ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ عالىمدارى مەن ماگيسترانتتارى جاقىندا جۇرتشىلىققا جەل گەنەراتورىنان, فوتوەلەكترلى كۇن باتەرەياسىنان جانە كۇن كوللەكتورىنان تۇراتىن بالامالى قۋات كوزدەرى كەشەنىن كورسەتتى. قوستاناي وڭىرىندەگى جوعارى وقۋ ورىندارىنىڭ اراسىندا بۇل كەشەن بىرەگەيلىگىمەن ەرەكشەلەنىپ وتىر. ويتكەنى, جەلدەن, كۇن ساۋلەسىنەن ەلەكتر ەنەرگياسىن وندىرەتىن بۇل كەشەن ستۋدەنتتەر مەن ماگيسترانتتارعا ساباق ءۇشىن قۇرىلعان ماكەت ەمەس, ول قازىردىڭ وزىندە ەلەكتر ەنەرگياسىن ءوندىرىپ تۇر.
قازىر قالدىقتاردان شارشاعان, جەر-انانىڭ قوينىنداعى بار قۇتتى تاۋىسۋعا اينالعان الەم «جاسىل ەكونوميكاعا» بەت بۇرا باستادى. ونىڭ نەگىزى ەنەرگيانى بالامالى قۋات كوزدەرىنەن ءوندىرۋ بولىپ تابىلادى. قوستاناي مەملەكەتتىك ۋنيۆەرسيتەتىنىڭ عالىمدارىمەن, وقىتۋشىلارى وسى باعىتتا جۇمىس ىستەۋگە بەلسەنىپ وتىر. عىلىمي زەرتحانادا بالامالى قۋات كوزدەرى ءۇشىن قاجەتتى جابدىقتار الىنعان. جەل, كۇن قوندىرعىلارىنان وندىرىلگەن ەلەكتر ەنەرگياسىمەن ۋنيۆەرسيتەتتىڭ № 3 كورپۋسىن قامتاماسىز ەتەدى.
وقۋ كورپۋسىنىڭ شاتىرىنا ورنالاستىرىلعان كۇن كوللەكتورىنا جالعانعان ەكى قۇبىر عيماراتتىڭ ىشىنە جىبەرىلىپ, ول كورپۋستاعى بۋفەتكە جەتكىزىلگەن. وسى قۇبىردىڭ ارقاسىندا ونداعى سۋ جىلىپ تۇر. اسحاناداعى ىدىس جۋعا پايدالاناتىن سۋ تەگىن جىلىتىلۋدا. ال وقۋ كورپۋسىنىڭ ارتىنا ورناتىلعان جەل گەنەراتورى وندىرگەن 5 كۆت ەلەكتر ەنەرگياسى ءبىلىم ورداسى عيماراتىنىڭ الدىنداعى گۇلزاردى تۇندە جارىقپەن قامتاماسىز ەتەدى. TEMPUS حالىقارالىق جوباسى شەڭبەرىندە جاسالعان بۇل كەشەن ەلەكتر ەنەرگەتيكاسى جانە فيزيكا كافەدراسىنىڭ وقىتۋشىلارى مەن ماگيسترانتتارىنىڭ زەرتتەۋ ەڭبەگى. كافەدرا مەڭگەرۋشىسى يگور كوشكيننىڭ ايتۋىنشا, 13 ماگيسترانت جاڭعىرتىلعان قۋات كوزدەرىن پايدالانۋ ارقىلى دامۋ جانە ەكولوگيالىق ينجينيرينگ تاقىرىبىن ودان ءارى زەرتتەۋدە. ولاردىڭ ۇزدىكتەرى ءوز جوبالارىن استانادا وتەتىن بولاشاقتىڭ ەنەرگياسىنا ارنالعان ەكسپو-2017 الەمدىك كورمەسىنە قويۋدى دا ارماندايدى.
ءنازيرا جارىمبەتوۆا,
«ەگەمەن قازاقستان».
قوستاناي.