ەلباسى بيىلعى جولداۋىندا يننوۆاتسياعا ايرىقشا نازار اۋداردى. بۇيىرتسا, ەندى ۇتقىر جانە مۋلتيمەديالىق, نانو جانە عارىشتىق تەحنولوگيالار, روبوت تەحنيكالارى مەن گەندىك ينجەنەريا, بولاشاقتىڭ ەنەرگياسىن ىزدەۋ جانە اشۋ سياقتى ەكونوميكانىڭ جاڭا سالالارى قالىپتاسادى.
وسى ورايدا, «قتج» ۇك» اق فيليالى – «ينفورم-سەرۆيس» مەكەمەسىن قۇرۋ تۋرالى شەشىمنىڭ دۇرىس بولعانىن ۋاقىتتىڭ ءوزى كورسەتىپ وتىر. ونى دايەكپەن بەكىتسەك, ناقتى ۋاقىت تارتىبىندە قىزمەتتەر ۇسىنۋدىڭ iService اقپاراتتىق جۇيەسى ازىرلەنگەن. جىلدام جۇيە جۇك جونەلتۋشى كليەنتتەر عالامتور ارقىلى ونلاين جاعدايدا ءوز ەلىمىزدە, سونداي-اق, تمد جانە بالتىق جاعالاۋى ەلدەرىنىڭ اۋماعىنداعى ءوز ۆاگوندارى جونىندە تولىق مالىمەت الىپ تۇرا الادى. ءتىپتى قالاي ورنالاسۋى, قانشا جول ءجۇرىپ وتكەنى, جارامسىزدىقتارى, تۇرىپ قالۋ سەبەبى سياقتى كىلتيپانداردىڭ بايىبىنا قانىعۋعا مۇمكىندىك بەرەدى.
مۇنىمەن بىرگە, «قازتەمىرترانس» اق ۆاگون پاركىن باسقارۋدىڭ اۆتوماتتاندىرىلعان جۇيەسىنىڭ باعدارلامالىق كەشەنى ءۇشىن شۇعىل تارتىپتە قوعام ۆاگوندارىنىڭ ورنالاسۋى تۋرالى اقپارات الۋدىڭ باعدارلامالىق قۇرالى تۇزىلگەن. ول جەرگىلىكتى تەمىرجول اكىمشىلىگىندە ۆاگونداردى باقىلاپ, جولداعى قالىپتان تىس وقيعالارعا جەدەل ءۇن قاتۋدى, پويىز قوزعالىسىن دۇرىس بولجاپ, تاسىمال ۇدەرىسىنە قاتىسۋشىلارمەن ەسەپ ايىرىسۋ اۋىرتپالىقتارىن جەڭىلدەتەدى.
ال, «كەدەنترانسسەرۆيس» كومپانياسىنا ۆاگون پاركىن جەدەل باسقارۋعا قاجەتتى اقپاراتتىق قىزمەتتەردىڭ بارلىعىن جەدەل بەرۋگە قاتىستى جۇمىستار جۇرگىزىلىپ جاتىر. ءتيىستى قۇجاتتارعا قول قويىلعان. «اسكەريلەندىرىلگەن تەمىرجول كۇزەتى» اق پەن تاسىمالداۋ ۇدەرىسى ديرەكتسياسىنىڭ ورتاق تىرلىگىنە قاتىستى كۇزەتىلەتىن جۇكتى ەسەپكە الۋدىڭ باعدارلامالىق قۇرالى جاسالعان.
«ەگەمەن-اقپارات».