاراقاتتارىنىڭ سالدارىنان وقيعا ورنىندا كوز جۇمدى. بالا جالعىز جۇرگەن.

سول كۇنى, كەشكى ۋاقىتتا «سەمەي-تاليتسا» باعىتىنداعى اۆتوجولدا 66 جاستاعى «پاز» ماركالى اۆتوبۋستىڭ جۇرگىزۋشىسى جولدىڭ ءجۇرىس بولىگىندە تۇرعان 45 جاستاعى ەر ادامدى قاعىپ كەتتى. زارداپ شەككەن ادام العان جاراقاتىنان وقيعا ورنىندا كوز جۇمدى», دەلىنگەن شقو پد ءباسپاسوز قىزمەتى تاراتقان حابارلامادا.

ءۇشىنشى جكو پاۆلودار وبلىسىنا 1 كم جەتپەي «ومبى-مايقاپشاعاي» اۆتوجولىندا تىركەلدى, وندا «حوندا» ماركالى اۆتوكولىگىنىڭ جۇرگىزۋشىسى جىلدامدىق رەجيمىنىڭ اسىپ كەتۋىنەن رولگە يە بولا الماعان, ناتيجەسىندە كولىك اۋدارىلعان. العان جاراقاتتان جۇرگىزۋشى دە, كولىكتە بولعان ەكى جولاۋشى دا وقيعا ورنىندا ءتىل تارتپاي كەتتى.

ء«اربىر فاكتى بويىنشا قر قك-ءنىڭ 345-بابى 3 جانە 4-بولىگى بويىنشا (كولىك قۇرالدارىن باسقاراتىن ادامداردىڭ ابايسىزدا ادام ولىمىنە اكەپ سوققان جول قوزعالىسى ەرەجەلەرىن بۇزۋى) سوتقا دەيىنگى تەرگەۋ ارەكەتتەرى باستالدى. جوعارىدا اتالعان جكو-نىڭ بىرىندە جاس بالا قايتىس بولعان, ونىڭ ولىمىنە كىنالى جاس جىگىت قر قىجك-ءنىڭ 128-بابىنىڭ تارتىبىمەن ۋۇي-نا قاماۋعا الىندى. زارداپ شەككەندەردىڭ وتباسىنا قايعىرىپ كوڭىل ايتامىز. قازىر قىلمىستىق ىستەر اياسىندا وبەكتيۆتى تەرگەۋ قامتاماسىز ەتىلۋدە, تەرگەۋ ارەكەتتەرى جالعاسۋدا, سوت ساراپتامالارى تاعايىندالدى», دەيدى شقو پد باستىعى ساعات ماديەۆ.

سونداي-اق, وڭىردە جول قوزعالىسى قاۋىپسىزدىگى ماسەلەلەرىنە ەرەكشە كوڭىل بولىنەتىنىن ايتا كەتۋ قاجەت. جىل باسىنان بەرى پوليتسەيلەر:

جۇرگىزۋشىلەردىڭ جول قوزعالىسى ەرەجەلەرىن ساقتاماۋىنا بايلانىستى 200 مىڭعا جۋىق ءتۇرلى قۇقىق بۇزۋشىلىقتىڭ جولىن كەستى; كولىك قۇرالدارىن الكوگولدىك نەمەسە ەسىرتكىلىك ماس كۇيىندە باسقارعان, كەيىننەن كولىك جۇرگىزۋ قۇقىعىنان ايىرىلعان 1 372 جۇرگىزۋشى ۇستالدى; قر قك-ءنىڭ 346-بابى بويىنشا كولىك قۇرالدارىن ماس كۇيدە باسقارعان, بۇرىن سوتپەن وسىنداي قۇقىق بۇزۋشىلىقتار ءۇشىن كولىك جۇرگىزۋ قۇقىعىنان ايىرىلعان 110 ادام انىقتالىپ, قىلمىستىق جاۋاپكەرشىلىككە تارتىلدى; ۋاكىلەتتى ورگاندارعا ورىن العان كەمشىلىكتەردى جويۋ ءۇشىن 4 مىڭنان استام ۇيعارىم جولداندى جانە جول ينفراقۇرىلىمىمەن جانە جول قوزعالىسى قاۋىپسىزدىگىن ۇيىمداستىرۋمەن بايلانىستى بۇزۋشىلىقتار, جالپى العاندا, ءارتۇرلى اكىمشىلىك جاۋاپكەرشىلىككە 222 لاۋازىمدى تۇلعا تارتىلعان; - جكو-نىڭ الدىن الۋ ماقساتىندا رەسپۋبليكالىق جانە جەرگىلىكتى قوزعالىس تاس جولدارىندا قاراۋسىز جايىلىپ جۇرگەن 16 مىڭنان استام جانۋار ايدالىپ, «مال تۇراعىنا» ورنالاستىرىلدى, بۇل رەتتە ولاردىڭ 6 مىڭ يەسى قر اقبتك-ءنىڭ 408-بابى بويىنشا اكىمشىلىك جاۋاپكەرشىلىككە تارتىلدى.

بۇدان باسقا, پوليتسيا دەپارتامەنتىنىڭ باستاماسى بويىنشا قالالار مەن وزگە دە ەلدى مەكەندەردە جول توسەمدەرىن قايتا جاڭارتۋ جۇرگىزىلۋدە, بۇگىنگى كۇنى 145 مىڭ شارشى مەتر جول تاڭبالارى, 1 مىڭ مەتر شۋ جولاقتارى سالىندى, قوسىمشا 74 جارىقديودتى بەلگى جانە 7 جاڭا باعدارشام نىسانى ورناتىلدى.