الماتى وبلىسىندا 300-دەن استام ۋلى جىلاندى اسىراعان ازامات ۇستالدى. بۇل تۋرالى Gazeta.kz حابارلادى.
الماتى وبلىستىق ىشكى ىستەر دەپارتامەنتى قىلمىسقا قارسى كۇرەس باسقارماسىنىڭ قىزمەتكەرلەرى قاراساي اۋدانىنا قاراستى بەرەكە اۋىلى تۇرعىنىنىڭ شارۋا قوجالىعىندا 300 قاراسۇر جىلان مەن 10 ورتا ازيالىق ءابجىلان بار ەكەنىن انىقتادى. سونداي-اق سول جەردەن ۋعا تولتىرىلعان شىنى ىدىستار تابىلعان.ءبىر ەسكەرەرلىگى, بۇل جىلاندار قازاقستاننىڭ رەپتيليا فاۋناسىنىڭ تىزىمىنە ەنگىزىلمەگەن.
قۇقىق قورعاۋ قىزمەتكەرلەرىنىڭ ايتۋىنشا, ەلىمىزدە قاراسۇر جىلان مەكەندەمەيدى. سوندىقتان ونى كۇدىكتى كونتراباندالىق جولمەن تۇرىكمەنستاننان اكەلەدى ەكەن. ال ورتا ازيالىق ءابجىلاندى تمد اۋماعىنان كەزدەستىرۋ ءتىپتى مۇمكىن ەمەس.
جالپى, اتالعان جىلاندار ادام ءومىرى ءۇشىن وتە قاۋىپتى. دەگەنمەن, ولاردى سينتەتيكالىق ەسىرتكى جاساۋعا پايدالانادى دەگەن دەرەك بار. قازىر ۇستالعان ازاماتتىڭ ۇستىنەن قىلمىستىق ءىس قوزعاۋ ماسەلەسى قاراستىرىلۋدا.
ءامىرحان الماعانبەتوۆ.
دەرەككوز: Gazeta.kz.
فوتو: Gazeta.kz.