ەلىمىزدەگى ۆاليۋتا باعامىنا قاتىستى وزگەرىستەر ەشكىمدى بەي-جاي قالدىرمايتىنى بەلگىلى. العاشقى ەكى-ءۇش كۇندە ارقيلى پىكىر بوي كورسەتىپ جاتسا, وعان دا تاڭعالۋدىڭ قاجەتى جوق. ويتكەنى, ادامدار قوعام تىنىسىنان شەت قالا المايدى. ءبىز الەمدىك ۇردىسپەن قاتار قادام باساتىن ەلدىڭ ازاماتتارىمىز. سوندىقتان, مۇنداي ءۇردىس بۇرىن دا بولعانىن, ودان سۇرىنبەي وتكەنىمىزدى ەستە ۇستاۋ كەرەك.
ارينە, ءدال قازىرگى تۇستا ءبارى بيلىكتىڭ يكەمدىلىگى مەن ىلكىمدى قىزمەتىنە بايلانىستى ەكەندىگىن ايتقىم كەلەدى. بيلىك بارىمىزگە ءتيىمدى, باتىل قادامدار جاساپ جاتىر. ەلىمىزدەگى اۋىل شارۋاشىلىعى ونىمدەرى مەن وتاندىق تاۋارلار باعاسى قىمباتتامايدى. قازاقستان فەرمەرلەرى وداعىنىڭ ماجىلىسىندە, ءوزىم باسقاراتىن قازاقستاننىڭ ەت-ءسۇت وداعىنىڭ جينالىسىندا وسى ماسەلەلەر ناقتى دالەلدەرمەن سيپاتتالدى. ۇكىمەت قۇرعان جۇمىس توپتارى بەلسەندىلىك تانىتۋدا. ونى باق ماتەريالدارىنان, تەلەديدار حابارلارىنان كورىپ وتىرمىز.
يمپورتتالاتىن تاۋار قۇنى وسكەنىمەن, وتاندىق ءونىم باعاسى قىمباتتامايدى. كەرىسىنشە, ولاردىڭ باسەكەگە قابىلەتتىلىگى ارتادى. ماسەلەن, ەلىمىزدە تۇتىنىلاتىن قۇرعاق ءسۇت ونىمدەرى نەگىزىنەن بەلارۋس ەلىنەن جەتكىزىلەتىن. ولاردىڭ باعاسى جەرگىلىكتى تابيعي سۇتتەن تومەن بولعاندىقتان, تاسىمالداناتىن ونىمگە سۇرانىس جوعارى ەدى. ەندى باعا تەڭەسەتىندىكتەن, حالىق تابيعي ونىمگە باسىمدىق بەرەدى دەپ ەسەپتەيمىن. جالپى, دوللار باعامىنىڭ كوتەرىلۋى ىشكى نارىق ءۇشىن ءتيىمدى. سوندىقتان, ەلدەگى ينفلياتسيا ءبىزدىڭ باعا ساياساتىمىزعا اسەر ەتپەيدى. دەمەك, جەرگىلىكتى تاۋار وندىرۋشىلەر ءۇشىن ەشقانداي الاڭداۋشىلىق بولماۋعا ءتيىستى. قايتا ولار ەكسپورتقا باعىتتالعان ءوندىرىستى دامىتۋعا قۇلشىنىس تانىتاتىنى انىق. ونىڭ ۇستىنە, ەلىمىز استىق ەكسپورتى بويىنشا الەمدە ءبىرىنشى ورىن الاتىندىقتان, باعام وزگەرىسى ءبىز ءۇشىن قولايلى دەپ ەسەپتەيمىن.
ءوزىمىزدىڭ شارۋاشىلىققا كەلسەك, ءوندىرىستى ارتاراپتاندىرۋعا ەسەلەنگەن ەكپىن تۇسىرەتىن بولامىز. ونىڭ تيىمدىلىگى مىنادان كورىنەدى. سوڭعى ءۇش جىل قاتارىنان جىل سايىن 2,5 ميلليارد تەڭگەنىڭ ءونىمى ءوندىرىلىپ, ءار جۇمىسشىعا شاققاندا ەڭبەك ونىمدىلىگى 35 مىڭ دوللاردان اينالدى. جالپى, ءونىمنىڭ 35 پايىزى مال شارۋاشىلىعىنىڭ ۇلەسىندە بولعاندىقتان, شيكىزات قورى مەن وزىندىك قۇن ەسەبىنەن ءونىمدى ارزانداتۋ تەتىكتەرىن ۇستاپ تۇرمىز. ول ىشكى جانە سىرتقى رىنوكقا بىردەي قاتىستى بولماق. بۇرىنعىسىنشا, ورتالىقتان جىلىتىلاتىن ۇيلەردە تۇراتىن رودينالىقتار سۋ مەن جىلۋ قۇنىنىڭ 40 پايىزىن, ازىق-ت ۇلىك ونىمدەرىنىڭ 20 پايىزىن عانا تولەپ, ناندى 25 تەڭگەدەن ساتىپ الادى. مۇنداي جەڭىلدىك اۋىلداعى 230 زەينەتكەر مەن 117 بيۋدجەتتىك سالا قىزمەتكەرلەرىنە بىردەي جاعدايدا قاراستىرىلعان.
يۆان ساۋەر,
قازاقستاننىڭ ەڭبەك ەرى,
«رودينا» اگروفيرماسى» جشس باس ديرەكتورى.
اقمولا وبلىسى,
تسەلينوگراد اۋدانى.