قازاقستان-گەرمانيا: ىنتىماقتاستىقتىڭ جاڭا كەزەڭى

ساپار شەڭبەرىندە دەلەگاتتار «J. A. Woll Handels GmbH», «EOS GmbH», «Gigaset AG», «Svevind Group», «Schaeffler AG» سياقتى ءىرى كومپانيالاردىڭ باسشىلارىمەن كەلىسسوزدەر جۇرگىزدى, وندا اكت, ەنەرگەتيكا, ساۋدا, ماشينا جاساۋ جانە ت.ب. سالالارداعى الەۋەتتى جوبالاردى ىسكە اسىرۋ ماسەلەلەرى تالقىلاندى.

وسىلايشا, گەرمانيانىڭ جەتەكشى ساۋدا جەلىلەرىنىڭ بىرىمەن «J. A. Woll Handels GmbH» كەزدەسۋدە كاسىپورىننىڭ قازاقستاندا ءوندىرىستى ۇيىمداستىرۋعا قاتى­سۋ مۇمكىندىگى قاراستىرىلدى. «EOS GmbH» باسشىلىعىمەن كەلىسسوزدەر بارىسىندا كومپانيا گەرمانيا ورتالىقتارىنا ۇقساس قازاقستان اۋماعىندا يننو­ۆاتسيالىق ورتالىق جانە وقۋ كۋرس­تارىن اشۋعا مۇددەلىلىگى تۋرالى مالىمدەدى.

«Svevind Group» نەمىس كوم­پانياسىنىڭ پرەزيدەنتى ۆولف­گانگ كروپپەن كەزدەسۋدە تاراپتار قازاقستاندا «جاسىل» سۋتەگى ءوندىرىسى بويىنشا جوبانى ىسكە اسىرۋ شەڭبەرىندە ۇكىمەت تاراپىنان مەملەكەتتىك قولداۋ كورسەتۋ ماسەلەلەرىنە ەرەكشە نازار اۋداردى. بيىلعى 13 قىركۇيەكتە كومپانيانىڭ ەل پرە­زيدەنتى ق.توقاەۆپەن ەكى جاق­تى كەزدەسۋى ءوتتى, ال 6 قازاندا قازاق­ستاندىق دەلەگاتسيانىڭ شۆە­تسياعا ساپارى بارىسىندا «Svevind Group» كومپانياسىمەن 2031 جىلعا دەيىنگى جوبانى ىسكە اسىرۋ بويىنشا جول كارتاسىنا قول قويىلدى.

سونىمەن قاتار ساپار اياسىندا الەمنىڭ جەتەكشى ماشينا جاساۋ كومپانيالارىنىڭ ءبىرى «Schaeffler AG» الاڭىندا پرەمەر-ءمينيستردىڭ ورىنباسارى ر.سكلياردىڭ توراعالىعىمەن ىسكەرلىك توپتاردىڭ, سونداي-اق ەكى ەلدىڭ بيزنەس-قوعامداستىق­تارىنىڭ 70-كە جۋىق وكىلىنىڭ قاتىسۋىمەن «ماشينا جاساۋداعى جاڭا تەحنولوگيالار-تسيفرلاندىرۋ ءوسۋ درايۆەرى رەتىندە» تاقىرىبىندا دوڭگەلەك ۇستەل ۇيىمداستىرىلدى.

ءىس-شارانى اشقان پرەمەر-ءمينيستردىڭ ورىنباسارى ر.سكليار ماشينا جاساۋ سالاسىن قوسا العاندا, ەكونوميكانىڭ ءتۇرلى سالاسىندا قازاقستانمەن ءوزارا ءتيىمدى ىنتىماقتاستىقتى نى­عاي­تۋداعى گەرمان بيزنەسىنىڭ ماڭىزدى ءرولىن اتاپ ءوتتى.

ء«بىزدىڭ ەلدەرىمىز اراسىندا بارلىق دەڭگەيدە ونەركاسىپتىك, ساۋدا-ەكونوميكالىق, تەحنولو­گيا­لىق جانە باسقا دا سالالاردا بىرلەسكەن جۇمىس ءجۇرىپ جاتىر. تابىستى ىنتىماقتاستىقتىڭ جارقىن مىسالدارىنىڭ ءبىرى – CLAAS كومپانياسىمەن بىرلەسىپ جۇزەگە اسىرىلاتىن سولتۇس­تىك قازاقستان وبلىسىندا اۋىل شارۋا­شىلىعى تەحنيكاسىن ءون­دىرۋ بويىنشا جوبا. بۇل – نەمىس ينۆەس­تورلارىنىڭ قازاقستانداعى قىز­مەتىن دامىتۋعا دەگەن جوعارى سەنىمىنىڭ تاعى ءبىر دالەلى», دەدى ر.سكليار.

سونداي-اق «Schaeffler AG» پرە­زيدەنتى كلاۋس روزەن­فەلد ءوزىنىڭ قۇتتىقتاۋ سوزىن­دە گەرمانيانىڭ قازاق­ستان­مەن ينۆەستيتسيالىق ىنتىماق­تاستى­عىنىڭ الەۋەتىن جوعارى باعالاپ, كومپانيا قازاق­ستاننىڭ ونەركاسىپتى جاڭعىر­تۋ­داعى ارىپتەسى بولۋعا دايىن ەكە­نىن اتاپ ءوتتى.

«گەرمانيا – الەمدەگى ماشينا جاساۋ سالاسىنداعى كوشباس­شى­لاردىڭ ءبىرى. ءبىز ءۇشىن يننو­ۆاتسيالىق تەحنولوگيالار ترانس­فەرتى, ماشينا جاساۋدا بىرلەسكەن وندىرىستەر قۇرۋ وتە ماڭىزدى, ءبىز سونداي-اق گەرمانيا ينۆەستورلارىن قازاقستانعا شاقىرامىز», دەدى قازاقستان ماشينا جاساۋشىلار وداعىنىڭ باسقارما توراعاسى مەيرام پىشەمباەۆ. سونداي-اق كەزدەسۋ بارىسىندا م.پىشەمباەۆ مۇناي-گاز, ماشينا جاساۋ, تاۋ-كەن مەتاللۋرگيالىق, اگرو­ونەر­كاسىپتىك كەشەنگە ار­نالعان ما­شينا جاساۋ, جاڭارتىلاتىن ەنەر­گيا كوزدەرى سياقتى سەكتور­لار بويىنشا ونەركاسىپتىك كوو­­پە­راتسيا مەن بىرلەسكەن ىنتىماق­تاستىقتىڭ پەرسپەكتيۆالارى تۋرالى ايتىپ بەردى.

سونىمەن قاتار «KAZAKH INVEST» ۇك» اق باسقارما تور­اعاسى مەيىرجان يۋسۋپوۆ قازاق­ستاننىڭ ينۆەستيتسيالىق الەۋەتى, سونداي-اق ينۆەستيتسيالار تارتۋدىڭ مەملەكەتتىك جۇيەسىن­دە قولدانىلاتىن جەڭىلدىكتەر جانە قازاقستانداعى شەتەلدىك بيزنەستىڭ جۇمىسى ءۇشىن قولايلى احۋال تۋعىزاتىن باسقا دا قۇرال­دار تۋرالى بايانداما جاسادى. «بۇگىندە قازاقستان ەكونوميكانى ارتاراپتاندىرۋعا جانە بيزنەس پەن ينۆەستيتسيا ءۇشىن قولاي­لى جاعداي جاساۋعا باعىتتالعان كەڭ اۋقىمدى رەفورمالار جۇر­گىزۋدە. وسىلايشا, ءبىزدىڭ ەل­دەرى­مىز اراسىنداعى ەكىجاقتى قاتى­ناستار مەن ينۆەستيتسيالىق ىنتىماقتاستىقتى نىعايتۋ تۋرالى ايتا وتىرىپ, ەل باسشىلىعى گەرمانياعا ەرەكشە نازار اۋداراتىنىن اتاپ وتكەن ءجون. بولاشاقتا وسىنداي قولداۋ ارقىلى بىرلەس­كەن ينۆەستيتسيالىق جوبالاردى ىسكە اسىرا باستايمىز دەپ ۇمىتتەنەمىن. ءبىز گەرمانيامەن قارىم-قاتىناسىمىزدى نىعايتۋ ءۇشىن بىرتىندەپ قادامدار جاساپ جاتىرمىز. ايتا كەتۋ كەرەك, قازاقستاندى ءوز ينۆەستيتسيا­لارىنىڭ مەجەلى ورنى رەتىندە قاراستىراتىن بىرنەشە گەرمانيا­لىق كومپانيالار بار», دەدى م.يۋسۋپوۆ.

بۇدان باسقا, ءىس-شارا اياسىندا «KAZAKH INVEST» ۇك» اق جانە گەرمان ەكونوميكاسى شىعىس كوميتەتىنىڭ قاتىسۋىمەن ينۆەستيتسيالىق جوبالار جو­نىن­دەگى ۇيلەستىرۋ كوميتەتىنىڭ 1-ءشى وتى­رىسى ۇيىمداستىرىلدى. ون­دا قازاقستان پرەزيدەنتى ق.توقاەۆتىڭ 2019 جىلى گفر-عا رەسمي ساپارى بارىسىندا قول قويىلعان بىرلەسكەن جوسپارعا سايكەس ينۆەستيتسيالىق جوبالار مەن ۋاعدالاستىقتاردى ىسكە اسىرۋ شەڭبەرىندەگى بىر­لەس­كەن جۇمىستىڭ ارالىق قورىتىن­دىلارى شىعارىلدى.

وتىرىس بارىسىندا ر.سكليار بۇگىنگى تاڭدا بىرلەسكەن جوبالاردى جۇزەگە اسىرۋدا بەلگىلى ءبىر جەتىستىكتەرگە قول جەتكىزىل­گەنىن اتاپ ءوتتى. سونداي-اق ين­دۋست­ريالاندىرۋ جانە ينۆەستي­تسيالار سالاسىنداعى ۇيلەستى­رۋ كوميتەتىنىڭ جۇمىس ىستەۋى قازاق­ستان مەن گەرمانيا اراسىنداعى ىسكەرلىك بايلانىستاردى كەڭەي­تۋگە جانە ءوزارا ءتيىمدى ىنتىماق­تاستىقتى نىعايتۋعا جاڭا سەرپىن مەن قوماقتى ۇلەس قوساتىنى اتاپ ءوتىلدى.

ءوز كەزەگىندە گەرمان ەكونوميكاسى شىعىس كوميتەتىنىڭ اتقارۋشى ديرەكتورى ميحاەل حارمس ەكى ەل اراسىنداعى ساۋدا-ەكونوميكالىق جانە دوس­تىق بايلانىستاردى نى­عايتۋ ماقساتىندا شىعىس كوميتەتى قازاقستاندىق تاراپپەن بىرلەسكەن جوبالاردى ىسكە اسىرۋ بويىنشا ودان ءارى جۇمىس ىستەۋ ءۇشىن بار كۇشىن سالاتىنىن مالىمدەدى. وتىرىس شەڭبەرىندە كوميتەت بىرلەسكەن جوبالاردىڭ تىزبەسىن بەكىتتى, سونداي-اق بىرلەسكەن جوبالاردى ىسكە اسىرۋ مونيتورينگىنىڭ ناتي­جەلەرى بويىنشا وتىرىس­تار وتكىزۋ ۋاعدالاستىققا قول جەتكىزىلدى.

ايتا كەتۋ كەرەك, قازاقستاندىق دەلەگاتسيانىڭ گەرمانياعا ساپارى بارىسىندا «adidas AG» جانە «PUMA SE» كومپانيالارىنىڭ باسشىلىعىمەن كەزدەسۋلەر جانە وندىرىستىك الاڭداردى ارالاۋ ۇيىمداستىرىلدى.