«نۇر وتان» پارتياسى جانىنداعى سىبايلاس جەمقورلىققا قارسى رەسپۋبليكالىق قوعامدىق كەڭەستىڭ توراعاسى جانە پارتيانىڭ ماجىلىستەگى فراكتسياسىنىڭ مۇشەسى قايىربەك سۇلەيمەنوۆ تۇڭعىش رەت ازاماتتاردى قابىلدادى.
قابىلداۋعا 20-عا تارتا ادام جازىلىپتى. ولاردىڭ دەنى قارجى پوليتسياسى مەن مەملەكەتتىك ورگاندار قىزمەتكەرلەرىنە, سونداي-اق, سوت جۇيەسىنە شاعىمدارىن ايتا كەلىپتى. بۇل رەتتە قىلمىستىق ىستەرگە قاتىستى سوت شەشىمدەرىنە ريزا ەمەستىگىن ءبىلدىرىپ جاتقاندار دا بولدى. مىسالى, كوكشەتاۋ قالاسىنىڭ تۇرعىنى اسەم شامگۋنوۆا اقمولا وبلىسىنداعى ەكونوميكالىق جانە سىبايلاس جەمقورلىققا قارسى كۇرەس دەپارتامەنتى قىزمەتكەرلەرىنىڭ ۇستىنەن شاعىمدانىپ, قىلمىستىق ءىس قوزعاۋ قاۋلىسىمەن كەلىسپەيتىندىگىن جەتكىزدى. ال اۋىل تۇرعىنى گالينا سيكاچينو استانا قالاسى اۋدانارالىق مامانداندىرىلعان سوتىنىڭ قىلمىستىق ءىس جونىندەگى شەشىمىمەن كەلىسپەيتىندىگىن ءبىلدىردى.
سونداي كەلىسپەۋشىلىگىن ءبىلدىرىپ, كەشە قوعامدىق قابىلداۋعا وليمپيادا چەمپيونى باقىت ءسارسەكباەۆ تا باس سۇقتى. ول قايىربەك سۇلەيمەنوۆتەن الاياقتىق دەرەگى بويىنشا قىلمىستىق ءىس ماسەلەسىن قاراۋدى سۇرادى. ونىڭ ايتۋىنشا, پاتەر سىيعا تارتىلعان جاتتىقتىرۋشى ماحمۇدوۆ وزىنە العان مىندەتتەمەسىن ورىنداماعان. ال اتالعان باسپاناعا ءبىر تيىن سالماعان ءۇشىنشى جاق ونى يەلەنۋگە تالپىنىپ جاتقانعا ۇقسايدى. ونىڭ ۇستىنە, وليمپيادا چەمپيونى ءوزىن جانە سەنىمدى وكىلىن سۋديا سوت پروتسەسىنە شاقىرماي, سىرتتاي شەشىم شىعارعانىنا كەلىسپەيتىندىگىن ءبىلدىردى. ال سەنىمدى وكىلدىڭ سىرقاتتانىپ قالۋى تۋرالى انىقتاماسى بولا تۇرا, ونى سۋديا قاپەرگە الماعان. ءسويتىپ, سوت ەرتەسىنە تاڭەرتەڭگىسىن ءوتىپ, جاپا شەگۋشى جاقتىڭ قاتىسۋىنسىز شەشىم شىعارىلعان.
سپورتشىنىڭ شاعىمىن تىڭداپ بولعان سوڭ, ق.سۇلەيمەنوۆ سوتتىڭ زاڭسىز شەشىم قابىلداۋى بويىنشا دەرەكتى انىقتاۋ ءۇشىن شاعىمدى جوعارعى سوتقا جولدايتىنىن ايتتى. سارسەكباەۆتىڭ باسىنداعى جاعدايعا تۇسىنىك بەرە كەتكەن «نۇر وتان» پارتياسى رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى رۋسلان اساۋباەۆ ەشكىم سوتتار مەن تەرگەۋ ورگاندارىنىڭ جۇمىسىنا ارالاسا المايتىنىن, بۇل جەردە ماسەلە پارتيا تاراپىنان جاپا شەگۋشىگە قۇقىقتىق كەڭەس بەرىلەتىندىگىندە ەكەنىن جەتكىزدى. وندا دا قۇقىقتىق قولداۋ تەگىن نەگىزدە جاسالادى. ياعني بارلىق ءتيىستى قاعازدارى رەتتەلگەننەن كەيىن قورعاۋشىلار ىسكە كىرىسەتىن بولادى.
جالپى, پارتيانىڭ ورتالىق قوعامدىق قابىلداۋ بولمەسىنىڭ مەڭگەرۋشىسى جىل باسىنان بەرى جەتى دەپۋتات پەن جەتى مەملەكەتتىك ورگان لاۋازىمدى تۇلعالارىنىڭ قابىلداۋىندا مىڭعا تارتا ادامنىڭ بولعانىن العا تارتتى. ونىڭ ايتۋىنشا, 2014 جىلدىڭ قاڭتارى مەن 1 اقپانى ارالىعىندا قۇقىق قورعاۋ ورگاندارى مەن سوت جۇيەسىنە شاعىمدانعان 194 ارىز ءتۇسىپتى. ولاردىڭ ىشىندە 72 ادام سوت شەشىمدەرىمەن كەلىسپەيتىندىكتەرىن بىلدىرسە, 61-ءى سوت شەشىمدەرىنىڭ ورىندالمايتىنىنا شاعىمدانعان. جانە دە مەملەكەتتىك قىزمەتكەرلەردىڭ ارەكەتتەرى مەن ارەكەتسىزدىكتەرى ءۇشىن دە 88 ادام شاعىمدارىن ايتا كەلگەنى ءمالىم بولدى. بۇدان باسقا 275 ازاماتقا زاڭدىق كەڭەس بەرىلىپتى.
اسقار تۇراپباي ۇلى,
«ەگەمەن قازاقستان».