قازاقستاننىڭ كاناداداعى ەلشىسى كونستانتين جيگالوۆ كينگستون قالاسىندا (يامايكا) بولىپ, گەنەرال-گۋبەرناتور پاتريك اللەنگە سەنىم گراموتاسىن تاپسىردى. ك.جيگالوۆ ءسويتىپ, يامايكادا قازاقستاننىڭ ەلشىسى قىزمەتىن قوسا اتقاراتىن العاشقى ەلشى بولىپ وتىر.
پ.اللەنمەن اڭگىمە شەڭبەرىندە ك.جيگالوۆ قازاقستاننىڭ 2014-2020 جىلدارعا ارنالعان سىرتقى ساياسات تۇجىرىمداماسىنا سايكەس, قازاقستان تاراپى كاريب وڭىرىمەن, ونىڭ ىشىندە ساياسي سالماعى جوعارى يامايكامەن قارىم-قاتىناسقا ۇلكەن ماڭىز بەرەتىنىن اتاپ كورسەتتى. گەنەرال-گۋبەرناتور ءوز ەلىنىڭ قازاقستانمەن كوپجاقتى ىنتىماقتاستىقتى دامىتۋعا مۇددەلى ەكەنىن قۋاتتادى.
يامايكا سىرتقى ىستەر جانە سىرتقى ساۋدا ءمينيسترى ارنولد نيكولسونمەن كەلىسسوز بارىسىندا ەكىجاقتى ىنتىماقتاستىق پەن حالىقارالىق ماسەلەلەر, ونىڭ ىشىندە بۇۇ شەڭبەرىندەگى ءوزارا قولداۋ كورسەتۋ جايى تالقىلاندى.
يامايكا تۋريزم ءمينيسترى ۆايكەم ماكنەيل قازاقستان ەلشىسىمەن كەزدەسۋى كەزىندە وتكەن جىلى يامايكادا بولعان قازاقستاندىق تۋريستەر سانى وسە تۇسكەنىن اتاپ ءوتىپ, ولاردىڭ ودان ءارى كوبەيۋىنە قىزىعۋشىلىق تانىتتى.
وسى ەلدىڭ يندۋستريا, ينۆەستيتسيا جانە ساۋدا ءمينيسترى ەنتوني حيلتونمەن كەزدەسۋ كەزىندە ساۋدا-ينۆەستيتسيالىق ارىپتەستىكتى دامىتۋدىڭ پەرسپەكتيۆالارى تالقىلاندى. ە.حيلتون قازاقستاندىق كومپانيالاردى يامايكاداعى جاڭا حالىقارالىق لوگيستيكالىق حابتى دامىتۋعا قاتىسۋعا شاقىردى.
«ەگەمەن-اقپارات».