قر ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ قر الەۋمەتتىك كودەكسىنىڭ تۇجىرىمداماسى قاشان قابىلداناتىنىن ايتتى, دەپ حابارلايدى Egemen.kz.
«مينيسترلىك قر الەۋمەتتىك كودەكسىنىڭ تۇجىرىمداماسىن ازىرلەۋدە. ول 2022 جىلى قابىلدانادى, ال كودەكستىڭ ءوزىن 2023 جىلى قابىلداۋدى جوسپارلاپ وتىرمىز. الەۋمەتتىك كودەكستىڭ باستى جاڭالىقتارىنىڭ ءبىرى الەۋمەتتىك قىزمەتتى جەتىلدىرۋ جانە ارناۋلى الەۋمەتتىك قىزمەتتەر كورسەتۋ جونىندەگى جەكە تاراۋ بولادى», دەدى ا. سارباسوۆ تمد-عا قاتىسۋشى مەملەكەتتەردىڭ ەڭبەك, جۇمىسپەن قامتۋ جانە حالىقتى الەۋمەتتىك قورعاۋ جونىندەگى كونسۋلتاتيۆتىك كەڭەسىنىڭ وتىرىسىندا.
ونىڭ ايتۋىنشا, الەۋمەتتىك قىزمەت مودەلى جاڭعىرتىلادى.
«الەۋمەتتىك قىزمەتكەرلەردى اككرەديتتەۋ, اتتەستاتتاۋ, جان باسىنا قارجىلاندىرۋدىڭ جاڭا مودەلى ەنگىزىلەدى, الەۋمەتتىك قىزمەتكەرلەردىڭ مارتەبەسى ارتادى جانە تاعى باسقا شارالار قابىلدانادى», دەدى اقمادي سارباسوۆ.
ايتا كەتەيىك, بۇگىن ونلاين رەجيمدە تمد-عا قاتىسۋشى مەملەكەتتەردىڭ ەڭبەك, جۇمىسپەن قامتۋ جانە حالىقتى الەۋمەتتىك قورعاۋ جونىندەگى كونسۋلتاتيۆتىك كەڭەسىنىڭ XXXIV وتىرىسى ءوتتى.